Read Biete ISAIA 30 Bible Online

ISAIA 30 - Biete bible

ISAIA 30

¹PUMAPA thusuak khan, “Ki chunga rihel isong Judai ram roirêltuhei chung chu ân khôk e. Ki roisak nino angkan thil an tho a, ki thu ni loiin rualrichanna an siam a, an sual chungah sual an bôksa ngai a.

²Ki roisakpuina zong loiin Aiguptaah an zu fe a, Faroa chu an zôkna rangin ribêl an tum a, Aigupta rêng dâilîmah ribîkna zongin an fe tâk a.

³Faroan a inzôk ini khah an izakna rang la nîng a ta, Aigupta dâilîm an irbêl chu an mualinphoina la nîng a ti.

⁴An palâihei khan Aigupta khopui Zoan neh Hanes lei tlung ta khom sela,

⁵rifena an imupui ino rang nam an ribêl sikah khan mualphoiin la om an ta, nam mangmunboi, anmani lei ṭangpui thei inohei sikah khan izakin mualinphoi an ti,” ai ti a nit.

⁶Sim tianga ramchâra ramsahei chungchânga Pathian thucha chu, “Ram inkhôk neh iṭiom sakeibaknei lêngna, sokngân neh rûl ivuang thei tamna ramah, an richonhei chu sakuartung an inpêl a, an sumhei chu saringsei vaâkchuangah an bâng a, rifena an imupui tlak ino rang nam kha an ipêk rang a nit.

⁷Aigupta chu mangmunboi a nit a, ṭangpui theina khom nei mak e. Khasikin, arming khah ‘Mi, innah theiino Rûlpui’ iti kî be tâk a nit,” a ti.

⁸Pathian khan fen la, mipui omdân kha riziakna phêkah riziak inla, an isualzia kha kumkhuaka riatmaina rangin lekhabuah riziak inlût roh.

⁹Pathian chungah an rihel mai mai a, milak itho an rât a, PUMAPA inriseina tiang an ikuar sung nuam tlak ino nai helâkloi an nit.

¹⁰Mutuhei ziangah, “Mu ṭian ṭian no rei,” an ti a. Zânthlahei kha, “Nin imu thudik kha ne ril khâi no rei, kin irngai nuam thuhei ne ril unla, ningbei taka kin om theina rang bang ne sîr pêk rei.

¹¹Kin lampui ata rikiang unla, kin lam ne dan khâi no rei. Nin Israel Mi Rithianga thu hi isîr kêng kêng khâi no rei,” an ti pêk a.

¹²Khasikin, amahih Israel Mi Rithianga khan ai ti a nit, “Ki thu nin musit a, zâlrât imanga vârrilet taka tho hi nin rithlang tâk a, ringatna takin nin inei tâk a nit hih.

¹³Hi thil isual hih nin tho sikin lung bang risâng tak, ikaka puak chit, â chim lôk lôk angkah nin nit tâk; voikazelin chim rum nin ti.

¹⁴Idîn viat loia ipilbêl ito khoi, mei ri-al chôina ranga inrup a korok, tui thâlna ranga inrup lek ilian khom om loi rakka tôk inrinôi angkah hih nîng nin ti,” itin.

¹⁵Amahih Tinrêngthothei PUMAPA, Israel Mi Rithianga iti chu a nit, “Hong kîr unla, idâiriamkan ne iam unla; khanchu, zôk nin ta, nin rithla ringam a ti,” a ti a. Khannisela, nuam mak chei a.

¹⁶Nin nuamno lam angkan sakora chuanga lâizâm itho nin tum a. A nit, lâizâm chu nin itho ngêt rang a nit. Nin sakorhei kha itlân irât okkan nin be a; khanniseh, nangni rizûltuhei sakor kha rât ual a ti.

¹⁷Nangni doituhei sipai khatkah iṭi sikin a sâng têl lâizâm thông nin ta, pasal ringaka ṭi sikin nin rêngkan lâizâm tho riai nin ti. Itlângsîp taka nin ritlek ngul ti no chu nin sipaihei tute om khâi no nih.

