Read Biete ISAIA 28 Bible Online

ISAIA 28 - Biete bible

ISAIA 28

¹Israel rêngram chu a chung ân khôk e! A roinpuina chu ruaitu zûnruihei lu chunga pâr rênglukhum angkan ai ṭuai thiai mai tâk a nit. An ripâkna luhei chu namhoi riuai lil khom seh zûnruin an îtâl ṭian mai a nit.

²PUMAPA khan anmani doi rangin mi rât neh ihâi a nei thlâm tâk a, irial itho angkan neh thlipui neh ruapui isûr ngûk ngûk angkan neh tui ilian ritha râttak angkan an ram hong inuai an ti.

³Ruaitu zûnruihei ripâkna chu isir phûmin om a ti.

⁴Theichâng irâ masa tak chu a min kaneh rimala ifan rimang zel ai nit ngai angkan ruaitu zûnrui ripâkhei roinpuina ṭuai thiai chu boi zel a ti.

⁵Khatikin chu Tinrêngthothei PUMAPA ngêi chu, â thi bân izôka la omhei ta rangin rênglukhum roinpui neh lukhim enihoi tak ni tâng a ti.

⁶Roirêltuhei chu roirêl thiamna pêng a ta, khua rungtuhei chu irâl lei idan ranga ihâina pêng a ti.

⁷Zânthlahei neh thiampuhei tena lua khom uain neh rakzu inin hong pêm an pêm a, lungrivak loiin an îlîr lôk lôk a nit. Zânthlahei chu inlârna an imu reh thei loi rakkan an inrui a, thiampuhei khom an zianga thu hong itlung rêl thei loi rakkan an înrui a nit.

⁸An iṭhungna docham chung chu iluakin a sip a, a fâina mun zel omak e.

⁹Anni khan an ne sêl a, “Tu tak im ireh ranga inrisei ai tum hi? A thucha khah tûm â nang a? Naite rinu nêk ibâng chak ta rangin a înrup bak a nit.

¹⁰A ṭongbâi bâite, a ṭongthluan thluante, a bung bungte a, nen risei ai tum hi?” an ti a.

¹¹Ki thu nin ringai non chu PUMAPA khan nam dang, ṭong â ti intak tak imang ngaihei imangin nangni a înrisei rang a nit.

¹²Takidam taka ringam riam rangin nangni a koi a; khanniseh, ringai pêk nuam ngai mak chei.

¹³Kha sik takah khan kêng PUMAPA khan a ṭongbâi bâite, a ṭongthluan thluante, a bung bungtehein nangni a înrisei rang a nit. Khanchu, nin kal phêt tinah ibâ tâng nin ta, popliam tuang nin ta, inên om nin ta, itâng rang tâkin iṭhui pai nîng nin ti.

¹⁴Jerusalema om, ki mihei chunga roirêltu ripâkhei o, PUMAPA iti hih ringai rei.

¹⁵Thina neh thu kin thlung tâk a, mithi khua neh ṭong kin rikhit tâk. Intakna tui hong lian khom seh, ne chîm phâk no nih, rilêmna kha ribêl takin ei nei a, milakna kha ribîkna rangin ei nei tâk itin nin risong a.

¹⁶Khasikin, atûnah hin PUMAPA Pathian khan, “Ringai ta, Zionah lungphûm idet tak neh â khir tak ki phûm tâk a, amakhan lungfîm â kila lung khom kî sia tâk a nit, kha lungah khan, ‘Â iam ngam chu inîng no nih,’ iti riziak a nit.

¹⁷Roirêlna dik chu a lungphûm rikhîna rui nîng a ta, dikna chu a thîrlûm ikhâina rui nîng a ti,” a ti a. An ringatna milakhei chu irialin dêng iseh riai a ta, an ribîkna khom tui ilianin fen inrimang vang a ti.

¹⁸Thina neh nin thuthlung chu inboi nîng a ta, mithi khua neh nin ṭongrikhit khom iṭhet nîng a ti. Intakna tui a hong lian tenan chu ilîr phar nin ti.

¹⁹Zîng tin nangni hong inuai mai mai a ta, sûn zân rizomin hong lian mai a ti. Pathiana rithoka thucha thar tinin thlavâina thar zuang ithlun a ti.

²⁰Thuvârin, rithluangna ranga tôi rei zâlmuna zâl a, rituamna ranga puankhang ichîn rei isil mi ai ti angkah hi a nit.

²¹Perazim tlâng neh Gibeon phâia angkah khan PUMAPA chu thoi a ta, a thiltum rikhêl tak tak neh a sintum inril tak tak chu zuang sin zoi a ti.

²²Rilna nangni kî pêk hih nuiza siamnan mang no rei. Nin mangin chu nin ta rangin â zôk a întak ual rang a nit. Tinrêngthothei PUMAPA khan ram pumpui isehchit rang a tum thu a rêl infel tâk iti kî riat a nit.

²³Ki ṭong hih ringai unla, nin ikuar sung unla, nangni ki îril hih nin lungril peh rei.

²⁴Loi neituhei khan chimu thona rangin rinêng hih itukin an îrît kumkhua rang mani?

²⁵Rinêng kha an tuk indi zoiin chu lênghûmhei neh roikokhei an rithe ngai a. A rân rânin bu neh barli an rithe a, loi vâikôm idepah chimu dang an isong sa ngai a nit.

²⁶An sintho rang dân khah an iriat a nit, ân riseitu chu Pathian a nit.

²⁷Lênghûm ru manih, lêngisêr ru manih ito ṭhul rangin rolpui mang ngai mak a, kha nêkan chu artlukpui irol izâng an imang ngai a nit.

²⁸Armal ikoi rak rangin bu itoh ngai mak a, farmal rikhek tak loia sakor tâli inchîl dân an ithiam a nit.

²⁹Hi vârna murdi hih Tinrêngthothei PUMAPA ipêk a nit. Pathian thil rêlhei chu a vâr tak tak a, lo a tluk ngêt ngêt ngai.