Read Biete ISAIA 32 Bible Online

ISAIA 32 - Biete bible

ISAIA 32

¹Ringai ta, sûnkah chu rêng khatkah hong inlal a ta, diknan roirêl a ta, nam lupuihei khomin idik takkan rêl an ti.

²An rêngkah khan thlipuia rithoka ribêl rang neh ruapuia rithoka ribîkna rang angkah korong nîng an ta, ramchâra tui iluang angkah neh ram iṭôla lungpui dâilîm angkah nîng an ti.

³An mithei neh an ikuarhei chu mipui nangna tiang ri-ong tâng a ti.

⁴Lung rimotin om khâi no ni a, riatthiamna nei pumin sintho tâng an ta, an lungril tak khah an bâi khomin ril suak tâng an ti.

⁵Mi sual khan tute maritna lo no ni a, mi kuatinkam khomin tute ringai risângna lo no nih.

⁶Mi sualhei chu an ṭong pipai a, thil ṭhano tho rang an ngaitua ngai. An ṭongbâi suak neh an thil tho murdi Pathian êsêlna korong a nit a, voniṭâmhei khopna rang uksak ngai mak a, tui rihâlhei in rang tui khom an bun inbuak pêk ngai.

⁷Kuatinkamhei kuatinkamna chu ân thûk vang na! Thil isual isin hih an tum mai a, milaka inrianghei isehchit rangin an phan a, an dongtum pial idong rang khomin an khap ngai.

⁸Khanniseh, mi ṭhahei khan chu thil iṭha an ngaitua ngai a, diknaah khan an iding indet ngam ngai.

⁹Nuhei, lungkângna boia nunkhohoi imang ngaihei, thoi unla ki thu hi ringai rei. Nangmani, nungâkhei, lungringam takka omhei, ki thusîr hih ringai rei

¹⁰Nakum hingka tik tenan chu lungringam takka om ngaihei lân thing nin ti. Grep irâ rimal bûm rang om khâi no ni a, thei irâ rimal rang om khâi no nih.

¹¹Lungkângna boiin nunkhohoi nin lei mang ngai a, atûn chu iṭin inthing ta rei. Nin puanhei lîppai unla, korongin om unla, nin kongah borapuan ṭet khit rei.

¹²Nin rikul chimu ṭhat nuamna mun neh nin grep rikulhei a siat chit zoi tâk sikin nin iṭâng richûmin ṭap ta rei.

¹³Ki mihei loi chu ibuar neh rilingin â bô zoi a, khopui ihoi taka râiifân takka an omna inhei kha a siatchit tâk sikin ṭap tak tak rei.

¹⁴Rêng in ten ilua imarakin om a ta, khopui rilun tak khom iram valkan om a ti. A mualhei neh râlrungbûk in risânghei chu ram sakuartunghei lêngna nîng a ta, ran lôm fâk zongna mun nîng a ti.

¹⁵Chungtiang ata Pathianin rithla ei chungah a zuk bun tenan chu ram ipônhei kha ram ṭhatna mun hong chang a ta, chimu vângna mun neh theikung insâi rumna mun chang a ti.

¹⁶Ram pumpui tak munah khom ifel tak neh idik takka sin ni tâng a ti.

¹⁷Mi tinin idik takka thil an tho rang sikin thlangamna neh ningbeina om mai tâng a ti.

¹⁸Pathian mihei chu ningbei takkan om an ta, an in neh loi khom thlangam tak neh izôkriamkan lêng dîl dîl tâng an ti.

¹⁹Nikhomsela, rampui kha chu irialin dêng iseh vang a ta, khopui khom chim riai a ti.

²⁰Tui inrup takkan chimu thông nin ta, nin serât neh sakuartunghei sûl tamna munah izôkriamkan inlêng nin ta, nin rêngkan hamṭha ni tâng nin ti.