¹⁸Nikhomsela, PUMAPA khan a lungkhamin nangni a la ngâk a, PUMAPA chu roirêltu dik Pathian a nit sikin lung nangni inkham ai nuam mai a nit. PUMAPA ngâktuhei chu an ham a ṭhat e!

¹⁹Nangmani, Zion tlânga mi, Jerusalem khuaa omhei o, ṭap nôk khâi no tin u. PUMAPA chu mi lunginkham thei a nit a, ṭangpui ingêna nin ṭap tenan chu nangni sâm a ti.

²⁰PUMAPA khan intakna neh lungzîngna nangni intuang man sela, amah ngêi nangni inriseitu changin om a ta, nin mu phâkah om mai a ti.

²¹Changtiang manih, voitiang manih, nin pêt rang khomin, “Amahih lam dik chu a nit, hin lôn rei,” nin inungah hong ti mai a ti.

²²Nin tangkaruaa tuam neh rângkachaka ituam mirmilhei chu porinche tîng nin ta, itiriom itin la pai indar nin ta, “Ki mitmuah om khâi no riseh,” la tîng nin ti.

²³Loiah chimu nin tu khomin PUMAPA khan rua nangni inmôk pêk a ta, hong ithuarin iṭha takkan hong irâ dêl dûl a ti. Nin ran lômhei rang khomin sûl iring mun tam a ti.

²⁴Nin serâtchalhei neh nin sakuartung âl ikâia nin imanghei khomin bupôl zen infâi liai itui tak fâng an ti.

²⁵Nin irâlhei rivât riai an nit a, an kulhei a chim riai tikin chu tlâng risânga rithok neh mualipônga rithokin vakorongheiah khan tui luang hûl hûl a ti.

²⁶A mihei â tôkna sâbehei a tuam pêk a, an sâbehei ân dam pêk tikin chu ithla khi inî dôrkah vâr tâng a ta, inî khom khi a bâk sarikan vâr a ta, sûn sarika sunga a vâr rang dôr itlukin vâr a ti.

²⁷PUMAPA sinthotheina neh roinpuina chu ilah taka rithok khomin imu thei a nit. Mei neh a khû ding ngut khan a ningthikna ân lang a. A bâi a âng a, a ṭongbâi suak chu mi kâng inrivâm ngai mei angkah a nit.

²⁸Ani khan a matonah tui ilian, tinrêng fen inrimang ngai angkana thlipui a tir a. Nam tin a chîm inrimang a, an thil isual phanhei khah ân ringam pêk tâk a.

²⁹Nikhomseh, nangni Pathian mihei chu kût rithiang nin mang nî masa zâna angkan ilômin zâi nin ti. Israelhei lungpui, PUMAPA tlâng ipana theile riuai lilka ilôm takka fe dûl dûl ngai angkan nin lungril chu lôm a ti.

³⁰PUMAPA khan a rôl roinpui tak kha inriang a ta, a ningthik kut iṭhum kha mi tinin mûng an ti. A ningmur meipui chok luai luai a ta, rua neh phâivua thông a ta, irial ṭul ṭuk ṭuk a ta, ruasângsari sûr a ti.

³¹Asuriahei khan PUMAPA rôl an riat tenan chu iṭin inthing an ta, PUMAPA khan a rêng irolin itôn lîr riai a ti.

³²PUMAPA khan Asuriahei chungah a kut â ṭhum mai lâiah khan a mihei chu khuangte neh perkhuang isukin zoro lei mang an ti. Pathian ngêi khan Asuriahei chu ai doi rang a nit.

³³Zoro sôt tak ithleng tâkah khan Asuria rêng hâlna rang mun chu lei inrifûk diam tâk a nit. Ân thûkin arzat a, thing khom inpông zuak tâk a nit. PUMAPA khan a hâlna rangin mei neh kât, tui iluang angkana luang zuang rithuak suak a ti.