Read Biete ISAIA 39 Bible Online

ISAIA 39 - Biete bible

ISAIA 39

¹Kha lâiah khan Baladana naipa Merodakbaladana, Babilon rêng khan Hezekia damino a dam nôk tâk thu a riatin chu, thilpêk neh lekha a hong thon a.

²Hezekia khan palâihei khah ilôm takkan a lei lôm lût a, archon siana inhei ân en a, tangkarua hei, rângkachak hei, namhoi hei, riak ilu hei, râlthluk siana ina râlthluk murdi hei neh archon siana ina thil murdi khah ân en riai a. Hezekia khan a rêng In neh a ram sunga a thil nei murdi a în-en ino îte omak a.

³Zânthla Isaia khah Hezekia ziangah a fe a, a ziangah, “Kha mihei khan im an hong iti? Taka rithoka hong im an init?” itin ardon a. Hezekia khan, “Ram ilah tak, Babilon khua rithoka hong an nit,” itin a sâm a.

⁴Zânthla khan, “Ni insungah khan im an imu?” a ti a. Hezekia khan, “Ki ina thil iom murdi ken en riai a, ker chonhei lâia ki în-en ino îte zel omak e,” a ti a.

⁵Isaia khan Hezekia ziangah, “Tinrêngthothei PUMAPA thu hi ringai roh:

⁶Ni ina thil iom rêng rêng ner chibulhein vuani tena an ibûmhei, Babilon tiang an chôi vang nikhua la hong tlung a ti. Îte ima ni no nih.

⁷Nangma rila râ ngêi, ni naihei lâia a ṭhen man an ta, thâinuzelin siam an ta, Babilon rêng inah sin ithon om an ti,” a ti a.

⁸Hezekia khan a dam sungin râlringam neh izôkriamkan ai om rang itina inin arngai a, Isaia ziangah, “PUMAPA zianga rithoka thucha ni ne ipêk chu ai ṭhat a nit,” itin a sâm a.