Read Biete ISAIA 37 Bible Online

ISAIA 37 - Biete bible

ISAIA 37

¹Rêng Hezekian kha thu khah a riatin chu a puan â potthlêr a, PUMAPA inah a lût tâk a.

²Rêng insungkua enkoltu Eliakima, ziaktu Sebna neh thiampu lâia ulianhei kha borapuan isilin Amoza naipa zânthla Isaia ziangah a tir a.

³“Rêng Hezekia khan Isaia ziangah hingka hin a ti a: ‘Vuanah hin ei ta rangin vânduaina nî a zuang tlung tâk; an ne musit a, an ne êro tak tak hih. Nai nei zoro a tluk a, a nu lak rizala ritha nei viat ino angkah hi ei nit tâk.

⁴Pathian iring sîr inseh ranga Asuria rêng mi tir, Rabsakea thusîr khah PUMAPA ni Pathian khan lei reh ngêt a ti. PUMAPA ni Pathian khan kuttum tho riseh. Khanchu, ei mi, a la dam isunhei ta rangin nangmah ṭongṭai roh,’ nang a ti,” an va ti a.

⁵Rêng Hezekia mi tirhei chu Isaia ziang an va tlung a.

⁶Isaia khan an ziangah, “PUMAPA khan hingka hin a ti: ‘Asuria rêng suakhein an ne sîrinsiat tlia nî riathei khah ṭi no roh.

⁷Ringai roh, thâiindôpna lungril pêng ki ta, thuthang inriang ki ti; a ramah kîr a ta, a ram ngêiah khandaiin sat that an ti,’ itin nin pu ziangah va sîr rei,” a ti a.

⁸Rabsakea chu a rot a, Lakis ata rêng arthon a, Libna khua a doi iti a riatin chu kha mun khah a pun a, rêng khah a va mu a.

⁹Ethiopia rêng Tirhaka thurchi chu Asuria rêng an iril a, ama doi rangin a hong rithok iti a riatin Hezekia ziangah palâi a tir a.

¹⁰“Judai ram rêng Hezekia ziangah, ‘Ner ngatna nin Pathian khan Asuria kutah Jerusalem khah peh no nih,’ itin nangni lêm no riseh.

¹¹Asuria rênghein an ram lua murdia an thil tho, an ram an îsiatchit pêk ngai thuhei ni riat a. Nangmah ual chu izôk bîk rangin ni irtûng mani?

¹²‘Ker chibulhein an îsiat nam Gozan hei, Haran hei, Rezep hei, Telesera om Eden mihei kha an pathianhein an inzôk thei im a?

¹³Taktiang im Hamath rêng hei, Arpad rêng hei, Sefarvaim khua om rêng hei, Hena rêng hei, Iva rêng hei kha an iom tâk?’ zu ti rei,” a ti a.

¹⁴Palâi lekha hong chôi khah Hezekian a mun chu a tep a, PUMAPA inah a hang fe a, PUMAPA maah lekha kha a phar a.

¹⁵Hezekia chu PUMAPA ziangah a ṭongṭai tâk a.

¹⁶“Tinrêngthothei PUMAPA, Israelhei Pathian, Cherub chunga ṭhung, nangmah bang hi Pathian chu ni nit, rammuala ram tin tin chunga roirêltu ni nit a, rinêng neh rivân khom hi nî siam a nit.

¹⁷O PUMAPA, ne kuar lei sung inla, ringai roh; PUMAPA meng inla, en ta; Pathian iring sîrinsia ranga Senakeriban thu a hong îsîr murdi hih ringai ta.

¹⁸O PUMAPA, Asuria rênghei hin nam tin an doi a, an ramhei an îsiat pêk tâk a nit.

¹⁹An pathianhei meiah an hâlpêk a, khahei kha chu pathian zel ni mak a, miriam kuta siam thing neh lung pai an nit a; khasikin, iseh ngêt rang chu an nit.

²⁰PUMAPA, atûnah hin a kuta rithokin ne sanisua inla; khanchu, rammuala ram tin tina mihein nangmah bang hi PUMAPA chu ni nit iti an iriat rang a nit,” a ti a.

