Read Biete ISAIA 18 Bible Online

ISAIA 18 - Biete bible

ISAIA 18

¹Ethiopia vadung râlah, thil ivuang suai irî tamna ram a om a.

²Kha rama mihei khan Nail vadung zuang izuiin tuipui lâiluang phâiphâk rikuang imangin palâi an zuang tir a. Nangmani palâi châng iranghei, nam irât neh sin ithothei tak, mi dung risâng neh taksa nâm zên zûn, tianlâi ata rammual pumpui ṭisim, vadung itamka luangna ramah khan hi thucha chôiin kîr nôk ta rei.

³Rinêng chunga om murdihei o, tlângsîpa ritlek an itâr lei thlîr unla, bekul irî lei ringai rei.

⁴PUMAPA khan hingka hin ki ziangah, “Bu ât lâi, kholum rido ṭul angkan neh sûn lâi nîsa lum angkah hin idâirekkan rivâna rithokin zuk thlîr ki ti.

⁵Grep pâr a hong vun a, a hong irâ a; khanniseh, â min rimal rang a om maa isâtchit angkah hin Ethiopia mihei chu irâlin sâtnôi chit an ti.

⁶An sipaihei ruak chu tlângrama rimu neh ramsa fâk rangin imarak nîng an ti. Kholum sungkah rimu lômin fâng an ta, phalbi sungkah ramsahein fâng an ti,” a ti a.

⁷Kha zoro tenan chu hi nam irât neh sinithothei tak, dung risâng neh taksa nâm zên zûn, tianlâi ata rammual pumpui ṭisim, vadung itamka luangna rama rithokin, PUMAPA khan thilpêk dong tâng a ti. Kha mihei khah PUMAPA biakna mun Zion ngêiah khan thilpêk hong ichôiin hong an ti.