Read Biete ISAIA 16 Bible Online

ISAIA 16 - Biete bible

ISAIA 16

¹Ram iṭôla om Sela khua[10] rithokin Moab ruaituhei khan Zion tlânga roirêltuhei khah thilpêkin beratehei an hong pêk a.

²Arnon vadung pangah khan Moab ruaituhei khan an ngâk a, iva arbu ilah pêk ilêng diai angkan tum bîk nei loiin hong rilong an rilong diai a.

³Anni khan Judai ram mihei ziangah, “Ingkan im kin om rang, ne ngaitua ta u, sûn inî luma thing dâilîm angkan nin dâilîmah khan lei ringam rong ung. Irâl iṭia lâizâm itho kin nit a, nin izilah nen ribih unla, irâl kutah ne lan tlak no rei.

⁴Moab lêngivâihei hih nin ziangah nen lêng unla, nen rimang vang itumhei ata ne hoi rei,” an hang ti a. (Nuamlona hih ringam a ta, risirdena hih boi a ta, ram isehchit itum ngaihei om khâi no ni a.

⁵Khanungchu, Davida richia mi khatkah rêngin iṭhung a ta, ani khan mihei chungah iamom takkan neh lungkham takkan roirêl a ti. Thil dik itho rangin a châng inrang a ta, roirêl dikna chu ituh khap a ti.)

⁶Judai ram mihei khan an ziangah, “Moabhei ripâkzia kin riat ngai a, an ripâk titaka, risong khom an risong titak; khanniseh, an ripâkna khah â tlong a nit,” an lei ti pêk a.

⁷Moab mihei chu an dengthei tuang sikin iṭapin irung vong vong riseh. Kir-Heres khopuia an fâknêk an riat ikipah ṭap ngûi ngûi riseh. Beidong lungzîngin ai del rikhû tâk a nit.

⁸Hesbon rikulhei a siat zoi tâk a, Sibma grep rikulhei an ṭuai zoi tâk, nam tin ruaituhei khan kha grep rikula uain khah an înrui ngai a nit.[11] Zoro thleng tâkah khan an grep rânghei khah Jazer idênin an inrizâm a, sak tiang ramchâr ten a tlung phâk a, thlang tiang Tuipui Ithi dênin a irzâm a nit.

⁹Khasikin, Jazer rêng ranga ki ṭap rualin Sibma grep rang khomin ṭap rak rak ki ti; Hesbon neh Eleale rangin ki mitrithli a luang a, ridoina mun a nit sikin mihei lômna ranga thei rimal rang an ram zoi tâk.

¹⁰Rikulheiah khan ilôma râifân rihu ân thim zoi tâk a, grep rikulheiah khan râifânin ipâi khâi mak a, zâi lâ rî khom om khâi mak. Grep sômtu rang om khâi mak a, ilôma khêk rihu a dâi zoi tâk.

¹¹Moab rangin beidongin ki ngûi a, Kir-Heres rangin ker ngai ai siat a nit.

¹²Moab mihei kha an pathian biakna mun risânga ṭongṭai ranga an rimangna an sôl zoi tâk a; khanniseh, an ta rangin îte rifena om pêk khâi no nih.

¹³Amakhah Moab chungchânga PUMAPA khan thu a lei îsîr thlâm tâk chu a nit.

¹⁴Atûnah hin PUMAPA khan thu â sîr nôk a, “Kum ithumka sung ngêiin Moab richongna chu mong a ti. A mihei tam zuak khom sela, iroichekah bang â thi bân nîng an ta, khahei ilua khom khah rizal nengkan om an ti,” a ti a.