Read Biete ISAIA 3 Bible Online

ISAIA 3 - Biete bible

ISAIA 3

¹Atûnah hin PUMAPA, Tinrêngthothei PUMAPA khan Jerusalem neh Judai rama rithokin an ringatna thil tinrêng neh mi tinrêng ai lâk pêk thiai tâk a nit. An ringatna bu neh tuihei,

²an râlpahei neh râltuk mihei, an roirêltuhei neh zânthlahei, thlasân ithiamhei neh an milianhei,

³an sipai ruaituhei neh vântlâng ruaituhei, an roisaktuhei neh dôi thiamhei an rêngkan ai lâk inboi thiai tâk a nit.

⁴An ruaitu rangin PUMAPA khan naipang phun pêk a ta, an chungah naipang môlrimithein roirêl an ti.

⁵Mihei kha ri-epdêng an ta, pa neh pa risual an ta, rual neh rual khom risual an ta, vânglâihei khan an chungah ulianhei marit thona châng reh khâi no ni a, mi îte ninohei khomin mi lianhei marit tho khâi no nih.

⁶Panam khatkan an panam lâia mi khatkah rithlang an ta, a ziangah, “Nang chu silbom khom ni nei hi te, kin ruaitu chang inla hi buaichitna hi ni kutah om riseh,” la tîng an ti.

⁷Khatik tenah khan ani khan lei rikhal a ta, “Hihei hih bôlindam thei no ning e, fâk neh silbom khom nei ual mang, mipui ruaitun chu ne siam no rei,” lei tîng a ti.

⁸Jerusalem a chim tâk a, Judai ram khom â sia a nit tâk e. PUMAPA sêlin an ṭong ngai a, thil an tho ngai a; a roinpuina kha an imusit ngai sikin a nit.

⁹An voirivatah an idiknozia â lang a, Sodom mihei angkan an isual mualinphoi tâk a, rithup zoi khâi mak. An chung ân khôk e, mahni chungah siatna an îthlun a nit.

¹⁰Mi ṭhahei ziangah khan, “Nin thon ṭhat e. Nin sintho râ la fâng nin ti,” ti unla;

¹¹Mi sualhei chung chu ân khôk e, la sehchit an ta; an thiltho angkah takin an chungah khom itho pêk nîng a ti.

¹²Sum inritângtuhein ki mihei an sirde a; an sum ritângtuhein ki mihei an ilêm a nit. Ki mihei o, nin ruaituhein nangni an iṭhui inrimang tâk a nit, fena rang khôk reh loiin nin ibuai tâk a nit hih.

¹³A mihei siat inlangsuak rangin PUMAPA chu arzoi a, an chungthu rêl rangin â ding suak tâk.

¹⁴PUMAPA khan a mihei lâia upahei neh ruaituhei chungthu a hang rêl a, “Nangmani hih grep rikul inram zoitu chu nin nit, mi inrianghei thil nin ilâk khah nin inah nin bûm insip a.

¹⁵Îtho sika ki mihei hih hingkana nin isirde a, mi inrianghei neisun nin ilâk pêk ngai mani? Keimah, PUMAPA, Tinrêngthothei PUMAPA hin kî ti a nit,” a ti a.

¹⁶PUMAPA khan, “Jerusalem nupanghei chu an ripâk vang na! An iṭâng iphoi pumin an lôn a, mi an mel vêl a. Kebun selniang irî sak sak kan an ke an itet tlik a.

¹⁷Nikhomsela, Zion nupanghei chu kuttum thông ki ta, an lu inpân pêk ki ta, sam iboiin om an ti,” a ti a.

¹⁸Kha nikhuaah khan chu PUMAPA khan an rivona ṭhahei lîp pêk a ta; Kebun selniang hei, lukhim hei, ṭhimkual hei,

¹⁹kuarkâi hei, bânbun hei, mâi rikhûna hei,

²⁰samkhit hei, bânkhuap hei, kongkhithei, namhoi bûr hei;

²¹kutsabit hei neh nârbet hei,

²²zakorfual hei, puan hei, chungzakua hei, choli hei,

²³lîmen hei, puan riphân hei, lukôm hei, dârbât hei an rêngkan lah pêk riai a ti.

²⁴Namihoi rithûlin nam isia, kongkhit rithûlin ruiirual, sam tol rithûlin lu kol, ṭângvêl puan enihoi rithûlin borapuan, mêl ṭhat rithûlin mêl isia kha an dongtum ni tâng a ti.

²⁵Khopuia mihei, a nit, pasalṭhahei khom râltuk bualah khandaia sât that nîng an ti.

²⁶Khopui kotsuahei kha beidong neh iṭapin sip a ta, khopui khom khah nupang korongboia rinênga ṭhung angkah ni tâng a ti.