Read Biete ISAIA 19 Bible Online

ISAIA 19 - Biete bible

ISAIA 19

¹Aigupta ram chungthu chu amahih a nit: Sûm irât tak chunga chuangin PUMAPA khan Aigupta ram a hong pan a. Aigupta mirmilhei chu a makungah khan an inthing a, Aigupta mihei ilung khom ân dôp zoi tâk.

²PUMAPA khan, “Aigupta mihei chu Aigupta mihei ngir indoi ki ta, urêngin an urêng doi an ta, pansak neh panthlang ridoi an ta, khua neh khua ridoi an ta, rambial neh rambial ridoi an ti.

³Aigupta mihei lungril chu indôpin siam ki ta, roi an isakhei thluantlung no nih. An mirmilhei kha anmani ṭangpui rangin ngên an ta, an dôithiamhei, thlasânthiamhei neh mithi sôn thiamhei kha lungvâr â sakpui rangin zong an ti.

⁴Aigupta mihei chu an ruaitu nunter tak kutah pêng ki ta, rêng isual takin an chungah roirêl a ti. Keimah, Tinrêngthothei PUMAPA khan kî ti a nit,” a ti a.

⁵Nail vadung chu kang a ta, ilî ṭuanghei khom châr riai a ti.

⁶Tuipui vatedunghei neh a tuikonghei kang a ta, thu vung vung a ti. Tuipui lâiluang neh pharâmhei khom thêm zoi vang a ti.

⁷Tuipui rikama chimu an ithohei khom châr vang a ta, phâivuan sêm inlêng a ta, kol riai a ti.

⁸Nail vadunga inga man ngaihei chu ngaiinsian ṭap an ta, an rikuaihei neh an lênhei kha mangmunboi chang tâng a ti.

⁹Patzâi rimi tlûra puan ikhông ngaihei kha buai an ta, puan riphân ikhông thiamhei tûngna boi a ti.

¹⁰Puan ikhông thiamhei kha rizal an ta, rilofa mihei lunginzîngin om an ti.

¹¹Zoan khopui ruaituhei chu an invêt bâk reng na! Faroa mi vârhei roisak khom omzia boi a nit; “Tianlâi mi vârhei neh rênghei thu a lei idongtu kin nit,” itin ingkan im Faroa ziangah an ti thei rang?

¹²Aigupta rêng, ni mi vârhei khah taktiang im an iom zoi tâk? Aigupta ta ranga Tinrêngthothei PUMAPA thiltum hi isîr sela, nang iril ta riseh.

¹³Zoan kho ruaituhei chu mi invêt an nit a, Memfis kho ruaituhei khom mi intlo an nit. Ram pumpui iruai rang an nit a; nikhomseh, an iṭhui invâi tâk a nit.

¹⁴PUMAPA khan an lungril ngaituana ân buai pêk tâk a; khasikah khan Aigupta mihei khan îte indik thei khâi mak a, zûnrui khan â luak nâk nâka a îba ngai angkan hong pêm an ipêm diai tâk a nit.

¹⁵Milian neh mi chîn, richong neh inriang an rêngkan Aigupta ram rang tho thei inei tute om khâi mak.

¹⁶Khatikin chu Aigupta mihei chu nupang thâidôr nêka thâidôr la nîng an ti. Tinrêngthothei PUMAPA khan anmani kuttum itho ranga a kut â lek an mu tenan chu iṭi rilônthingin om an ti.

¹⁷Tinrêngthothei PUMAPA khan Aigupta kuttum a tho rang dân a înrifûk khah mi îsîr irî an iriat viat khomin Judai ram chu ṭi tak tak an ti.

¹⁸Khatikin chu Aigupta ram khua ringaka tah Hebrai ṭong mang an ta, Tinrêngthothei PUMAPA riming ichingin ṭonginkung ngai an ti. Kha khuahei lâia khatkah chu “Haheres”[12] sak an ti.

¹⁹Khatikin chu Aigupta ram sungah PUMAPA rang mâichâm siam an ta, Aigupta ramrî-ah khan ama ta rang lungphun iding sâng a ti.

²⁰Amakhah Aigupta ramah Tinrêngthothei PUMAPA a om iti riatna rang neh risinsiana rang a nit; isirdea om an nit a, PUMAPA an isam kaneh â san rang itirin ihoi a ta, sanisuang a ti.

²¹PUMAPA chu Aigupta mihei ziangah riphuang suak a ta, hâlrivâm thillanhei neh ribôlnahei ilanin chubai ûn an ta, PUMAPA ziangah ṭonghei inkung an ta, len sâng an ti.

²²PUMAPA khan Aigupta mihei chu kuttum thông a ta; khanniseh, indam nôk zel a ti. PUMAPA tiang ngat an ta, an ṭongṭainahei sâm a ta, indam tâng a ti.

²³Khatikin chu Aigupta rama rithokin Asuria ram idênin lamilian om a ta; Asuria neh Aigupta mihei chu risir ripo mai tâng an ti. Munkan Pathian chubai ûn tang an ti.

²⁴Khatikin chu Israel chu Asuria neh Aigupta ritlukpui nîng a ta, kha nam ithumkahei khah rammual ranga ṭhatvurna nîng an ti.

²⁵Tinrêngthothei PUMAPA khan ṭhatvur a ta, “Ki mi, nangmani Aigupta mihei; ki kutsuak, nangmani Asuria mihei; ki mi rithlang, nangmani Israel mihei o, ṭhat nangni vur ki ti,” la tîng a ti.