²¹Amoza naipa Isaia khan Hezekia ziangah mi a tir a: “A zianga ni ṭongṭaina chungchâng neh Asuria rêng Senakeriba chungthu-ah

²²PUMAPA Israelhei Pathian thusîr chu amahih a nit: ‘Senakeriba, Zion nainu khan nang a musit a, nang â nui a, Jerusalem nainu khan ni lâizâm tho khah a lu nang a îthing khum a nit.

²³Tûm nî nuiso a, ni îsîr insiat? Tu doiin im ni rôl ni înring? Tu chung âm ni irsong hi? Israel Mi Rithianga chungah a nit hih.

²⁴Ni suakhei imangin PUMAPA chu ne sîr insiat vêl a, sakor tâli itam takka neh tlâng risâng sângah ki lôn a, Lebanon tlâng kil tin ker fang, sidar thing risâng sâng ke phûr a, ifâr thing iṭha tak takhei khom ke phûr a, a tlâng risânga rampui rilhei khom ker fang riai a.

²⁵Ram dangheiah tuikhurhei ki choih a, khantaka tui kha ki in sa a, Aigupta vadunga tuihei chu kephan kî chuang inkang riai,’ ni ti vêl a.

²⁶“Tian ata hihei hih itho ranga ki lei irêl thlâm tâk a nit iti nî riat tlak ino mani? Atûna thil itlung hih tiana ki lei irêl thlâm tâk a nit. Khopui inei khuahei lungbuka siam rangin ritha nang kî lei ipêk a nit.

²⁷A sunga mi omhei chu ritha rivun nei loi ranghei, iṭi neh lungâminvâia om ranghei, mual tlânga loisûlhei neh inchunga loisûl ṭiakhei, ithli lumin a înuai inthêm tâkhei murdi khom keima irêl thlâm korong an nit.

²⁸“Ni thurchi hi ki riatinfel riai, im nî tho ngai neh takâm nî fe ngai ten khom ki riat a; keima ne doia ningmur ner lâk dânhei khom kî riat a nit.

²⁹Maritna boiin ki chungah ning nen mur a, ni lârripâkziahei ke kuar a hong tlung tâk a; khasikin, atûn chu ni nâr ivitin kuaikim inkuat ki ta, ni bâiah lâkam nang inpet ki ta, ni hongna lampui tiang ngirah khan nang kâi ikhîr nôk ki ti,” a ti a.

³⁰Kha rizoin Isaia khan Hezekia ziangah, “Amahih ni ta rangin risinsiana rang nîng a ti; vuankum neh nakum sung chu farli rin nin ta, a kum ithumnaah khan chu chi chôi nin ta, â râ ritik nin ta, grep kung khom phun nin ta, â râ fah tâng nin ti.

³¹Judai rama mi la damhei chu theikung, inthûk takka rizung itla, â râ ṭuk angkah hi la nîng an ti.

³²Jerusalem neh Zion tlângah ithi zôk an iom ngêt rang a nit; Tinrêngthothei PUMAPA ṭhatnemringaina khan amakhah a înpuitling ngêt rang a nit.

³³“Khasikin, Asuria rêng chungchâng thu PUMAPA khan hingka hin a ti: ‘Hi khopuiah hin hong lût no ni a, thal khatkah khom kâp no nih;

³⁴ipho neh hong doi no ni a, khopui lâk theina rangin kul ivêlin rinêng khom inpông no nih, PUMAPA thusuak khan a ti.

³⁵Hi khua hih keima sik neh ke som Davida zianga ki ṭonginkung sikah khan ki înzôk rang a nit,’ a ti,” a ti a.

³⁶PUMAPA itir vântirtôn chu Asuriahei riabukah a fe a, mi nuaikah neh sîngiriatkah sângringakah a that a, zîngah an hang thoiin chu mithi ruak bang â tâl dûl tâk a.

³⁷Asuria rêng Senakeriba chu a riabuk ata a kîr nôk tâk a, Ninevi khuaah a om tâk a.

³⁸An pathian Nisroka ina pathian chubai iûna â khûn lâi takin a nai Adrammeleka neh Sarezera khan khandaiin an sât that a; khanungchu, Ararat ramah an rot tâk a. A naipa Esarhadona chu arthûlin ân lal tâk a.