Read Biete ISAIA 17 Bible Online

ISAIA 17 - Biete bible

ISAIA 17

¹PUMAPA khan, “Damaska chu khopui ni khâi no nih, khoram iṭetrup bang ni tâng a ti.

²Suria khopuihei chu khoramin imarak nîng an ta, ranhei lêngna mun chang tâng a ti. Lungringam takkan ranhei chu lêng an ta, tutên ûmrizûl khâi no nih.

³Israel ramah lei rirungna kulpui rêng rêng om khâi no ni a, Damaska ram khom ramval a ti. Suria rama a la dam isunhei chu mualinphoi takkan om an ta, Israelhei roinpuina ṭuai tâk angkah khan nîng an ti. Keimah, Tinrêngthothei PUMAPA khan kî ti a nit,” a ti a.

⁴PUMAPA khan, “Kha nikhuaah khan chu Israel roinpuina boi a ta, archongna murdi khah inriangnan rithleng tâng a ti.

⁵Israel chu bu âttuhein Refaim phâia bu an ât zoina chul ât rikhol bukung la ding phir phar angkah hi ni tâng an ti.

⁶Iroichekah bang â thi bân a la dam isun nîng an ta, Israel chu oliv irâ soi iṭhul tak, a lêr risânga khatkah inika la kop phir phar, â ṭang môra ilî ringaka la om ngai angkah nîng a ti. Keimah, Israelhei Pathian PUMAPA khan kî ti a nit,” a ti a.

⁷Kha zoroah khan mihein anmani Siamtu tiang ngat an ta, Israelhei Mi Rithianga chu thlîr an ti.

⁸Kuta an isiam mâichâmhei kha uksak khâi no ni a, pathiannu Aseri rilim neh an kut ngêia an isiam namhoi hâlna mâichâmhei kha inluh khâi no nih.

⁹Kha zoro tenan chu Israelhei makunga Hiv mihei neh Amor mihei lâizâm itho a, an khopuihei imah raka ai om angkan khopui kulpui idet tak takhei kha marak an ta, a ramin om tâng a ti.

¹⁰O Israelhei, nin saninringna Pathian kha nin ringil tâk a, nin ribîkna lungpui chu reh nuam khâi mak chei. Khanêkan chu enihoi tak takkan rikul iserhei nin siam a, nam dang pathian ibia nin rithlang ual tâk a.

¹¹Khasikin, nin phun nî sûn zelah khan nin thil phunhei khah iringin pâr zel khom sela, â râ rimal rang om viat no nih. Buaina neh natna dam theiino bang intiar a ti.

¹²Tuikhanglian risok angkan nam ilianhei kha an hong irî dur dur a, tuirifôn irî bur bur angkan kha mihei khah an ichâng suai suai a nit.

¹³Kha mihei khah hong irî vung vung khom sela, PUMAPA khan ngo a ta, dâi dup an ti, itlânga farsi phâivuan ai sêm inlêng neh ipildi thlipuin ai sêm inlêng angkan rikiang khup an ti.

¹⁴Kholoi tiang chu iṭi an om tak tak a, atûk zîng tiang chu imu rang om khâi mak. Amakhah a nit, ei ram irok a, nen rimang itumhei sik rangtum chu a nit.