Read Biete ISAIA 35 Bible Online

ISAIA 35 - Biete bible

ISAIA 35

¹Ramchâr chu a râi fân a ta, Ram iṭôlhei kha ilômin hong pâr ivût a ti.

²Ramchâr kha râifâna khêkin zâi a ta; Lebanon tlânghei angkah taka enihoi, Karmel neh Saron phâihei angkah taka rinêng iṭha nîng a ti. Mi tinin PUMAPA enhoina mûng an ta, A roinpuina neh a sinthotheina chu mûng an ti.

³Bân rizal tâkhei inrât unla, Rizal sika zaper inthing tâkhei khom inrât rei.

⁴Lungril indôphei ziangah khan, “Lungril inkhir unla, ṭi viat no rei! Pathian chu nangni sanisua rangin zuang a ti, Ni irâlhei kuttum itho rangin ai zuang rang a nit,” ti pêk rei.

⁵Mit ichohei khan mu thei an ta, Kuar isêthei kha an ikuar vâr tâng a ti.

⁶Kebâihei kha sakhi angkana ritôpin, lâm an ta, Ṭongtheiinohei khom râifânin ikhêk suak an ti. Ramchârah tuidunghei luangsuak a ti.

⁷Ram iṭôl ilum vung vung kha dîl chang a ta, Rinêng ichâr kha tuinârin sip a ti. Sihalhei lei omna ngaiheiah khan tuichir loi neh lâiluang mông a ti.

⁸Amakhan lamilian rizam zun a ta, “Rithiangna Lampui,” ibe nîng a ta, Mi porinchehein kha lampui khah rô ngai no ni a, Kha lampui iro murdi chu intlo khom ṭhui invâi ni tlak no nih.

⁹Amakhan sakeibaknei zel om no ni a, Ramsa inrîthei khom kha lampuiah khan thleng no nih. Saninzôk tâkhei bang khan kha lampui khah rông an ti.

¹⁰PUMAPA tlansahei chu hong kîr nôk an ta, La sak pumin Zion pan an ta, Kumtluang lômna khum tâng an ta, Râifân neh lômin sip an ti. Ngaisiat neh ṭap om khâi no nih.