Read Biete ISAIA 44 Bible Online

ISAIA 44 - Biete bible

ISAIA 44

¹PUMAPA khan a ti, “Tho, nangmah ke som, Israel, Jakoba richi, ki mi rithlang, ringai roh.

²Keimah hi PUMAPA nang isiamtu ki nit a; Ni suak nî ata nang ki ṭangpui ngai a. Nang chu ke som ni nit a, Ki mi rithlang, Jesurun,[22] ṭi no roh.

³Rinêng ichâr khah tui buak ki ta, Ram iṭôlah vadung inluang ki ti. Nin naihei chungah ker Thla bun ki ta, Nin tu neh têhei chu ṭhatvur ki ti.

⁴Anni chu tui tamnaa sûliring zun angkan neh, Tui iluang kôla pharâm angkah hin thuar dût dût an ti.

⁵Khat khatkan, ‘PUMAPA ta ki nit,’ mihein ti seng an ta, Israel mihei izom rangin hong an ti. An mimal chitin an ibânah, ‘PUMAPA ta,’ iti riziak an ta, Pathian mihei lâia khatkah riti seng an ti.”

⁶Tinrêngthothei PUMAPA, Israel rêng, Anmani ritlantu PUMAPA khan hingkan a ti; “Keimah hi amasa tak neh a nungkhôn tak ki nit, Keimah bang hi Pathian ki nit a, Keima ti no pathian dang zel omak.

⁷Keima angkana hi tûm â om? Tianlâi mihei ki siam ata thil itlunghei khah, Hong isîr sela, ki makungah târinlang riseh. Thil hong itlung ranghei hong inpuang riseh.

⁸Ki mihei o, iṭi rilônthingin om viat no rei, Tianlâi ata vuani tenah hin thil hong itlung ranghei, Ken puang thlâm ngai iti riatpuituhei nin nit. Keimah ti no pathian dang an om im? Kî riat tlak ngai ino pathian roinpui an iom mani?”

⁹Mirmil isiamtuhei hih mangmunboi an nit, an pathian siam, an înlut bâk bâkhei khom chanlamboi a nit. Hi pathian isôn ngaihei hi miticho neh invêt an nit a, mâimôk la tong an ti.

¹⁰Mirmil inluana, pathian angkana chubai iûn ranga siam hih îte rifena omak e.

¹¹Chubai iûntuhei murdi mâimôk la sik riai an ti. Mirmil isiam thiamhei khom miriam pai ngir an nit a, danglamna îte nei mak. Hong ribûm sela, ki makungah hong iding riseh ba, inthing an ta, mualinphoi tak tak an ti.

¹²Thîrsûn thîr meiri-ala lingin chemrei â cher ngai a, chungchôia sukin ritha a song tak tak ngai. A vonhei a hong ṭâm a, a tuihei a hong rihâl a, ai sôl neng ngai a nit.

¹³Thingisinthiam khan thing kha a hang rikhî a, a rîn indang a, a riamreiah khan a khok a, miriam rilim ân chang a, a in sunga târ rangin miriam rilim enihoi tak a siam tâk a.

¹⁴Rampuia rithokin sidar thing manih, ifâr thing manih, saso thing manih a va phûr a; anitnole sidar thing a phun a, ruasûrin a înthuar rang khah a ngâk ngai.

¹⁵A ṭhen chu thingin a tua a, â lum khah a ua a, a meiri-alah khan ibai ar-em ngai a; a ṭhen chu mirmil siamna rangin a mang a, chubai a ûn tâk a.

¹⁶A ṭhen chu thingthua mangin mei a sêm a, sa a ro a, a fâk a, a khopin chu mei ilum khah a ua a, “Mei khom a ṭuang vang a, ar-al tlik a, a lumpam reng,” a ti ngai.

¹⁷Thingbong dang ṭhenkah khah mirmilin a siam a, ikhûnin chubai a ûn a. A zianga ṭongṭaiin, “Ki pathian ni nit, nen zôk roh,” a ti a.

¹⁸Khangkana mihei kha chu inmôl an nit a, îte an iriat ino a nit. Dikna tianga khan an mithei an isîng a, an lungrilhei an ikhâr khap ngai a nit.

¹⁹Mirmil isiamtu khan, “A ṭhen chu thingthun ki mang a, ibai ker em a, sa ki ro a, ki fâk a; thingtum ṭhenkah kha mirmilin ki siam a, thing tum makunga khûnin chubai ki lei iûn a nit hi te,” tina châng riattheina ranga lungril inei zel omak e.

²⁰Rivut ibâr angkana rifena boi a nit. Arngai dân insual tak khan a ṭhui invâi a, isan thei khom ni khâi mak. A khât ringotin chu a kuta mirmil a îtûk khah pathian ni viat mak ti thei khâi no nih.

²¹PUMAPA khan a ti, “Israel, nang chu ke som ni nit iti remai roh. Ke somin nang ki siam a nit a, Nang ringil tlak no ning e.

²²Phâivuan sûm ai sêm inrikiang ngai angkan ni siatnahei ki sêm inrikiang tâk. Ki ziangah hong kîr roh; keimah hi nang ritlantu chu ki nit.”

²³Rivânhei o, râifânin zâi rei, Rinêng mun inthûk takhei ipâi rei. Mualhei neh rampuia thingkung murdihei, râifânin ipâi rei. PUMAPA khan a mi Israelhei inzôkin, a roinpuizia ân lang tâk.

²⁴PUMAPA khan hingkan a ti: “Keimah hi PUMAPA nang inzôktu ki nit a, Keimah hi nang isiamtu chu ki nit. Keimah PUMAPA hih thil tinrêng isiamtu ki nit, Keima khât bangin rivân khi ki kâi phar a; Rinêng ki siam lâiah khan tutên ne san mak e.

²⁵Zânthla lemhei thu inpuang lo ken sam pêk a, Dôithiamhei chu mualphoi ki sak ngai. Mivârhei ṭong chu ki sêl indong a, An riatna kha ân môlzia ken lang pêk ngai.

²⁶Ke somin thu a inpuang chu ki namindet a, Ki tirtônhei roisak ken puitling mai ngai. ‘Jerusalem khua chu lua nôk an ta, Judai ram khuahei khom inding thar nôk an ta, Â siahei khom siam inṭha nôk nîng a ti,’ kî ti a nit.

²⁷Tuikhanglian chu ikang vang rangin thu ki pêk a, A tuihei chu a kang vang tâk a.

²⁸Kura [23] ziangah khan, ‘Nangmah hi ki ta ranga roiirêl rang chu ni nit; Ki thiltum chu inpuitling roh, Jerusalem siaminṭha nôk rangin thu pen la, Tempil lungphûm inphûm roh,’ kî ti pêk a nit.”