Read Biete ISAIA 21 Bible Online

ISAIA 21 - Biete bible

ISAIA 21

¹Babilon chungchâng thu chu hihei hih a nit: Thlisimin ramchâr a înuai ngai angkan ram iṭiom taka rithokin siatna hong tlung a ti.

²Inlârnan thil inrît tak inmu ki nit a, ân mantu khan ân man a, â roktu khan â rok a. Elam sipaihei o, ibô ta rei; Media sipaihei o, kulpuihei hual ta rei. Mi dang chunga thlavâi ithluntu Babilonhei kuta intuangna chu Pathianin a înmong rang a nit.

³Inlârna kî mu neh kî riathei sikah khan iṭi rilônthingnan ki sip tâk a, nupang naiha isê na angkah takin ki nat tâk a.

⁴Ki lu â hâi a, iṭin ken thing a. Kî ngâkmo ngai kholoi nithlâk ri-ôl chu ki rang iṭi rilônthingna zoro a nit tâk a.

⁵Inlârnaah khan ruai an lei inrifûk a, iṭhungna rang zâmpher an lei dap a. An fâkin an in tâk a. Voika zelin thupêk a zuang iring a, “O ruaituhei, thoi zel unla, nin iphohei inrifûk diam ta rei,” a ti a.

⁶Khanungchu, PUMAPA khan ki ziangah, “Fen la, irâl lei ithlîr rang mi sian la, a thil mu murdi hong ithlun rangin iril roh.

⁷Sakor chunga chuang, a bop bopa hong hei, sakuartung chunga chuang hei, saringsei chunga chuang hei, iṭha takkan lei enrichik tap riseh,” a ti a.

⁸Râlvêngtu khah â khêk a, “Epu, râlrungbûk risângah ke ding ṭian a, asûn azân zâl viat loiin kî thlîr mai a nit,” a ti a.

⁹Voikazelin sakor chunga chuang a bop bopa hong an hong tlung thut tâk hih. Khante, râlvêngtu khan, “Babilon khua a tlôm tâk, a tlôm tâk; an mirmil pathianhei khah rinêngah an itâl ritan rem rum tâk,” a ti a.

¹⁰Ki mi Israel, rîzôla bu chîl neng angkana om tâkhei o, atûnah hin Israelhei Pathian, Tinrêngthothei PUMAPA khan thurchi a ne îril hih nin ziangah ki înpuang tâk a nit.

¹¹Edom chungchâng thu chu hihei hih a nit: Edom rama[14] rithokin mi tu manin a ne hong isam a, “Râlvêngtu zân a sôt tâk im? Ne ril roh idorâm zân a lai sôt rang?” a ti a.

¹²Keimah, râlvêngtu khan, “Khovâr rang to a nit tâk; khanniseh, zân hong tlung nôk zel a ti. Â ria ni nuamin chu hong nôk inla, ne hong ridon nôk roh,” itin ki sâm a.

¹³Arabia chungchâng thu chu hihei hih a nit: Dedan mihei,[15] ran rual ihôla Arabia ram phûla riak hei,

¹⁴tui rihâl dangichâra nin zianga hong mihei kha tui lei peh rei. Nangmani, Tema khua mihei o, irâl iṭia lâizâm ithohei khah ifah rang lei peh rei.

¹⁵Kha mihei khah khandai thuat isaihei, thal ngul rikam ṭianhei neh ridoina inrît taka rithoka lâizâm itho an nit.

¹⁶Khanungchu, PUMAPA khan ki ziangah, “Rilomi kum tepa kumkah a tluk kaneh Kedar mihei roinpuina chu mong a ti.

¹⁷Kedar[16] mihâi, thal kâp mihei chu, iroichekah bang â thi bân â zôk nîng an ti. Keimah, PUMAPA, Israelhei Pathian khan kî ti a nit,” a ti a.