Read Biete ISAIA 33 Bible Online

ISAIA 33 - Biete bible

ISAIA 33

¹Ei irâlhei chung chu ân khôk e! Irok tong ngai inohei khan mi dang an irok a, ilêm tong ngai inohei khan mi dang an va lêm a. Khanniseh, mi dang an irokna zoro neh mi dang an lêmna zoro khah hek a ta, anmani ngêi irokin neh ilêmin om tâng an ti.

²O PUMAPA, lung nen kham roh. Ni tiang kin ithlîr mai ngai a nit. Zîng tin kin bânzâl ritha ni mai inla, lungzîng lâia kin saninringna ni roh.

³Nangman kin ta ranga irâlhei ni ne doi pêkin chu ni rôl khuaripui irî-ah khan namhei chu lâizâm an tho ngai a.

⁴Ikhâi intâm angkan irâl sumhei chu an richu a, irût bûm rangin an ibô sup sup a.

⁵PUMAPA chu a roinpui vang na! Tinrêng chungah roi a rêl a, Jerusalem chu dikna neh felnan insip a ti.

⁶Ani khan ram chu ân dingin det a. A mihei saninringna bulpui a nit a, vârna neh riatna bulpui khom a nit. PUMAPA ṭi hi an richon ilu tak a nit.

⁷En ta, pasalṭhahei chu ṭangpuina zongin tualah an ikhêk a; ringeina zonga palâihei kha an ṭap ngûi ngûi a.

⁸Lamilianhei ân thim vul a, khualzin mihei lampuia lôn ngam zel omak a. Thuthlung chu ikhiakin a om a, riatpuituhei khom imusitin an om a, tute marit tho mak e.

⁹Ram chu a châr a, ramthimin a om tâk a, Lebanon rampui a thêm vung tâk a, Saron phâi rinêng iṭha khom a ṭôl zoi a, Basan neh Karmel tlânga thingnâhei khom an ṭul zoi tâk.

¹⁰PUMAPA khan namhei ziangah, “Atûn hang châng ki ta, ker thaneizia inlang ki ti.

¹¹Chanlamboi thil nin inrifûk a, mangmunboi ringot nin îsua a nit. Keima rithla chu mei angkah a nit a, nangni ai kâng inrivâm riai rang a nit.

¹²Chinai lung hâl indîchit ngai angkan neh rilingbuk rivât inchâr ai kângrivâm ngai angkan hâl inrivâm vang nîng nin ti.

¹³Nangmani ilah taka omhei neh nangmani inâia omhei, ki sintho neh ki roinpuizia hih reh khai rei,” a ti a.

¹⁴Ziona om, sakhua ngaisak ino mi sualhei khah an rilo ân thing a, “Ei lâia tu hin im Pathian ningthikna mei â tuang zoi thei rang? Kumkhuaka chok mai hi tu ngân im â tuang thei om an ti?” an ti a.

¹⁵Idik taka thil itho a, thu dik irila nin omin chu zôk nin ti. Nin thuneina khah inrianghei leprûkna rangin mang no unla, nin kuthei khom fâkinrûk lâkna rangin mang no rei. Thisen isua ranga roi phanna tiang khom nin ikuar sung no unla, thil isual itho rang inrifûknaah khom ṭang no rei.

¹⁶Khanchu, mun risâng idet taka omin zôk nin ta, kulpui sunga omhei angkan zôkriam nin ti. Fâknêk neh tui iin rang khom risam tlak no tin u.

¹⁷Rêng ditom tak hong inlal chu mit ngêiin mûng nin ta, ram rizat tak chungah roirêl a ti.

¹⁸Nin râlṭi lâi sûnhei khah reh suak nin ta, “Riming ikoitu khah taktiang im ai om tâk? Siadôltu khah taktiang im ai om tâk? Dôngzon iteptu khah taktiang im ai om tâk?” la tîng nin ti.

¹⁹Kha nam dang mi nunterhei khah mu khâi no tin u. An rôl ûm ilian tak tak, ri-up zûl, an iti ireh thei nino, nin iriat thei ino ṭong imang ngaihei kha mu khâi no tin u.

²⁰Kût ei mangna ngai, Zion chu thlîr vêl unla, Jerusalem khua hi hang en ngân ta u. Izôkriamka omna mun ihoi tâk a nit tâk. Puan-in ihoi tak, rizôna ithîn ngai ino, a ngulhei khom iphâi thei pai nino, a ruihei khom chat tlak ngai ino angkah hi a nit.

²¹Amakhan, PUMAPA khan a roinpuina nen mûng a ta, tui tamna ram, vadung rizat neh vatedung pangah om ei ta, irâlhei rikuang hong lût thei no ni a, rikuang ilian rêng rêng hong ileng no nih.

²²Kha an rikuang puanzâr isuina ruihei arsût tâk a, a ngulah khan thlung indet thei khâi mak a, a puanzârhei khom kâiphar thei khâi mak e. Irâlhei sum murdi man pêk ei ti; a tam tak tak a, ke bâihei tena khomin rangtum nei an ti. PUMAPA ngêi chu ei rêng nîng a ta, ei chungah roi rêl a ta, aman ne hoi mai a ti.

²⁴Tu khom ei rama om kangân chu “Ne dam mak,” iti om khâi no ni a, an sualna murdihei khom izâ ni tâng a ti.