Read Biete ISAIA 14 Bible Online

ISAIA 14 - Biete bible

ISAIA 14

¹PUMAPA khan Jakoba chungah lungkhamna nei nôk a ta, a mi, Israela chu rithlang nôk a ti. An ramah in-om nôk a ta, nam dang khomin hong pan an ta, Jakoba in mihei chu hong ribêl an ti.

²PUMAPA khan ai pêk rama kîr rangin nam danghein ṭangpui an ta, Israelhei khan PUMAPA ramah, kha mihei khah a nupang â pa, an rêngkan suakin mang tâng an ti. Israelhei lei imantuhei ngêi khah Israelhei khan man tâng an ta, a lei isirde ngaituhei chungah khan roirêl tâng an ti.

³Natna nin ituang hei, nin lungzîngna neh isôl takka sin nangni an inthonaa rithokin PUMAPA khan nangni inringam tâng a ti.

⁴Kha tikin chu hi êsêlna lâah hin Babilon chu ikhêk khum nin ta: “Rêng nunsia chu a tlôm tâk e! Iṭiomah khah ân thim val tâk e!

⁵PUMAPA khan mi pualoihei irol â khiak a, rêng isualhei tôkmol chu ân ritan pêk tâk.

⁶Ningmura mihei nuam ilo bit ngai, ram a înê tâkhei khom ningmur taka denginthei bâng ngai ino khah.

⁷Ram tin thlangam takkan an om dîl tâk a, lôm lâ sakin an ipâi suak tâk a.

⁸Rêng ilîrnaah hin ifâr thinghei neh Lebanon tlânga sidar thinghei chu ani khah om khâi mak a, â phûr rang an om khâi no sikin an lôm tak tak tâk a.

⁹“Nuai tiang mithi khua chu Babilon rêng idon rangin a lei risiam thlâm a, a tlung rang ai ngâkmo a nit. Rinênga thuneituhei rithla kha an buai but but tâk a; nam tin tin rênghei rithla kha an rêngṭhungmun ata an hong thoi iding tâk a.

¹⁰An rêngkan an lei don a, a ziangah, ‘Keimani angkah takin nang khom ner zal tâk a, keimani angkah tak ni nit tâk hih.

¹¹Ni seranda irî vung vunghei neh roinpui takkan ni om ngai a, khan atûn chu mithi khuaah ni zuang ṭum tâk a, ni puantha chu sarlung a nit tâk a, ni puansil chu ringehei a nit tâk hih,’ lei tîng an ti,” itin.

¹²O nangmah Babilon rêng, zîng sikhovâr ivâr riti, rivâna rithokin nî tlâk tâk a nit. Nam dang intlôm ngaitu, rinêngah paiiṭhul ni nit tâk na!

¹³Rivâna hang ilui a, ârsihei chungtianga ni rêngṭhungmun hang inṭhung a, mâr mongna pathianhei ribûmna ngai tlângah khan rêng angkana ṭhung rang ni tum ngai a.

¹⁴Ni lungrilin, sûm chungtiang hang ife a, ân Chungtaka angkana om rang ni tum ngai tlia kaneh khan.

¹⁵Atûn chu mithi khua ân thûkna takkah khan namiṭhul ni nit tâk.

¹⁶Nang imukan nang en vong vong an ta, “Hi mi hih na nuai pum innîng a, rêngramhei murdi soi innîng ngaitu chu?

¹⁷Hi mi hih na, khopuihei isehchit a, rammual pumpui ramchâr angkana inram ngaitu chu? Hi mi hih na, a mi manhei isua tlak loi a, an in tiang khom infe nôk nuam tlak ngai inotu chu?” la tîng an ti.

¹⁸Rinêng chunga rênghei murdi chu an thlân roinpui takah khan an zâl ngai a.

¹⁹Khanniseh, nangmah chu ithlân nei no tin a, ni ruak khah ramte thi angkan mun dangah ipai nîng a ta, risual buala sipaihei ruak khan del rikhû a ta, khurseûmah khahei neh khan pai an ta, ichîl nengin om a ti.

²⁰Ni ram ne siat chit a, ni mihei khom ni that sikah khan rêng danghei angkana phûm ni no tin a, ner chi insual takhei kha khatkah khom izua ni tlak no nih.

²¹An pahei sualna sikin rêng naihei khah that unla, an lâia mi tute inlal khâi no riseh, rinêngah hin khopui khom siam nôk khâi no riseh.

²²Tinrêngthothei PUMAPA thu suak khan, “Babilon chu doi ki ta, arming inboi pai ki ti. Îte zua no ning a, a nainetehei ten khom inrimang vang ki ti. Keimah, PUMAPA ngêiin kî ti a nit.

²³Babilon chu tinrêng phît infâina ngai numphin phît infâi liai ki ta, tuichirin siam ki ta, simbuhei bang om an ti. Keimah, Tinrêngthothei PUMAPA hin kî ti a nit,” a ti a.

²⁴Tinrêngthothei PUMAPA khan ṭongrikhâmin hingka hin a ti, “Itho kî tum chu thông ki ta, ki thil tum chu thluan intlung thal ki ti.

²⁵Asuria chu ki ram, Israel ram sung ngêiah lei intlôm ki ta, ke tlângheiah khan lei chîl neng ki ti. Ki mihei chu Asuriahei ringkol ata inzôk ki ta, puakirik tak tak a inpêl ngaihei khah khâi pai ki ti.

²⁶Rammual pumpui rangin amahih ki thiltum chu a nit, nam tinrêng chungah ki kut ki îlek tâk a nit hih.”

²⁷Tinrêngthothei PUMAPA khan amakhah itho a tum tâk a; kuttum itho rangin a kut â lek tâk a, tutên inringam thei no nih.

²⁸Rêng Ahaza thi kuma thu puangindar chu amahih a nit:

²⁹Filistia mihei o, nangni an itôkna rol khah a kiak tâk sikin nin râiinfân no rei. Irûl khah thi man sela sokvâr hong suak a ti. Irûl rituia rithokah khan rûlpui ivuang thei hong kek a ti.

³⁰PUMAPA khan a mi inriang, îte nei inohei khah enkol a ta, mi riangvâihei khah thlangam takkan in-om a ti. Nikhomsela, nangmani Filistiahei chungah chu ṭâmpui tir a ta, â dam suak khatkah khom zua tlak no nih.

³¹Filistia rama khotinhei, iṭapin irung ngûi ngûi unla, nin rêngkan iṭi rilônthingin om rei. Mâr tianga rithokin pilvut a hong khûk e, sipai lôm an lâia khatkah khom mi thâidôp om inohei hong ipâl ipil khû chu a nit.

³²Filistia ram palâihei chu ingkan im ei sâm rang tâk? “Zion chu PUMAPA înding a nit a, amakhan a mi dengitheihei khan zôkna mûng an ti,” iti iril ei ti.