Read Biete ISAIA 38 Bible Online

ISAIA 38 - Biete bible

ISAIA 38

¹Kha lâiah khan rêng Hezekia chu damloin a thi lôk lôk a, Amoza naipa Isaian a hong pan a, a ziangah “PUMAPA khan hingka hin a ti: Ni insungkua rêl infel ta roh, dam suak khâi no tin, nî thi ngêt rang a nit,” a ti a.

²Hezekia khan bang tiang a ngat a, PUMAPA ziangah a ṭongṭai a,

³“O PUMAPA ni maah idik takkan ki om ngai a, lungril rithiang riputin ni maah thil iṭha kî tho ngai khah, ringaiihoi takkan reh mai roh,” a ti a, a ṭap ngûi ngûi tâk a.

⁴Khanungchu, PUMAPA khan, Isaia kha Hezekia zianga kîr nôk a, hi thu hih Hezekia va ril rangin a ti a:

⁵“Keimah, PUMAPA, ner chibul Davida Pathian hin, ni ṭongṭaina ki lei riat a, ni mitrithlihei khom kî mu a nit. Khasikin, kum sômlei kum ringakah ni ringna nang lân sei pêk nôk ki ti.

⁶Asuria rênga rithokin nangmah neh hi khua hih inzôk ki ta, hi khopui hih la vênginzôk mai ki ti,” a ti a. [18]

⁷Isaia khan a sâm a, “PUMAPA khan thu ai ti chu ai tho ngêt rang a nit iti PUMAPA ziang ata ni ta ranga risinsiana chu amahih a nit:

⁸Rêng Ahaza hunbi rikhîna rilîm khah kalbi sômkah PUMAPA khan nungtiang ikhîr a ti,” a ti a. Khaangkah takin nîsa rilîm khah kalbi sômkah nungtiang a kîr nôk tâk a.

⁹Judai ram rêng Hezekia damino â dam nôk tâk khan hingka hin arziak a:

¹⁰Tar rikûla dam loiin ithi khua tiang, Ki vânglâiin mual kî khum rang tâk manih ki ti a.

¹¹Mi ring ramah hin PUMAPA mu khâi no ning a, Rammuala omhei khom imu nôk ritûng khâi mang a.

¹²Puan in kâi isim angkah hin, Ki ringna chu sât inmong a nit a, Puan ikhông zoi arkol ata ât isat angkah hin, Pathian khan ki ringna a înboi rang tâk manih ki ti ngai a.

¹³Sakeibakneiin ki ruhei ai sê khiak angkan, Zân thluanin ina tuangin ke rung ngai a. Pathian khan ki ringna a înboi rang tâk manih ki ti ngai a.

¹⁴Ki rôl chu arzal rian a, vaṭhu angkan ke rung ke rung ngai a. Chungtiang thlîr nan ki mit a kham zoi tâk a, PUMAPA, hi buaina murdi ata hih nen zôk roh.

¹⁵Im ki ti rang tâk? PUMAPA khan a ne sôn a, Amah ngirin hi thil hih ai tho tâk a nit a. Ki tuangna sikah hin ki damsungin ridîn detkan fe zâm zâm tâng ki ti.

¹⁶PUMAPA, ni ta rangin ring ki ta, Nangma ta rang bangin ring tâng ki ti. Nen dam inla, ne lan ring roh.

¹⁷Ki tuangna khah ki ṭhatna rang korong a lei nit a, Lung ni nen kham a, siatna khur inrît tak ata ni nen zôk a; Ki sualhei murdi ni ne zâ tâk a.

¹⁸Mithi khua rithokin tutên nang inpâk thei no nih; Â thi tâkhei khan nang inpâkna lâ sak thei khâi mak a, Ni iamomnaah khom ringat thei khâi mak e.

¹⁹Â ringhei bang hin kêng nangmah nang an înpâk a, Keiman atûna nang ki înpâk angkah hin; Pahei khan ni iamomzia chu an naihei an inrisei ngai.

²⁰PUMAPA ni nen dam tâk a. Seranda âtin nangma inpâk lâ sak ki ti; Ki ring kongkârkah ni Biak inah nangma inpâkin zâi ki ti.

²¹Isaia khan rêng ziangah, “Theipui irâ metinrilom unla, a sakhuaiah khan bel rei, dam zel a ti,” a ti a.

²²Khanchu, Hezekia khan, “PUMAPA Inah fe thei tâng ki ti iti risinsiana chu im ai nit rang?” itin ardon a.