Read Biete ISAIA 29 Bible Online

ISAIA 29 - Biete bible

ISAIA 29

¹O Pathian mâichâm, Jerusalem, Davida omna khopui idet, ni chung ân khôk vang na! Kumkah kum inikah hong vun sela, kûthei neh ruaiṭhehei khom lei hang mang nôk hi ta u.

²Khanungchu, Pathian khan Jerusalem, “Pathian mâichâm” an iti ngai chungah hin vânduaina ithlun a ti. Iṭap neh irungna om a ta, khopui sung murdi chu mâichâm chung thisenin a irkhû ngai angkan thisen chok pum a ti.

³Pathianin nang idoi rangin nang hual a ta, ner khîlkan rinêng vur inpông a ta, nang hualkhap tâng a ti.

⁴Jerusalem chu inlîrin om ni ta, rinêngin nang rikhû a ta, ni ṭong hong isuak kha ipil kârah irî viat viat a ti. Ni rôl chu rinêng ata ithirthla rôl angkan hong suak a ta, ipila rithokin ni ṭong chu hong irî rian rian a ti.

⁵Jerusalem, ram dang mi nang hong idoituhei chu ipildi angkan sêm inrimang nîng an ta, an sipai inrît tak takhei khom farsi ithlîn ai sem inlêng angkah hin sêm inlêng nîng an ti.

⁶Tûngno kârin tukvakkan Tinrêngthothei PUMAPA khan thlipui neh ninupui imangin nangni inzôk a ti. Ani khan thlisim neh meichok natinsat tak zuk tir a ta;

⁷khanchu, Pathian mâichâm khopui, Jerusalem idoitu nam dang sipai lômhei chu an râlthlukhei neh an tinmatua tinrênghei neh khan zâna thil ingaitua, rimanga phan â boi nôk zel ngai angkah hin rimang vang an ti.

⁸Voniṭâm takkan rimang tiang bu a lei nêk a, a hang har a, ai khop ual ino angkan neh tui rihâlin rimang tiang tui a lei in a, a hang harin chu a tui a la irhâl mai angkah hi Zion tlâng ihualtu nam dang sipaihei chu la nîng an ti.

⁹A nit dân reh loiin ringai inrikhêl unla, nin mit idelin mu thei loiin om rei. Uain in loiin inrui ngit unla, rakzu zungka lua in loiin hong pêm pêm diai rei.

¹⁰PUMAPA khan inrimut suak ngôi ngôina, in thlar thlar nuamna nin chungah a hong iṭhum tâk a. Zânthlahei chu mipui mit an nit rang a nit a; khanniseh, an mit ai tuam pêk tâk a nit.

¹¹Nangmani ta rangin chu inlârna thuhei murdi hih lekhazuat inriman khap sunga thu angkah ni tâng a ti. Lekha tep ithiam ziangah, “Ngaihoiin ne tep pêk ta,” itin chôi khom unla, ani khan “Inriman khap a nit a, tep thei no ning e,” lei tîng a ti.

¹²Lekha tep thiam ino ziangah, “Ngaihoiin ne tep pêk ta,” itia nin pêk lakin, “Lekha tep thiam mang e,” lei tîng a ti.

¹³PUMAPA khan, “Hi mihei hin an bâi bangin an ne hong nâi ngai a, an mûrhei bangin an ne chôiinrisâng ngai a; khanniseh, an lungrilhei chu a ne ilat vit a nit. Chubai an ne ûnna hi miriam inriseina dân banga ringat a nit.

¹⁴Khasikin, hi mihei chungah hin iam ino tak thil sinrikhêl danglam tak chu thông ki ti. An mi vârhei vârna chu boi a ta, an mi thiamhei thiamna chu boi tâng a ti,” ai ti a nit.

¹⁵PUMAPA rithoka an thiltho tum ithuptuhei chu an chung ân khôk vang na! Inrûkkan thil an itho manih isônin, “Tûm a ne mu rang a? Tûm a ne reh rang a?” an ti ngai a.

¹⁶A letiang thil an ilâk a nit hi, bêl hin â vuaktu ai tluk thei rang mani? Miriam ziangah a thil siam khan, “Ni ne isiam ni mang e,” ai ti pêk thei rang mani? Anitnole thil inrifoma om khan ân rifomtu ziangah khan, “Nî sin hih nî riat ino a nit?” ai ti pêk thei rang mani?

¹⁷Sôt inote sungin Lebanon rampui chu loi iṭha chang a ta, loi iṭha tak khom rampui chang nôk zel a ti.

¹⁸Khatikin chu kuarisêthei khan lekhabu rizuat tep irî reh thei an ta, izîng richela om mit ichohei chu meng an ta, mu thei tâng an ti.

¹⁹Inrianghei neh risamhei chu PUMAPA, Israel Pathian rithianga ipêkah khan râifânin lôm nôk tâng an ti.

²⁰Mi nunterhei neh Pathian musittuhei rimang vang an ta, mi sualhei murdi khom inrimang vang nîng an ti.

²¹Mi danghei mi suala be ngai, roirêltuhei dik loia roi inrêl ngai, thu chanlamboia mi dik intuang ngaituhei chu Pathianin inrimang vang a ti.

²²Abrahama sanisuatu PUMAPA, Israelhei Pathian khan hingka hin Jakoba insungkua thu â sîr a: “Ki mihei, mualinphoiin om khâi no tin u a, nin mâi khom izakin môk khâi no nih.

²³Nangni kî pêk nin naihei khah nin mu kipah keimah hi Israelhei Pathian rithiangah chu ki nit iti riang nin ti. Ker ming chôiinrisâng tâng nin ta, Jakoba Mi Rithiang hi marit nin ta, ki maah iṭi pumin ngîr nin ti.

²⁴Rithla tianga vâi rimanghei khomin riatthiamna nei tâng an ta, riphun irâthei khomin inriseina ipom nuam tâng an ti.”