Read Biete ISAIA 34 Bible Online

ISAIA 34 - Biete bible

ISAIA 34

¹Nam tinrênga mihei hong rei. Hong ribûm unla, hong ringai rei. Rinêng neh a sunga om murdihei, hong unla, nin rêngkan ringai rei.

²PUMAPA chu namhei neh an sipai lômhei chungah a ning a thik a, inrimang phar rangin thiamno ân chang tâk a.

³An ruakhei chu ipai rang a nit a, iphûm rang ni mak e. Thu vung vung a ta, itlângah an thisen chu luang zun zun a ti.

⁴Inî, ithla neh ârsihei khom khi rimang vang an ta, rivân khi lekha zuat angkana rizuatin boi a ta, ârsihei khom khi theichâng nâhei neh grep nâhei ai ṭul ngai angkan ṭul a ti.

⁵PUMAPA khan rivânah a khandai ân rifûk diam tâk a, atûn chu ithat ranga ai sia thlâm tâk Edom mihei chungah zuang ṭum a ti.

⁶Ribôlna berate neh kêl thisen neh thâi angkah hin an thisen neh an thâi khan a khandai chu rikhû vang a ti. PUMAPA khan hi ribôlna hih Bozra khuaah lan a ta; Edom ram sungah hin a that rônna tak nîng a ti.

⁷Mihei chu ramsialchal neh achaltuai angkan ilîr an ta, rinêng chu thisen ivût pum a ta, an thâiin rikhû a ti.

⁸Ama zoro hi a nit, PUMAPA khan Zion a sanisua a, Zion irâlhei chunga phuba a lâk rang zoro chu a nit.

⁹Edom ram vadunghei chu alkatara chang a ta, â pilhei khom kât chang a ti. A ram pumpui chu alkatara angkah takin kâng a ti.

¹⁰Asûn azânin kâng a ta, a khû hong isuak chu ringam khâi no nih. A ram pumpui chu rikhûk itam takka dênin ram a ta, tute â thlo nuam khom om no nih.

¹¹Simbuhei neh vaâkhein lua tâng an ta, leilung insiang ma angkan PUMAPA khan iram val kan siam a ti.

¹²Ram chunga roi irêl rang rêng om khâi no ni a, ruaitu rang khom tute om khâi no nih.

¹³Riling neh ibuarhei kha rêng inhei neh kulpui inei khuaheiah mông a ta, sihalhei neh simbuhein om munin nei an ti.

¹⁴Ramsahei rivâk diai an ta, ramrilihei rikoi risak ngai an ti. Ṭâiramnu khomin amakhan ringam mun zong ata mu sâng a ti.

¹⁵Amakhan simbuhein ribu khor an ta, ritui an ta, a op inkek zoiin chu arthla nuai dâilîmah a têhei donsui a ti. Vasatelhei khom ama munah khan an riboppuihei neh ribuk an ti.

¹⁶PUMAPA lekhabuah zong inla, tep roh. Khatkate lua rimang no ni a, riboppui khom an inei chit a nit. PUMAPA khan thu a pêk tâk a, ama Rithla khan ṭhui bûm a ti.

¹⁷PUMAPA ngêi khan ram chu sem a ta, an dongtum chit peh korong a ti. Kha ramah khan kumkhuakan om an ta, an richihei khomin nei thal an ti.