Read Biete ISAIA 24 Bible Online

ISAIA 24 - Biete bible

ISAIA 24

¹PUMAPA khan rinêng hih inrong a ta, a înram val rang a nit. Ikhup thak a ta, a sunga lênghei chu chekindar riai a ti.

²Mi vântlâng neh thiampu, suak neh a pu, suak nungâk neh a pi, thil izuartu neh archotu, artângtu neh ân ritângtu, richong neh inriang, an rêngkan an tuang ri-ang nat a ti.

³Rinêng hih koidar a ta, ram val a ti. PUMAPA khan a ti tâk a, itho khom ai nit ngêt rang a nit.

⁴Rinêng hih châr a ta, hong ṭuai a ta, rammual chu beidongin rizal a ti. Nuaia neh vân khom ngûi riai a ti.

⁵A sunga lênghein rinêng hih porinchen an siam a, Pathian dânhei zôm mak a, thupêkhei ôi mak a, kumkho thuthlung ngaisak mak a.

⁶Khasikin, Pathianin rinêng chu vâni a sâm tâk a, a sunga lênghein an sual man an ituang tâk a nit. Khaangkan rinênga mihei chu an rikâi tîr tîr a, iroichekah bang â ring an nit tâk a.

⁷Grep kung chu a thêm zoi a, uain khom a khatinvâng tîr tîr a, râifân takka om ngaihei khom an ngûi zoi tâk.

⁸Khuang isuka râifâna lâma khêk irî ân thim zoi tâk a, perkhuang irî khom ireh rang om khâi mak.

⁹Uain in zoroa râifânna lâ sak om khâi mak a; zu thlum an in khomin a khâkin an riat zoi tâk.

¹⁰Khopui sung chu lungzîngin a buai zoi tâk a, zôkna rangin mihei an inah an rikal khap zoi tâk.

¹¹Uain iin rang a om khâi no sikin mihei khan kotsuaheiah an ikhêk a. Râifânna rang rêng rêng om khâi mak a, nuai lômna khom a boi zoi tâk.

¹²Khopuihei chu a siat chit tâk a, kul kotbâi khârhei khom ito siatin a om tâk.

¹³Rammuala lêng nam tin chu â râ soiiṭhul vang tâk oliv kung neh â râ rimal riai tâk grep kung angkah hi la nîng an ti.

¹⁴A la dam isunhei chu lômin ipâi an ta, nithlâk tianga omhei khan PUMAPA roinpuizia chu ikhêkpui an ta,

¹⁵nisua tianga omhei khan PUMAPA chu chôiinrisâng an ti. Israelhei Pathian, PUMAPA riming chu tuipui rikama omhei khom khan inpâk an ti.

¹⁶Kôlkomonga rithokin mi dik nam Israelhei inpâkna lâ chu iria nîng a ti. Khannisela, ki ta rangin itûng rang omak e. A ner zal tak tak tâk a; ne phialtuhei khan an ne phial mai a, an ne phial dân khom ai natinsat ual ual a nit.

¹⁷Nuai mihei o, ringai rei. Thil inrît tak hong tlung a ti, dîp neh chângin nangni a lei ngâk ṭian.

¹⁸Thil inrît tak iṭia tlânhei kha dîpah ṭul an ta, dîp ata hong rivâk suakhei khah chângah iôk an ti. Vântukvera rithokin ruasângsari zuang sûr ngûi ngûi a ta, rinêng ringatna khom inîng a ti.

¹⁹Rinêng hih kak a ta, koi risam phut a ta, inîng dût dût a ti.

²⁰Zu inrui angkan inîng diai a ta, rua neh phâivua tho zoroa iṭu angkan risoi diai a ti. Rammual hih a sualna khan a bûk inê tâk a; ilîr a ta, thoinôk tlak khâi no nih.

²¹Khatikin chu chungtiang sinthotheinahei neh nuai rênghei PUMAPA khan kuttum ai tho rang tâk a nit.

²²Mi tânghei khursunga khum angkan rênghei chu khum a ta, kuttum a tho nikhua a tlung mâkah khum ipip khap a ti.

²³Ithla chu zîng a ta, inî vâr khâi no nih; Tinrêngthothei PUMAPA chu inlal tâng a ta, Zion tlâng, Jerusalemah khan roirêl a ta, mipui ruaituhei khan a roinpuizia chu mu tâng an ti.