Read Biete ISAIA 11 Bible Online

ISAIA 11 - Biete bible

ISAIA 11

¹Rêng Davida richi zuang risui chu thing iphûr angkan lei iphûr tâk ni khom sela, thingkungmui a hong icher nôk ngai angkah hin Jesaia richi Davida rithokin rêng ithar zuang suak a ti.

²PUMAPA khan ama rithla ngêiin ompui a ta, Vârna neh riatthiamna hei, Roisak thiamna neh ihâina hei PUMAPA ṭina neh riat theina rithla hei innei a ti.

³PUMAPA ṭi hi a lômna tak nîng a ta, Chungthua lang dân ringotin roi rêl no ni a, Ikuara riat dân ringot khomin thu rêl isat no nih.

⁴Inrianghei chu idik takkan roirêl pêk a ta; Ram sunga mi tlômhei chu chôidom a ti. A thupêkin mihei chu kuttum thông a ta, Mi sualhei chu a bâia rithuakin sêm that a ti.

⁵A mihei dikna neh iamomnan roirêl pêk a ti.

⁶Inia neh berate chu ringei irkan munkan lêng an ta, Keiârsi chu kêl neh munkan kual an ti. Serâtte neh sakeibaknei têhei chu munkan fâk zong an ta, Naipangtên ikôi dûl dûl a ti.

⁷Serâtpui neh ivom chu munkan fâk zong an ta, An têhei khom ringei irkan munkan kual dîl an ti. Sakeibakneihei khan serâthei angkan bupôl fah tâng an ti.

⁸Rinu nêklâihei chu soksokpho kua kôlah ridâi an ta, Rinu nêk bang chakhein sokngân khurah an kut rôl an ta, Nikhomsela, lei ichuk khâi no nih.

⁹Zion, Pathian tlâng rithiang rêng rênga khan, Tute risê risak a, innat risak om khâi no nih. Tuikhanglian hih tuia ai sip angkan, PUMAPA riatna khan ram hi ai sip rang tâk a nit.

¹⁰Kha nikhuaah khan chu Jesaia richia rithoka rêng zuang isuak kha nam tin rang risinsiana nîng a ta, a rêng khopuiah khan ribûm an ta, chôiinrisâng an ti.

¹¹Kha nikhuaah khan chu PUMAPA khan â ban phar nôk a ta, ama mi la dam isun, Asuria neh Aigupta ram hei, Pathros ram hei, Sudan ram hei, Elam ram hei, Babilon ram hei, Hamath ram hei neh tuikhanglian rikam neh tuihuala la omhei kha ṭhui ikhîr nôk a ti.

¹²Nam tinrêng mu rangin ritlek târ a ta, Israel nam chekindarhei neh Juda tlân indarhei chu kôlkil ilika rithokin ṭhui bûm a ti.

¹³Israel ram khan Judai ram chu thîk khâi no ni a, Judai ram chu Israel ram irâl ni khâi no nih.

¹⁴Thlang tianga om Filistia kha munkan doi an ta, sak tianga mihei khom munkan irok an ti.

¹⁵Pumapa khan Suez Likilkôi kha inkang a ta, Eufratis tuipui khom ithli lum imangin inkang pit a ta, vatedung sarikah inchang a ta, kepha khom dui loiin mi tukhomin varâl kâi thei an ti.

¹⁶Aigupta ram ata Israelhei an hong suakna rang lamilian ai om angkah khan a mi la dam isunhei rang Asuria rama rithok khomin lamilian om tâng a ti.