Read Biete ISAIA 45 Bible Online

ISAIA 45 - Biete bible

ISAIA 45

¹PUMAPA khan rêng rangin Kura riak ân rithu tâk a. Nam tinrênghei inê thiai mai rangin a phun a, Rênghei sinthotheina ilîp pêk rangin a tir a; Khopui dâikothei chu PUMAPA khan iong pêk a ti. Kura ziangah PUMAPA khan, hingka hin a ti:

²“Keimah ngêiin ni lampui siam ki ta, Mualhei neh tlânghei inricham ki ti. Dâr dâikothei isim ki ta, Â kalna thîrtluanhei khom ikhiak riai ki ti.

³Mun izînga richon an ithup hei, Mun rithupa richon an irêhei nang pêng ki ti; Ner ming ngêia nang ikoitu hi, PUMAPA, Israelhei Pathian ki nit iti reh tâng ni ti.

⁴Ke som, ki mi rithlang Israel iṭangpui rangin nang kî phun a nit. Ne reh no khom inla, chôiinrisângna nang kî pêk tâk a nit.

⁵Keimah hi PUMAPA chu ki nit a, Keimah ti no pathian dang tute omak. Ne reh no khom inla, râtnan nang inrithluk ki ti.

⁶Rammual kil ilika dêna mi murdîn, Keimah hi PUMAPA chu ki nit a, Keimah ti no pathian dang zel omak iti an riat theina rangin kî tho a nit.

⁷Ivâr neh izîng ki siam a; Ṭhatvurna neh vânduaina khom ke thlun ngai. Hihei murdi hih keimah, PUMAPA hin kî tho a nit.

⁸Rivân risâng ata ruasûr angkan nêna zuk tir ki ta; Lei idong rangin rinêng hi ri-ong sela, irâ isua sela, Saninringna neh dikna chu pâr suak riseh. Keimah, PUMAPA khan hihei hih ki îthlun rang a nit.”

⁹Ipil ipok lûma siam ipilbêl khan â vuaktu kha a irkhalpui thei mani? Ipilpok khan â vuaktu kha, “Im ni siam rang hi, ni kut a thiam no tlia na,” Ai ti ngam rang mani?

¹⁰Mahni nu neh pahei ziangah, “Îsik taka hingka kher khera nin ne inei im ai nit?” Â ti thei tûm â om rang?

¹¹PUMAPA, Israel Pathian rithiang, Sûn maton inrifomtu khan hingkan a ti, “Ki naihei chungchânga ne sêl rang neh, Ki tho rang kha ne rêlpêk rangin, nitna zel nei mak chei.

¹²Keimah hi ki nit, rinêng isiamtu, A sunga om miriamhei khom keima isiam an nit. Ki sinthotheinan rivânhei khi ki kâiphar a; Inî, ithla neh ârsihei khi ki thu thua châng an nit.

¹³Keimah ngêiin Kura chu ke thor a, Ki thiltum lôntluk rang neh, thilhei siam indik rangin ki îthor suak a nit. A lampui tinrêngah lotlukna pêng ki ta, Ki khopui Jerusalem chu inding nôk a ta, Ki mi tânghei ai sanisua rang a nit. Hi tho ranga hin loman zong no ni a, Ritlanna man khom lah no nih.” Tinrêngthothei PUMAPA khan ai ti a nit.

¹⁴PUMAPA khan Israel ziangah hingka hin a ti: “Aigupta neh Ethiopia mihei richon chu nin ta nîng a ti. Seba rama dung iseihei chu nin suak nîng an ta; Kolbun ibun pumin nangni zui an ti. Nin makungah rikhûk idilin, ‘Pathian iompuihei chu nin nit hi te, Amah bang hi Pathian irât chu a nit,’ itin nangni khûnin inpuang suak an ti.

¹⁵Israelhei Pathian, a mihei inzôktu chu, Pathian rithup chu a lei init pial a nit.

¹⁶Mirmil isiamtuhei chu la zak tak tak an ta, An rêngkan la mualinphoi an ti.

¹⁷Israelhei chu PUMAPA înzôk an nit a; Â nêna chu kumkhuan om mai a ti; A mihei chu tiklâi khomin mualinphoiin om tlak no nih.”

¹⁸PUMAPA khan rivânhei a siam a, Amah bang hih Pathian chu a nit. Rinêng khom a siam a, idet takkan ân ding a, Iseh rep rup kan siam mak a, Miriamhei omna tlâkin ai siam a nit. Khahei ititu PUMAPA khan hingkan a ti: “Keimah hi PUMAPA chu ki nit, Keimah ti no pathian dang zel omak.

¹⁹Inrûkkan thu isîr mang a, ki thiltum khom thup mang e. Mun inthim inkhôka ne zong rangin, Israel richihei khom tir ngai mang e. Keimah hi PUMAPA, thudik iril ngaitu chu ki nit; Thil idik ken puang suak ngai.”

²⁰PUMAPA khan hingkan a ti: “Nam tinrênghei o, ram ilîr ata zôkhei hong ribûm rei; Irêla om rangin hong rilang rei. Tute înzôk thei ino thingtuma siam mirmil, Pathiana angkana ibiaa rizôntuhei hin îte zel reh mak e.

²¹Hong unla, roirêl munah nin thu hong isîr unla, Lungvâr risakin risôn rei. Thil hong itlung ranghei hih tianlâi ata tûm a lei inpuang? Keimah PUMAPA hi ni mang im a, Mahni mihei inzôktu Pathian? Keimah banah chu pathian dang zel omak.

²²Rammual pumpuia mihei o, Ki tiang hong ngat unla, nangni lei inzôk ki ti. Keimah bang hi Pathian chu ki nit.

²³Mahni riming ichingin ṭong ken kung a, Ki ṭonginkung chu ai iamom a nit. Ki thu sîr tâk chu sût khâi ngai mang e. Mi tin hong an ta ki makungah rikhûk dil an ta, Ker ming ching tâng an ti.

²⁴PUMAPA nangmah bangah hin a nit, Dikna neh râtna chu ai om, ne la tîng an ta, Ki tiang ipanin hong an ti. Ne neltuhei murdi chu mâimôk la sik an ti.

²⁵Keimah PUMAPA hin Jakoba richihei chu inzôk ki ta, Anni khan ne chôiinrisâng an ti.