Read Biete ISAIA 23 Bible Online

ISAIA 23 - Biete bible

ISAIA 23

¹Tura khua chungchâng thu chu hihei hih a nit: Tarsis rikuangpuhei o, irung vong vong rei. Nin ngammun Tura khua chu a siat chit a, a inhei neh rikuang ringamnahei ten khom a siat zoi tâk a. Kupra tuihual ata nin zuang kîr nôk ten bangah khan kha thu khah nin riat a.

²Tuipui rikama omhei o, inthim val rei. Nangmani Sidon khuaa rivai itho ngai, tuipui rizat tak rikan a, rivai itho ngaihei,

³Sihor phâi bu, Nail vadung panga vâng ngêi khah nin zur chôk a, ram dangheiah nin zuar nôk a.

⁴O, Sidon khopui, mualphoi ner lâk tâk na! Tuipui neh tuikhanglian inthûk takhein, “Naiha isê khom tuang ngai mang a, nai khom nei ngai mang e. Nainu manih, naipa manih khom don inlian ngai mang,” itin nang an phial tâk a.

⁵Tura siat thu hih Aigupta mihein an riat tenan chu an ringai rikhêlin an idang ichek vong vong an ti.

⁶Foiniki mihei o, ringaiisian irung vong vong rei. Tarsis tiang lâizâm tho rei.

⁷Amahih na, tianlâi ata khua rilun neh khua risong tak tak ngai Tura khua chu ai nit na? Tuipui râla khua thar isât ranga mi tir ngai khopui chu na?

⁸Rêng iṭhungna khopui, a rivai itho mihei khom roinpui tak tak, ram tina an riming inthang tak tak Tura chunga thil itlung hih tu itho mani?

⁹Tinrêngthothei PUMAPA itho a nit. Ani khan an thiltho roinpui an isong tak tak intlôm pêk a, an mi marit omhei mualphoi isak pêk kha ai tum a nit.

¹⁰Tarsis mihei o, rikuang ringam mun nei khâi mak chei u; khasikin, Nail vadung thluan angkan nin ram khah tukilet ta rei.

¹¹PUMAPA khan tuikhanglian chungah khom a kut â lek a, rêngram itam takkah ân nîng tâk a. Foiniki mihei munpui isehchit rangin PUMAPA khan thu a pêk tâk.

¹²Ani khan, “O Sidon khopui, ni lômna a mong tâk a, ni mihei isirden an om tâk. Kupra dênin lâizâm tho khom inla, kha mun khomah khan zôk ual no tin e,” a ti a.

¹³Tura khua, ramsahei lêngna ranga siamtu chu Asuria ni loiin, Babilon hi a nit. Khua hualin in risâng an sin a, a kulbanghei kha an isim a, khua chu a ramin an sia tâk a.

¹⁴Tarsis rikuangpuhei o, irung vong vong rei, nin ringatna tak khopui chu a siatchit tâk.

¹⁵Khatikin chu rêng khatka inlal hun sung kum sômsarika sung chu Tura khua hih tutên reh khâi no nih. Kum sômsarikah a hek nungin Tura chu hi nochizuar lâ angkah hih nîng a ti:

¹⁶Tutên an iriat khâi ino nangmah nochizuar, Perkhuang ichôiin khua rifang nôk inla; Inperin ni lâ sak nôk roh, Khanchu, mihein nang reh nôk thei an ti.

¹⁷Kum sômsarikah a hek tenan chu, PUMAPA khan Tura khua khah ithlo nôk a ta, a lei isin ngaingir khah insin nôk a ta; rammual mun tinah rivai tho nôk a ti.

¹⁸Rivaia ai lo suak khah PUMAPA ta rangin ilan nîng a ti. Ithupin rê no ni a, PUMAPA chubai iûn ngaihein fâknêk neh silbom richona rangin mang an ti.