Read Biete ISAIA 31 Bible Online

ISAIA 31 - Biete bible

ISAIA 31

¹Ṭangpuina zong ranga Aigupta ram ipunhei chung chu ân khôk vang na! Aigupta sipai rithaah an ringat a, an sakorhei, an tâlihei, an sakor chungchuang mihei râtnaah khan an irngat a nit. Khanniseh, Israel Pathian Rithiangah khan ringat nuam mak a, PUMAPA ṭangpuina khom zong nuam mak e.

²Ani khan a thil tho chu a riat a, thil ṭhano intlung dân khom a thiam a, a thu chu inrilêk nôk ngai mak. Thil ṭhano thotuhei chungah khan a kut iṭhum a ta, anmani ṭangpuituhei chung khomah khan a kut iṭhum a ti.

³Aigupta mihei chu miriam bang an nit a, Pathian ni mak e. An sakorhei khom sakeli bang an nit a, rithla nei ni mak e. PUMAPA khan a kut â lek tenan chu â ṭangpuitu nam irât khah chimrup a ta, ai ṭangpui nam idôkte khom ilîr a ti. Khanchu, an ruaikan isehchitin om seng seng an ti.

⁴PUMAPA khan ki ziangah, “Sakeibaknei a sa that ihaia ngur chu berapu lôm ribûm khêk irî neh rihu khan a înrot ngai ino angkah hin Tinrêngthothei PUMAPA, Zion tlânga zuang iṭum khom khan â tlâng Zion inzôk rangin îten khap thei no nih.

⁵Ivahein an ribu runga an ivuang diai ngai angkah hin Tinrêngthothei PUMAPA khan Jerusalem khua chu rung a ta, ikuamin ihoi a ti,” ai ti a nit.

⁶Pathian khan, “Israel mihei o, ki chungah isualin, nin rihel ok tâk a; nikhomseh, atûn chu ki tiang hong kîr nôk ta rei.

⁷Khatikin chu mi tukhomin nin insualpuina ngai, tangkarua neh rângkachaka siam mirmil, nin kut suakhei khah pai tâng nin ti.

⁸Asuria chu miriam khandai ninon sât inlîr nîng a ta, miriam rithaa mang nino khandai khan that a ti. Ridoina mun ata lâizâm tho khom sela, an tlangvâlhei chu suaka siam ranga man ni ngir an ti.

⁹An rêng chu rilônthing pumin lâizâm thông a ta, an sipai ulianhei khom iṭi rilônthing raiin an ritlekhei khom marak an ti,” a ti a. PUMAPA, Jerusalema chubai an iûn mai ngai, ribôlna ranga a mei ichok mai ngai, kha PUMAPA ngêi khan ai ti a nit.