Read Biete ISAIA 36 Bible Online

ISAIA 36 - Biete bible

ISAIA 36

¹Hezekia kum sômlei kum ilikah ân lal kumin, Asuria rêng Senakeriba khan Judai ram khua, kul inei murdi a hong rûn a, a lâk tâk a.

²Asuria rêng khan Lakis khuaa rithokin Jerusalem rêng Hezekia ziangah sipai itam takkah neh, Rabsakea a tir a; dîl sakitah ual tuikong kôl, puanrisuh ngaihei mun lamilianah khan â ding a.

³Rêng insungkua enkoltu, Hilkia naipa Eliakima hei, ziaktu Sebna hei, thurchi vongtu Asafa naipa Joa hei an va suak a.

⁴Rabsakea khan an ziangah, “Rêng Hezekia hin îtak im ringatnaa neia hingkana lungrizoia a irsongpui hi; rêng roinpui, Asuria rêng khan ai riat nuam a nit.

⁵Ṭongbâi ithlum ringot hin sipai râtna neh râldoi thiamna itluk theiin nî iam mani? Asuria doia rihel rangin tûm nang iṭangpui ranga nî iam?

⁶Aigupta hin nang iṭangpui thei rangin nî tûng mani? Ani khah lâiluang irol, a kiak bak a, â ṭhuntu kut isun ngai angkah bang hi a nit. Aigupta rêng Faroa chu a chunga ringattuhei ta rangin irol inderte angkah bang kêng ai nit.

⁷“PUMAPA kin Pathian a nit, kin ringatna chu nî ti mani? A biakna mun risânghei neh mâichâmhei Hezekian a nuam nuamin a thon pêk a, Jerusalem neh Judai ram mihei ziangah, ‘Hi mâichâm bangah hin amah chu nin biak rang a nit,’ ai ti Pathian khah nin lei iiam mai mani?

⁸Rêng rimingin ṭong rikhitna nangni neipui ki ti. Â chuang rang mi nin mu thei ngânin chu sakor sânginikah nangni pêng ki ti.

⁹Aigupta sakor tâli neh sakora ringat ni nitin chu ki pu sipaihei lâia ân thuai tak khom ingkan im ne dan thei rang?

¹⁰Hi ram iseh rangin PUMAPA thu boia hong rithok ki nit ni iam mani? PUMAPA khan hi ram hih idoia isehchit rangin a ne iti kêng ai nit iti iril rei,” a ti a.

¹¹Eliakima, Sebna neh Joa hei khan Rabsakea ziangah, “Ngaihoi takkan Aramaik ṭongin ne sôn roh, kin riat thei. Kulpui bula omhei riat phâkin Hebrai ṭongin thu sîr khâi no roh,” an ti a.

¹²Rabsakea khan chu, “Ki pu khan hi thu hih nin rêng neh nangmani ziang banga sîr rangin ne tir mak. Nangmani angkah ngira mahni êk ifa a, mahni zun iin rang kul bang bula omhei riat ranga sîr rang khomin a ne itir kêng ai nit,” a ti a.

¹³Khanungchu, Rabsakea kha â dinga, Hebrai ṭongin iring takkan â khêk a, “Rêng roinpui, Asuria rêng thu ringai rei.

¹⁴Rêng khan hingka hin a ti: ‘Hezekia hin nangni lêm no riseh, nangni inzôk thei tlak no nih.

¹⁵PUMAPA a ringat rangin nangni a îthlêm inê rang phal no rei. PUMAPA khan nangni inzôk a ti iti neh nin khopui khom irung khapin Asuria sipaihei idan a ti, iti ngaitua khom ngaitua ngai no rei.’

¹⁶Hezekia thu kha ringai no rei. Asuria rêng khan hingka hin a ti: ‘Hong suak unla, ringeina lei siam rei u. Khanchu, mi tinin mahni grep neh mahni theipui fah seng nin ta, mahni tuipanga tui in seng nin ti.

¹⁷Hong ki ta, nin ram angkana ram iṭha bu neh uain tamna ram, bu bil neh grep bil iṭha ramah nangni ṭhui ki ti.

¹⁸PUMAPA khan nen zôk ngêt a ti, itin Hezekia hin nangni lêm rangin phal no rei. Nam danghei hi thlîr ngân ta u, an pathianhein Asuria rêng kuta rithokin an înzôk thei mani?

¹⁹Hamath neh Arpad pathianhei kha taktiang im an iom tâk? Sefarvaim pathianhei khom takâm an iom tâk? Samaria khua khatka lua an inzôk thei ima kha?

²⁰Kha pathianhei khan hi ram hih an inzôk thei noa a nitin teh, PUMAPA nin iti khom hin keima kuta rithokin Jerusalem khua hi ingka ngânin im inzôk thei a ti nin iiam?’ a ti,” itin.

²¹Rêng Hezekia khan sâmna peh loi rang a ti sikin, mipui kha an dâi chup a, tutên sâm mak a.

²²Khanungchu, Hilkia naipa, rêng insungkua enkoltu Eliakima hei, ziaktu Sebna hei, thurchi vongtu Asafa naipa Joa hei kha puan ṭet isilin Hezekia ziangah an fe a, Rabsakea ṭong khah an iril tâk a.