Read Biete ISAIA 41 Bible Online

ISAIA 41 - Biete bible

ISAIA 41

¹Pathianin, “Nangmani tuihual ramhei o! Dâirek unla, Ki tiang nin ikuar sung rei! Hong unla, roirêlna munah nin chungchâng thu sîr rangin risiam infel rei; Tho munkan lei rêl itlâng rei u.

²A fena tiang tianga rât ngai,[20] Khosak ata mi rûn ngai â koisuatu chu tu mani? Rênghei neh namhei chunga nêna â peh ngaitu chu tu mani? A khandai khan anni chu ipil angkah takin a tuk a, A thal khan bupôl ithli isêm angkan anni chu a ûm indar ngai a.

³Arzûl thiai a, popliam tuang viat loiin matiang a pan thiai a, Nuai sir phâk loi rakkan ai rât a nit.

⁴Hihei hih tûm atîr ata inrifûk a, Thoi thar hong iom thiai chunga â thluntu ai nit? Keimah, PUMAPA hih a bul itumtu chu ki nit, Keimah, PUMAPA ngir hih a mongna rang khom ki nit.

⁵Tuihual ramhei khan ki sintho an mu a, Ṭi lâinan an sip a, an rilo ân thing tâk a. Kôlkila omhei khom kha iṭin an inthing a. Khanchu, an ribûm a, an hong a.

⁶Kutithiamhei kha riṭangpui risakin an rithor risak a.

⁷Thing isin ithiam mi khan rângkachak inluan ithiam ziangah, ‘Ni thon ṭhat e,’ a ti a. Mirmil suk innâm ngaitu khan a lei inribu ngaitu khah â thor a, ‘Arman dan chu a ṭhat e,’ a ti a Â nîng nona rangin mirmil khah â kilnan an inriman khap a.

⁸Nangmah Israel, ke som ni nit a, Ki mi rithlanghei kha nin nit a, Ki mal, Abrahama richihei nin nit.

⁹Kôlkomong ata nang ki hong ṭhui a, Kôlkil latna tak ata nang ki koi suak a, ‘Ke som ni nit,’ nang kî ti a nit. Nang ker thlang a, nang heng tlak mang e.

¹⁰Ṭi tlak no roh, ni ziangah kî om mai a nit. Ner thla invâi no roh, ni Pathian ki nit, Râtna ritha nang pêng ki ta, nang ṭangpui ki ti. Nang ituh mai ki ta, nang inzôk ki ti.

¹¹Ni chunga ningithikhei chu izakin mualinphoi an ta, Nang risualpuihei khom thîng an ta,

¹²Rinêng chunga rithokin rimang vang an ti.

¹³Keimah hi PUMAPA ni Pathian; Râtna nang ipe a, ni ziangah, ‘Ṭi tlak no roh; nang ṭangpui ki ti,’ titu chu ki nit,” a ti a.

¹⁴PUMAPA khan, “O Israel, richal angkah dôra rizal ni khom inla, Ṭi tlak no roh; nang ṭangpui ki ti. Keimah Israel Pathian rithiang hih nang inzôktu chu ki nit.

¹⁵En roh, buchîlna khôl hâ thar ingaih tak inei angkan nang siam ki ti. Itlânghei chîl ni ta, chênnôi riai ni ti; Mualhei khom pilvut chang riai a ti.

¹⁶Rivân tiang tôm ni ta; ithlîn sêm inlêng vang a ta, Thlipuiin ithek indar riai a ti. Khanchu, ni Pathianah hin lôm ni ta; Israel Pathian Rithiang hih chôiinrisâng ni ti.

¹⁷Ki mi, risamhei neh inrianghein tui iin rang an zong a, Tui rihâla an idang a châra a nitin chu, Keimah, PUMAPA hin an ṭongṭaina sâm ki ta, Keimah, Israel Pathian hin mah tlak no ning e.

¹⁸Tlâng iṭôl ata vadung inluang ki ta, Phâiheiah khan tuinâr isuang ki ta. Ramchâr chu dîlin siam ki ta, Ram ichâr khom tuiluangna chang a ti.

¹⁹Ramchârah khan sidar thing hei, irite thing neh rimui thing hei, oliv thinghei inṭoi ki ta, Ram iṭôlah khah rampui chang a ta, Ifâr hei, ram ifâr hei, junipar hei mông a ta, rampui risiam a ti.

²⁰Amakhah mihein mûng an ta, Keimah, PUMAPA hin kî tho a nit, iti riang an ti. Israel Pathian Rithiang kutsuak a nit iti, hong rethiam tâng an ti,” a ti a.

²¹PUMAPA, Israelhei rêng khan amahih ai ti chu a nit: “Nangmani, nam tinrêng pathianhei o, Thiamthu sîr rang nin inei kha hong isîr rei, Riderna rang ṭong iṭha nin inei murdi hong phor rei.

²²Hin hong unla, thil hong itlung rang ne ril rei, Khanchu, a hong itlung rang khah ei lei iriat thlâm thei rang a nit. Roirêlmunah thil itlung tâkhei rilfia unla, a omzia ne ril rei.

²³Matiang thil hong itlung rang rillôk unla, Khanchu, pathianhei nin nit iti riang kin ti. Thil iṭha manih, â sia manih khom tho ngân ta u, Khanchu, ṭîng kin ta, inthing kin ti.

²⁴Nangmani khom chanlamboi nin nit a, nin itho thei khom îte omak e. Nangmani chubai nangni ûntuhei khom porinche tak an nit.

²⁵Khosak tianga mi ker thlang tâk a, Mâr tianga rithokin zuang rûn a ti. Bêl ivuaktun ipil lûm a îpeng ngai angkan, Roirêltuhei chu dialdôk angkan sirpol neng a ti.

²⁶Hi thil hong itlunghei hih, ‘Ni îndik a nit,’ kin ti rangin, A tu tak hîm a lei inpuang thlâm chei u a? Tutên bâikah khom ti mak chei a, Tutên nin ziang ata thu îte reh mak.

²⁷Keimah, PUMAPA hi Zion mihei iril masatu chu ki nit; ‘Ni mihei an hong e! Ni mihei in tiang an hong e!’ itia, Jerusalem zianga palâi itirtu chu ki nit.

²⁸Mirmil pathianhei chu ki en vêlin, tute iti rang inei omak a; Ṭongridon ki pêk a, ne sâm thei khatka lua omak.

²⁹Hi pathianhei hih an rêngkan mangmunboi an nit a, Îte itho thei zel nei mak e. Hi mirmilhei hih chanlamboi korong an nit a, Sinthotheina nei ino an nit.”