Read Biete ISAIA 26 Bible Online

ISAIA 26 - Biete bible

ISAIA 26

¹Kha nikhuaah khan chu hi lâ hih Judai rama sak an ti: Khopui idet tak ei nei a, Amah Pathian ngêiin a kulbanghei ai rung a nit.

²Khopui dâikothei iong unla, Nam iamomhei chu hong lût riseh. Thil idik itho ngai nam chu.

³PUMAPA idet takka nangmaa ringathei chu thlangam takkan nen om ngai.

⁴PUMAPA chu kumkhuakan iam ngit rei, PUMAPA chu kumtluanga zôkna lampui a nit.

⁵Mi lârripâkhei ân tlôm tâk a, An omna khopui idet khom â siat chit tâk a, A banghei khom rinêngah ân riphe pêk zoi tâk.

⁶Atûn chu kha munah khan mi isirphûma omhei khah, An nuam nuamin a chungah an lôn a, An kehein an siririal neng tâk.

⁷PUMAPA mi felhei lampui chu ni siam inhoi a; An inzinna lamilian chu a ircham a nit.

⁸Ni nuamlam izômin ni chungah kin tûngna kin ringat a, Kin lungril irzuk tak chu nangmah ni nit.

⁹Zânah ki lungril murdin nang ker ngai tak tak ngai a, Rinêng neh a sunga mihei roi ni rêl tikin chu, Roirêlna dik chu îm ai nit rethiam tâng an ti.

¹⁰Mi pualoihei chungah ṭha khom inla, Thil iṭha sin rang tum tlak mak e. Mi felhei rama lua khomah hin thil dikino an la sin a; Ni roinpuina chu imu nuam mak e.

¹¹O PUMAPA, kuttum itho rangin, An chungah ni kut ni îlek rang a nit iti ne râlhein reh mak e. O PUMAPA, ni mihei ta ranga, Ni ṭhatnem ringaizia in mun la, mualinphoiin om riseh. Ne râlhei ranga ni înrifûk meiah khan kâng rivâm riai riseh.

¹²PUMAPA, nangman râlringamna ne pêng ni ti; A nit, kin itho murdi khom hih, Nangma ne itho pêk zoi vang a nit.

¹³O PUMAPA kin Pathian, rêng danghei kin chungah an inlal ngai a, Nikhomseh, nangmah bang hih kin PUMAPA chu ni nit.

¹⁴Atûn chu an thi tâk a, ring nôk khâi no ni a, An rithla khom hong thoinôk khâi no nih. Nangman kuttum ni tho a, ni înrimang riai tâk a nit. Tutên anni chu remai khâi no nih.

¹⁵PUMAPA kin nam ni nen thuar pêk a, A ramhualhei kil tinah ni nen rizat pêk a, Hi sikah hin chôiinrisângin nî om tâk a nit.

¹⁶PUMAPA, ni mihei kuttum ni tho a, An lungdongin ni ziangah an ṭongṭai ngai a.

¹⁷Nupang naiha isêa ṭap angkah hin, O PUMAPA, ni mah hin keini khom ni ne înrung a nit.

¹⁸Kin nat a, kin irung a, Khanniseh, îte keimani ata suak omak, Kin ram rangin nêna khom chang ma ung a, Îte itho zoi thei khom nei mang ung e.

¹⁹Ni mi a lei ithi tâkhei kha ring nôk an ta, An takpumhei kha hong ring nôk a ti. Ithlâna zâltâkhei hong har nôk an ta, Râifân takkan zâi an ti. Nâ thêm, ridofîmin a înhar nôk ngai angkan, Â thi tâkhei khom PUMAPA khan zuang inhar nôk a ti.

²⁰Ki mihei o, insung rila lûtin, inkhâr rikal khap unla, Pathian ningmur arkiang mâkah chu ribih ṭian rei.

²¹A omna rivân ata PUMAPA chu rinênga mihei an isual sika kuttum itho rangin ai zuang a nit. Rinêng chunga rithatna inrûkka ithoa omhei khah inlang suak ni tâng a ta, nuai hin ithata omhei ruak khah thup khâi no nih.