Read Biete ISAIA 27 Bible Online

ISAIA 27 - Biete bible

ISAIA 27

¹Kha nikhuaah khan chu PUMAPA khan a khandai ilian neh ingaih tak khah Leviathan tui rûlpui rivâk zun zun, Dragon rikin thuang thuang kuttum thona rangin ilek a ta, that a ti.

²Khatikin chu PUMAPA khan a grep rikul ditiom tak thu hingka hin tîng a ti:

³“Keimah, PUMAPA hih â rungtu ki nit a, tik zoro khomin tui ki buak mai a; tutên an tôn nona rangin asûn azânin kî rung ngai a nit.

⁴Grep rikul chungah ki ningthik khâi mak a, ṭuan infâi rang riling neh ibuar lei om khom sela, kî hâl inrivâm vang mai rang a nit.

⁵Khanniseh, an irâlhei khan ki vênginzôk an nuamin chu keimah neh ringeina siam riseh. A nit, keimah neh ngêi ringeina an siam rang a nit,” itin.

⁶Tik zoro tenan manih chu Jakoba richi, Israelhei kha thing angkan rizung thla nôk an ta, hong rimuamin hong pâr ivût a ta, rinêngah an irâ sip a ti.

⁷PUMAPA khan Israel chu an irâlhei kuttum a tho dôrkah chu kuttum tho mak a, an irâlhein mi an ichân dôrkah khom mi ichân mak a.

⁸PUMAPA khan suaka tâng ranga tir isuan a mihei kuttum a tho a, sak ithli rât a închôi pai tâk a nit.

⁹Khanniseh, nam dang mâichâm lunghei khah chinai lung angkah taka an nôi indi a, Aseri rilim neh ribôlna lunghei an pai infâi vang tikah Israelhei sualna chu izâ nîng a ti.

¹⁰Khopui kul ineihei chu a chim zoi tâk a, khoram a chang tâk a, ramkâr angkah a nit tâk. Ranhei lêngna mun, an fâk zongna neh an riakna mun a hong nit tâk.

¹¹Thing iṭanghei chu a ṭongin a kiak zoi tâk a, thing thua mang rangin nupanghein an rikit tâk. Anni chu îte riatthiamna nei ino nam an nit a, Pathian anmani siamtu khan lunginkham no ni a, ditsak viat no nih.

¹²Kha nikhuaah khan chu PUMAPA khan Eufratis vadunga rithoka Aigupta ramrî dênin, bu arsi neh a tak îthlei angkan a mi Israelhei chu khat khatkan lôr bûm a ti.

¹³Khatikin chu bekulpui mût an ta, Asuria rama armang ṭian tâkhei neh Aiguptaa ûmrizûla om tâkhei chu hong kîr an ta, Jerusalem tlâng rithiangah khan PUMAPA chubai ûn an ti.