Read Biete ISAIA 42 Bible Online

ISAIA 42 - Biete bible

ISAIA 42

¹PUMAPA khan a ti; “En ta, ke som, ki îtûk indet ngit, Ki dit rithlang, a chunga kî lôm chu a nit. Ani chu keima Rithla ki vur tâk a, Nam tinrêng chungah diknan roirêl a ti.

²Ikhêk suak no ni a, a ṭong khom inlum no nih. Kotsuaheiah khom a ṭongbâi suak inring no nih.

³Lâiluang ikûm ikhiak no ni a, Meiser ide iai iaite khom that no nih. Mi tin chungah diknan roirêl a ti.

⁴Rammuala hin roirêlna dik a om mâkah chu, Rizal no nia, a sabei dong no nih. Tuihual ramhein ân riseina thu, Ngâkmo takkan an ithlîr mai a nit.”

⁵Pathian, rivân isiamtu neh â kâiphartu, Rinêng neh a sunga om murdihei inrifomtu, Ringna rithuak neh rithla petu, PUMAPA Pathianin a som ziangah,

⁶“Keimah hi PUMAPA chu ki nit, Rinêng chungah idik takka rêl rangin nang ki koi suak a, Ritha nang ki însil tâk a nit. Nangma mangin mi tin neh thuthlung siam ki ta; [21] Nam tin vâr inih rangin nang kî sia a nit.

⁷Mitichohei mit invâr pêk rang hei, Tâng-in sunga rikhumhei isua rang neh Izîng nuaia ṭhunghei sanisua rangin.

⁸Keimah bang hih PUMAPA ni Pathian chu ki nit. Tutên ki roinpuina ne tlângpui thei no nih; Keima inpâkna khom mirmilhei ne îtlângpui phal no ning e.

⁹Thu ki lei irillôkhei chu a hong tlung tâk a, Thu thar ki înpuang rang a nit, A zuang tlung ma ngêiin nang ki îril thlâm a nit.”

¹⁰PUMAPA inpâkin lâ thar sak unla, Rammual pumpui hin inpâk riseh; Tuikhangliana inzinhei, amah chu inpâk unla; Tuikhanglian sunga om murdihei, amah chu inpâk rei. Tuihual ramhei neh a sunga omhei khomin inpâk riseh.

¹¹Ramchâr neh a sunga khua omhei khan Pathian inpâk riseh; Kedar mihein inpâk sela; Sela khua omhei khan râifâna inpâkin, Itlângsîpheia luiin ikhêk suak riseh.

¹²Tuihuala omhei khan PUMAPA chu inpâk sela, Roinpuina peh riseh.

¹³Ridoi ranga mihâi ningimur angkan PUMAPA chu a zuang rithok e; Risual rangin arfo diam a, ridoi tlâng â sam a; Â râlhei chunga artha râtzia ân lang a.

¹⁴Pathianin, “Zoro sôt takka sung chu ki dâirek a; Ki mihei hi sâm mang a. Atûn chu châng zoro a hong tlung tâk a; Nupang naiha isê angkan ki îkhêk suak a nit.

¹⁵Tlâng neh mualhei isehchit ki ta, Loisûlhei neh thinghei inchâr vang ki ti. Varuamhei chu ramchâr inchang ki ta, Tui ithlinghei inkang vang ki ti.

¹⁶Mitdelhei chu an iriat ngai ino lampuiah iruai ki ta, An la fena ngai no-ah khan fepui ki ti. Izîng khah ivârin ilet pêk ki ta, An matianga lam inkhôkhei khom innâm pêk ki ti. Khahei khah ki ṭonginkung chu a nit, Inkhêl loiin kî len rang an nit.

¹⁷Mirmil chunga iamna ringat a, an pathiana bêtuhei chu, Tlôm an ta, mualinphoi an ti.”

¹⁸PUMAPA khan a ti, “Kuarisêthei o, ringai rei, Mitdelhei o, inâi khêtkan hong en rei.

¹⁹Ke som nêka mit icho hih tûm an om a? Ki mi tir nêka kuarisêt hih tûm an om a?

²⁰Israel, thil itam takkah ni mu tâk a, Khanniseh, zôm ual mak che a; Riat theina rang ikuar ni nei a, Khanniseh, îte reh thei ual mak cheh.”

²¹PUMAPA chu mi inzôk inuam Pathian a nit a, A dânhei neh ân riseinahei ân lut a, A mihein marit itho rangin ai nuam a nit.

²²Khanniseh, a mihei khan iru neh irok an tong a; Rip sunga ikhum an nit tâk a, Tâng-inheiah ithup khapin an om tâk. Anni chu irok neh chekindarin an om a, Anmani ṭangpui ranga hong zel tute om khâi mak.

²³Nin lâiah amahih arngai nuam nin om im? Atûna rithokin iṭha takkan ringai ta ung im?

²⁴Israel chu tûm mi roktu zianga â pe? PUMAPA ngêi kha a nit. A chungah khan thil isual ei tho a, A lampui zui mang me a, A Dânhei kha ei ngaisak no sika a nit.

²⁵Khasikin, a ningthik ritha a nen ritem a, Ridoi inrîttakhei ei ituang tâk a nit hih. Israel chungah a ningthik chu mei angkan a chok tâk a, A ne kâng tâk a; nikhomseh, reh viat mang meh; Khahei khah ingaisak khom nuam ual mang meh.