Read Biete ISAIA 15 Bible Online

ISAIA 15 - Biete bible

ISAIA 15

¹Moab chungthu chu amahih a nit: Zânka thlâkin Ar khua neh Kir khua[8] chu isehchit a nit a, Moab ram chu a înthim val tâk a nit.

²Dibon mihei[9] chu an pathian biakna mun risângah iṭap rangin an hang fe a. Moab mihei khan Nebo khopui neh Medeba khopui kha an ṭâ ngûi ngûi a, an luhei an inbûi a, an rikhamulhei an voi a.

³Lamilianheiah borapuan an sil a, inchungheiah neh tualzôlheiah lungiseh takkan an ṭap ngûi ngûi a.

⁴Hesbon neh Eleale mihei khah rithlavâiin an ikhêk a, an ikhêk rihu khah Jahas khua rithok khomin ireh phâk a nit. An sipaihei ten khom rithlavâi takkan an ikhêk a, an indôp zoi tâk a.

⁵Moab sikin ke lung a nat a, mihei kha Zoar neh Eglath-Selisia dên dapkan, irâl iṭin lâizâm an tho a. Ṭhenkah chu Luhit tungah iṭap pumin an lui a, ṭhenkah chu Horonaim tiang lâizâm an tho a, beidong takkan an ṭap thiai a.

⁶Nimrim tuidung kha a kang tâk a, a vakama loisûlhei a thêm zoi tâk a, â cher nôk rang zel omak a, sûl iring rêng rêng om khâi mak.

⁷Mihei khah an thil nei murdi neh Tuipui Pharâm Phâi ikhêlin lâizâm an tho a.

⁸Moab ram kil tinah an ṭap irung vung vung a, an ṭap irî khan Eglaim neh Beerelim khuaheia rithok khomin an iriat thei a nit.

⁹Dibon khua tuidunghei chu thisenin â vût pum tâk a. Kha nêka inrît khah kha mihei tuang rangin Pathianin a lai sia ṭian a nit. Moab rama rithoka lâizâm ithohei neh ram sunga a la dam isunhei rivât infâina la om a ti.