Read Biete ISAIA 2 Bible Online

ISAIA 2 - Biete bible

ISAIA 2

¹Judai ram neh Jerusalem chungchânga Amoza naipa Isaian PUMAPA thu ai dong chu hihei hi a nit:

²Sûn nungkhônheiah khan chu PUMAPA In omna tlâng chu tlâng roinpui tak ni tâng a ta, Tlâng dang danghei khom khûm vang tâng a ti. Amakhan nam tinrênghei fe dûl dûl an ti.

³Mi itam takkah hong an ta, annihei khan, “Hong unla, PUMAPA tlângah Jakoba Pathian Inah khan la hang fe rei. Aman a lampui thurchihei ne lei inrisei a ta, Khanchu, a lampuiheiah khan lôn thei ei ti. Ziona rithokin Dân chu zuang suak a ta, Jerusalema rithokin PUMAPA thu chu a zuang isuak rang a nit,” tîng an ti.

⁴Ani khan nam tin chungah roirêl a ta, An thubuai chu rêl infel pêk a ti. An khandaihei chu âlkâina thîr rizumhein icher an ta, An ifeihei khah thei kung iṭang rikheinan icher an ti. Nam dangin nam dang chungah khandai ilek khâi no ni a, Ridoi dân khom risei tlak khâi no nih.

⁵O Jakoba richihei, hong unla, PUMAPA vârah hin lei lêng rei u.

⁶O Pathian, ni mi, Jakoba richihei hi nî mâk tâk na! Sak tianga mihei neh Filistia mihei dôi imang an song tâk a, nam danghei omdân an ilâk tâk a nit.

⁷Kha mihei ram kha tangkarua neh rângkachakin a sip a, an richonhei kha tep zoi zât zel ni mak a; an ram chu sakorin a sip a, an tâlihei chu tep zoi loi a nit.

⁸An ram chu mirmilin a sip a, anmani kut ngêia an isiam suak khah chubai an iûn ngai a nit.

⁹Mi murdi intlômin om an ta, mâimôk isak nîng an ti. PUMAPA, annihei chu izâ tlak no roh.

¹⁰PUMAPA ṭiomna neh roinpuina ata zôk rangin lungipûkheiah lût an ta, ipil ivungheiah ribîng an ti.

¹¹Miriam risongna khah intlômin om a ta, mihei ripâkna khah inriniamin om a ti. Kha tikin chu PUMAPA bang hih chôiinrisângin om a ti.

¹²Kha nikhua a khan chu Tinrêngthothei PUMAPA khan mi risonghei, lârripâkhei neh ilian ritihei murdi intlôm a ti.

¹³Lebanon tlâng sidar thing risâng murdi neh Basan ram saso thing murdi khom iphûr vang a ti.

¹⁴Tlâng risâng neh mual risâng murdi la ṭhum inriniam a ti.

¹⁵Râlrungbûk risâng murdi neh kulpui bang murdi isim riai a ti.

¹⁶Tarsis rikuang ilian neh enihoi tak tak murdi khom an rêngkan lân rinîk vang a ti.

¹⁷Miriam risongnahei chu intlômin om a ta, mihei ripâkna murdi khom sirphûm nîng a ti.

¹⁸Khatik tenan chu mirmil chu inrimang vang nîng a ta, PUMAPA bang khah chôiinrisângin om tâng a ti.

¹⁹Khante, rinêng hih natinsat takka soiinnîng ranga a zuang tikin chu PUMAPA ṭiomna neh a roinpuina ata izôk rangin mihei khah lungpui ipûkhei neh rinêng rikuaheiah khan ribîng an ti.

²⁰Kha nikhua khah a hong tlung tikin chu mihein an ibiak ngai tangkaruaa siam an mirmilhei neh rângkachaka siam an mirmilhei khah bûimông ziangah neh ibâk ziangah pai tâng an ti.

²¹PUMAPA chu rinêng hih natinsat takka soiinnîng ranga a zuang tikin chu a roinpuina neh a ṭiomna ata zôk rangin lungpui ikakheiah neh ipûkheiah khan ribîng an ti.

²²Â famthei miriam chungah hin ringat khâi no rei. Anni hin lutna îte nei mak e.