Read Biete ISAIA 40 Bible Online

ISAIA 40 - Biete bible

ISAIA 40

¹“Ki mihei thlangam sak rei, thlangam sak rei,” Nin Pathianin a ti.

²Jerusalem ziangah thlangamna thu rîl zel rei, An tuang rang tum khah an tuang zoi tâk a, An sual sika an tuangna chu ân rup tâk, PUMAPA kut khom an sual bâk inikah an ituang tâk a nit.

³Rôl ikhêk suak khan, “Ramchârah PUMAPA ta rang lampui siam unla, Ei Pathian rang ram iṭôlah khan lampui intlûn rei.

⁴Ân phâina murdi nêl insip unla; Itlâng murdi inriniam unla, Mualipông murdi inricham unla, Mun inkhôkhei innâm rei.

⁵Khanchu, PUMAPA roinpuina chu inlangin om a ta, Mi tin tinin mu seng an ti. PUMAPA ngêi khan ai ti a nit,” a ti a.

⁶Rôl khan, “Thucha chu inpuang suak roh,” a ti a. Keiman, “I thucha tak im ken puang rang?” ki ti a. “Miriamhei hih loisûl iring angkah an nit a, An roinpuina khom phûlpâr angkah a nit.

⁷PUMAPA khan ithli ân semin chu, Loisûlhei a thêm a, pârhei khom a ṭuai ngai. A nit, miriamhei hih loisûl iring angkah pai an nit.

⁸A nit, loisûlhei a thêm a, pârhei a ṭuai ngai, Ei Pathian thu hi chu kumkhuakan om mai a ti,” itin.

⁹Itlâng risângheiah hang lui inla, Zion ziangah thu lômiom chu rôl iring takkan inpuang roh, Jerusalem ziangah thu lômiom chu inpuang roh, ridîn no roh. Judai ram khopuihei khah iril inla, “Nin Pathian chu a zuang tâk e,” ti roh.

¹⁰En ta, PUMAPA Pathian chu mi rât angkan a zuang a, A bânzâl ritha rât imangin roi rêl a ti; A irtlan suakhei[19] chu a zuang ṭhui e.

¹¹Bera enkoltu angkan bera lôm donsui a ta, A têhei kha ibûma ipom pumin a puinuhei chu ilôm dîl dîl a ti.

¹²Tu mi ngân im kut sipkah banga tuikhanglian tui rikhî thei rang? Tu mi ngân im rivân khi ikhâp ringota arkhî zoi thei rang? Tu mi ngân im rinêng ipil hih kilâta arta zoi thei rang? Tu mi ngân im mual neh tlânghei hih â var thei rang?

¹³Tu mi ngân im PUMAPA khah im a tho rang â ril thei rang? Tu mi ngân im ân risei a, roi â sakpui thei rang?

¹⁴Lungvâr isak rangin Pathianin tûm ai pun ngai? Tu ngân im lam dik inmu thei rang? Tu ngân im ireh rang ân risei thei a, Thil tho dân rang inmu thei rang?

¹⁵PUMAPA rangin chu nam tin tin hih, Tui farkate angkah an nit a, Varnakhênga inimlek ikop angkah pai hi an nit; Tuihualhei khom lungte angkan a, Itôm dît dît thei angkah dôra zâng a nit.

¹⁶Lebanon tlâng rampuia ramsa murdi khom hi, PUMAPA zianga ribôlnaa mang rangin chu inrup mak a, A thinghei lak khom itua rang a înrup ino a nit.

¹⁷Nam tin tin hih a ta rangin îte zel ni mak a.

¹⁸Pathian chu tu nêm nen richak rang? Im ai ang khah ingkam ne sîr infel thei rang?

¹⁹Ani chu mirmil isiam thiamin mirmil ai siam, Rângkachak inluan thiamin rângkachak lûm a înluan a, Tangkaruaa siam ṭhungmuna a inṭhung ngai angkah khah ni mak a.

²⁰Tangkarua manih, rângkachak manih nei zoi ino khan, Â mon theiino rang thing iṭha a irngen ngai angkan, Ikûi loi rang mirmil isiam rangin thing isin thiam tak a însin ngai a nit. Khangkana mirmil neh khan im inrichak rang tâk?

²¹Nin iriat ino mani? Nin irngai ino mani? Atîr ata iril nin lei init ino mani? Rammual hong insiang dân hih nin lai riat ino mani?

²²Ani chu kôlkil rikual chungtiang a om a, A sunga omhei chu a ta rangin khâiphâr angkah pai an nit. Puanzâr angkan rivân khi a zar a, Omna rang puan-in izar angkah hin ai zar a nit.

²³Rêng roinpuihei ân tlôm a, Hi rammuala roirêltuhei îte ni loiin a siam ngai.

²⁴Thingkung iphun hong icher chak, Rizung inthûk khom la tlano angkah an nit, Ithlîn a hong sêm a, a thêm zel a, Thlipui a hong râng a, bupôl angkan a sêm invuang pai ngai.

²⁵Tu nêm Pathian rithiang chu inrichak rang tâk? Ama ang mi dang an om ngân im a?

²⁶Rivân tiang ni mit hang inlêng ta, Ârsihei khi tu isiam im an init? Sipai lôm angkana â ruai isuatu khan an tam dôr khom a riat a, An riming chitin ai koi thei a nit. A sinthotheina chu a natinsat a, An lâia khatkah khom boi tlak ngai mak.

²⁷Israel richihei o, îtho rangin im, “PUMAPA rithokin ei lampui arthup a, Ei Pathian hin ei tuangna hih ne uksak khâi mak,” itin nin irphun?

²⁸Nin iriat ino? Nin lei iriat ngai ino mani? PUMAPA bang hi kumtluang Pathian chu a nit a, Rammual pumpui hi ai siam a nit. Tiklâi khomin isôlin rizal ngai mak a. A ngaituanahei khom tutên suisuak thei mak.

²⁹Mi rât inohei râtna a pêk a, Â sôlhei râtna thar a pêk ngai.

³⁰Râtlâihei khom dang ichârin an rizal ngai a, Vânglâihei khom isôlin an ilîr ngai.

³¹Nikhomseh, PUMAPA ngâktuhei chu, An râtnahei siam intharin om a ta; Mupui angkan chungtiang rithlan vuang an ti; Itlân an ta, sôl no nih; Lôn an ta, rizal ual no nih.