Read Biete ISAIA 13 Bible Online

ISAIA 13 - Biete bible

ISAIA 13

¹Babilon chungchâng thu Amoza naipa Isaian Pathiana rithoka ai dong chu hihei hih a nit.

²Tlâng ikol sîpah ritlek târ unla, sipaihei chu koibûm unla, khopui risong tak kul inkhâr kha idoi rangin nin kuttum inmun inriatna peh rei.

³PUMAPA khan a mi inkunghei thu ki pêk a, ki mi song inrup, ihâi tak takhei chu a ningmur iṭhumnan ai koi a nit.

⁴Itlângheia irî vung vung chu ringai ta u, ram tin ata nam tinrêng hong ribûm rihu lum chu a nit. Tinrêngthothei PUMAPA khan a sipaihei kha râl idoi rangin ai bûm a nit.

⁵Kôlkil ata an hong a, kôlkomong ata an hong irbûm a nit. PUMAPA khan a ningmurin ram pumpui chu a îsiat rang a nit.

⁶Irung vong vong ta rei, PUMAPA nikhua chu a zuang nâi tâk, Tinrêngthothei khan siatna â thlun rang nikhua ngêi kha.

⁷Hi sikah hin mi murdi kut ritha rizal a ta, zâmzal lungzîngin mi tin om an ti.

⁸Rithlabâr vîkkan intakna neh natna tuang an ta, naiha isê angkan rikin rikin an ti. An thâiindôrzia rimu risak an ta, izak tak tak an ti.

⁹PUMAPA nikhua chu zuang tlung a ti, a ningthik inrît tak a zuang ilang tikin chu ram chu inram nîng a ta, a sunga mi sualhei chu inrimang riai nîng an ti.

¹⁰Rivâna ârsihei neh sizuchoihei khin an vâr isua khâi no nih. Nîsa suak lâi khom zîng a ta, ithla khom vâr khâi no nih.

¹¹PUMAPA khan, “Rinêngah vânduaina iṭhum ki ta, mi siahei murdi an sualna sikin kuttum thông ki ti. Mi lârripâkhei risongna chu inboi ki ta, mi nunterhei risongna khom intlôm ki ti.

¹²Rângkachak nêkan khom mi a la dam isunhei khah khatinvâng an ta, Ofir rângkachak ai roichek angkan miriamhei kha iroicheka bang in-om ki ti.

¹³Keimah, Tinrêngthothei PUMAPA khan ki ningthik ken lang nikhuan chu rivân innîng ki ta, rinêng khom risoih a ta, a omna mun ata rithon pai a ti.

¹⁴“Sa kâptu ata sakhi lâizâm itho neh bera enkol ino indar angkan, ram dang mi Babilona omhei kha mahni mihei pan an ta, mahni ramah itlân kîr dûl dûl an ti.

¹⁵Tukhom imana om kangân chu khandaiin ivit that an ti.

¹⁶An naisenhei an mitmuah thatpêk an ta, an inhei khom a ramin siam pêk an ta, an nupuihei khom zâlrâtin châipui pêk an ti,” a ti a.

¹⁷PUMAPA khan, “Babilon idoi rangin Media mihei ithor ki ta, tangka ringai innah mak a, rângkachak rizukna khom nei mak e.

¹⁸An phel neh thalin tlangvâlhei kâp that an ta, naitesenhei chungah lungkhamna inlang no ni a, naipangtehei khom lunginkham ual no nih.

¹⁹Rêng ram khuaa roinpui tak Babilon khua enihoi tak Kaldaihei isong tak tak chu keimah, PUMAPA hin Sodom neh Gomora khua ken tlôm lam angkah takin intlôm ki ti.

²⁰Tutên chuan khâi no ni a, thoithar hong suak mai khom seh tutên lua khâi no nih. Arab khualzinhei khan puan in zar khâi no ni a, berapuhei khomin an berahei inlêng khâi no nih.

²¹Ramchâr sahei kha om an ta, simbuhei khan ribu kâi an ti. Osṭikhei om an ta, in ramheiah khan ramkêlhei hong richôm richôm an ti.

²²Kulpuihei neh rêng in ihoiheiah khan sihalhei neh iniahei irung an ti. Babilon tlômna nî â tlung rang tâk, a sûnhei â hek rang mâng mâng tâk a nit,” a ti a.