Read Biete ISAIA 43 Bible Online

ISAIA 43 - Biete bible

ISAIA 43

¹Atûnah hin chu Israel, nang isiamtu PUMAPA khan hingkan a ti: “Ṭi no roh, nang inzôk ki ti. Ner ming isâmin nang ki koi a, ki ta ni nit.

²Tui inthûk ni pâl lâiin, nang ompui mai ki ta; Intakna tui ilian khomin nang chîm phâk no nih. Meipui kârah lôn khom inla nang kâng no ni a; Fiana khir takhei khomin nang innah thei no nih.

³Keimah hi PUMAPA, ni Pathian, Israel Pathian Rithiang, nang inzôktu chu ki nit. Nangma sanisuana rangin Aigupta heng ki ta; Ethiopia neh Seba khom heng ki ti.

⁴Ki rangin ni lut tak tak a, lung nang ki thlung a, nang ker ngai inrisâng a, Nangma sikin nam danghei murdi heng ki ti.

⁵Ṭi no roh, ni ziangah ki om mai. Sua tiang ata ner chihei chu zuang ṭhui ki ta, Tlâk tiang ata khom hong koi bûm ki ti.

⁶Infe riai rangin mâr tiang ram chu iril ki ta, Irên khâi loi rangin sim tiang ram khom iril ki ti. Ki mihei chu ram ilah taka rithokin hong kîr sela, Ki naihei chu kôlkil tina rithokin hong kîr riseh.

⁷An rêngkan ki mihei an nit a, Ki roinpuina lang theina ranga kî siam an nit.”

⁸Pathianin a ti, “Ki mihei roirêl muna hong rangin thu peh rei. Mit an neia chu mitdel an nit a; Ikuar an neia chu kuarisêt an nit.

⁹Nam tinrênghei roirêlna hong rangin thu peh rei. An pathianhei a tu tak im matianga thil â rillôk thei? An lâiah a tu tak im atûna thil itlung a lei irillôk thlâm? Hi pathianhei hin riatpuitu hong ṭhui sela, Mihei riatah an îdik a nit, An thu rillôkhei khom â dik iti thlop riseh.

¹⁰O Israel, ki thuretuhei ni nit; Ke som, ki irthlang ni nit, Keimah ne ria rang neh ne iam rangin, Keimah bang hih Pathian chu ki nit iti retu rangin. Keima banah chu pathian dang zel omak a; Ki om ma khomin lei hong om ngai mak a, Ki om nung khomin hong om tlak khâi no nih.

¹¹Keima bang hi PUMAPA chu ki nit, Saninzôktu dang tute zel omak e.

¹²Thil hong itlung rang ki lei ril thlâm a, Nang iṭangpui rangin kî zuang a nit. Keimah bang hin nangni ke ril a, Amahih nam dang pathianhei khan tho thei mak. Nangmah hi ki thuretu chu ni nit. Keimah bang hi Pathian chu ki nit.

¹³Leilung insiang ma ata kei chu Pathian ki nit a, Kî nit mai rang a nit. Ki sinthotheina ata tute zôk thei no ni a; Ki sintho khom tutên indanglam thei no nih.”

¹⁴Israel Pathian Rithianga, nang inzôktu PUMAPA khan hingkan a ti; “Nangmani sikin Babilon idoi rangin sipai lôm tir ki ta, A khopui dâikothei isim riai ki ta, A mihei ipâina chu ṭapnan rilet a ti.

¹⁵Keimah hi PUMAPA ni Pathian Rithiang chu ki nit. Israel, nang isiamtu ni rêng chu ki nit.”

¹⁶Tian ata tuipui rikanna rangin PUMAPA khan lampui a siam a, Tuirifôn iphûl bur bur rikanna lampui a siam a.

¹⁷Sipai lôm irât inrimangphar rangin a ṭhui a, Sakor tâli neh sakorhei imanga sipai lômhei chu. Thoinôk tlak khâi loi rangin an ilîr a, Meiser chok angkana isêm dipin an om tâk.

¹⁸Nikhomseh, PUMAPA khan a ti, “Tianlâi thilah ringat no unla, Tianlâia thil itlungah khan nin ilung inringam no rei.

¹⁹Thil ithar ki tho rang hih thlîr rei, a hong tlung thiai tâk a, Atûn nin imu thei rang tâk a nit. Ramchârah lampui siam ki ta, ram iṭôlah khan vadunghei inluang ki ti.

²⁰Ki mi rithlanghei in rang ramchârah tui ken luang tenan chu; Ramsahei tena khomin ne chôiinrisâng an ta, Sihalhei neh osṭikhei khomin nen pâk an ti.

²¹Anni chu ki ta ranga kî siamhei an nit a; Nen pâkin la zâi an ti.”

²²PUMAPA khan a ti, “Israel, nang chu ni chang a ne dong a, Chubai ne ûn mak che.

²³Hâlrivâm thillan rangin ni berahei ne hong lan ngai mak che a; Ribôlna lanin ne chôiinrisâng ngai mak che. Thillan izongin puakrik nang siam ngai mang a, Namhoi ichûn khomin nang insôl ngai mang.

²⁴Namhoi ner choh pêk ngai mak che a, Ribôlna ran thâi khomin lungthlâi ne sak ngai mak che. Khanêkan ni sualin puakrik ni ne siam a, Ni pualoina hin ni ne însôl neng ngai a nit.

²⁵Keimah hi ki nit ni sual ngaidamtu chu, Pathian ki nit a, ki nitna sikah hin nang ki îzâ ngai a nit. Ni sualhei chu kî riat mai khâi ino a nit.

²⁶Ne nô rangin hong inla, Ni thiamthuhei hong isîr roh.

²⁷Nin chibul masatakin thil a thonsual a; Nin ruaituhei khom ki chungah an isual a,

²⁸Nin roirêltuhein ki Mun Rithiang an inbor a, Khasikah khan Israel chungah siatripna ki hong ithlun a; Ki mihei ngêi chu mi musitin kî siam tâk a nit.”