Read Biete ISAIA 22 Bible Online

ISAIA 22 - Biete bible

ISAIA 22

¹Inlârna Phâi[17] chungchâng thu chu hihei hih a nit: Îthil im â tlung tâk? Îtho sik im khopuia mihei kha inchung richamheia luiin lômna an isiam tâk?

²Khopui sung chu â rî vung vung tâk a, an îkhêk suai suai a, râifânin an irsoi rilâm tâk. Nin mi ridoina thihei khah khandaia thi ni mak a, rikâpna muna thi khom ni mak.

³Nin ruaituhei murdi lâizâm an tho pêk riai a, thal voikah khom kâp loia iman an nit. An imu murdi nangni an man a, irâlhei ilah takah an la om lâiin lei itlân ta khom unla nangni an iman ngir a nit.

⁴Tho ne mah riai ta u, ki mi thi tâkhei hih kî ṭâ ngûi ngûi rang a nit, tutên lungngam nê sak tum no rei.

⁵Inlârna Phâiah lunginzîngna nikhua, risirdena neh lungâminvâina nikhua kha PUMAPA, Tinrêngthothei PUMAPA khan a zuang îthlun tâk a nit hih. Ei khopui kulbang kha ito sehchit a nit tâk a, lungzîng khêk irî khan tlâng tin â tlor tâk.

⁶Elam rama rithoka sipaihei kha phel neh thalheia rithlukin sakor chungah an hong chuang a; Kir rama rithoka sipaihei khomin an iphohei an inrifûk diam a.

⁷Judai ram phâizôl rinêng ṭhatna mun kha sakor tâli an bit khap a, sipai sakor chungchuang mihei khah Jerusalem dâikot tinah an iding fur a.

⁸Judai ram lei rirungna chu a chim zoi tâk. Khatikin chu râlthluksiana in ata râlthluk nin lâk suak a,

⁹Davida kho kulbang chimna munhei chu nin en riai a, Jerusalem khuaa inhei khom nin en riai a, a ṭhenhei chu kulbang isia ipôna rangin nin ṭhet a. Tui rihungna rang

¹¹kho kul sungah tuipang nin siam a; dîl iluia rithoka tui zuang iluang riting nan nin mang a. Khanniseh, tian ata lei inrifûk thlâm a, atak inchangtu Pathian khah ngaisak mak chei u.

¹²Kha nikhuaah khan chu PUMAPA, Tinrêngthothei PUMAPA khan iṭap a, irung vong vong rang neh lu voi inkol a, borapuan isil rangin nangni ai ti a nit.

¹³Khannisela, nin inui a, nin râi nin infân bâk bâk a, serât neh bera thatin ruai nin iṭhe a, sa nin fâk a, uain nin in a, “Tho fâng ei ta, in ei ti u, naktûkah chu â thi thei zel ei nit,” nin ti a.

¹⁴Tinrêngthothei PUMAPA ngêiin a ne sôn a, ki ziangah, “An dam sung kârkah, hi an thil isual tho sikah hin, ngaidam ni tlak no nih. Keimah, PUMAPA, Tinrêngthothei PUMAPA khan kî ti tâk a nit hih,” ai ti a nit.

¹⁵PUMAPA, Tinrêngthothei PUMAPA khan rêng insungkua enkoltu Sebna ziangah va fe a, a ziangah,

¹⁶“Tu ngân im ni nit a ni irbe, ni thlân rang lung ni îhol hi? Îtheina neiin im itlâng panga lungah ni zâlna rang ni îhol?

¹⁷Ringai roh, mi poimo tak ni nit thei, khan PUMAPA khan nang idom a ta, nang ivir pai a ti.

¹⁸Thillûm angkan nang ilûm a ta, ram rizat takah nang invuang pai a ti. Amakhan nî song tak tak ni sakor tâli kôlah thîng ni ta, ni pu insungkua ta rangin mualphoina nîng ni ti.

¹⁹PUMAPA khan ni sin nang inmâng a ta, ruaitu ni nitna ata nang iṭhul a ti,” va ti rangin a ne itir a nit.

²⁰PUMAPA khan Sebna ziangah, “Khatikin chu ke som, Eliakima, Hilkia naipa kha koi ki ta,

²¹ni zakorfual roinpui kha inhâk ki ta, ni kongkhit khom invong ki ti. Ni thuneina murdi a ziangah lan ki ta, Jerusalema omhei neh Judai rama mihei rangin pa nîng a ti.

²²Davida richi, rêng nuaia thuneina murdi a kutah pêng ki ta, a î-ong nung tâk chu tutên khâr no ni a, ai khâr nung tâk chu tutên iong khâi no nih.

²³Rinêng ichâra chopui angkan idet takkan phun ki ta, a insungkuahei rangin marit an lona nâr tak nîng a ti.

²⁴“A suapuihei neh amah-a ringattuhein ribêl an ta, an insungkua inang murdi ribing-ribêl neh kuri tena khom ama chungah khan ringat an ti.

²⁵Khatik tenan chu rinêng ichâra chopui idet takka iphun kha inîng a ta, riphâi a ti. Amakhah ama ribêltu murdihei mongna nîng a ti,” a ti a. Amakhah Tinrêngthothei PUMAPA khan ai ti a nit.