Read Biete ISAIA 46 Bible Online

ISAIA 46 - Biete bible

ISAIA 46

¹“Amahih Babilon pathianhei mongna chu a nit tâk. Bela neh Neboa[24] chu an tlôm tâk a. Atûn chu sakuartung an inpêl a, Ran isôl tâk rangin puakrik an ichang tâk a nit.

²Mirmilhei chu an khâtin rizôk thei mak a; Iman an tong a, iṭhui paiin an om tâk a. Amahih Babilon pathianhei mongna chu a nit tâk.

³Jakoba richi, ki mi la dam isun murdihei o, Ki thu hi ringai rei. Nin suak nî ata nangni kî don inlian nin nit.

⁴Itara nin lu-ah kêl mul a ṭoi ten idêna nangni donsuitu chu, Keimah nin Pathian hi ki nit. Nangni kî siam nin nit a, nangni donsui mai ki ti; Nangni don inliantu ki nit a, Nangni ṭangpuiin, nangni sanisua ki ti.

⁵Tu nêm nin nen richak rang? PUMAPA khan a ti. Keima ang hi tute dang an om im?

⁶Mihein an sumkok ata rângkachak an bun suak a; Tangkaruahei an var a. Rângkachakpuhei an iruai a, pathian rilim an insiam a, Khanchu, ikhûnin chubai an ûn a.

⁷An dârah an bâng a, an riput tâk a, A omna rang takah an va sia a, An siana takah khan a om ṭian ngai. Châng thei mak a, min an isôn khomin sâm thei mak a, Vânduaina ata khom inzôk thei mak e.

⁸Nangmani mi sualhei, remai rei; Ki thil tho khah ngaitua rei.

⁹Tianlâia thil itlung khah remai unla, Keimah bang hih Pathian chu ki nit a, mi dang tute omak e, Keimah bang hih Pathian iomsun ki nit iti ipom rei.

¹⁰A tîra rithokin a mong rang dân kha ken puang thlâm a; Tianlâi ata thil hong itlung rang kha ki lei îsîr thlâm ngai khah. Ki thiltumhei chu lo sam tlak no ni a, Ki lungdo chu kî tho ngêt ngai a nit, Ki lei iti tâk a nit.

¹¹Khosak ata mi ki koi a, rimu angkan zuk ibô a ta, Ki thiltum chu tho zoi a ti. Ki lei ti tâk a, itlung khom tlung a ti, Ki tum tâk a, kî tho ngêt rang a nit.

¹²Nangni mi tuklullian, zoina nikhua chu ilah taka la oma be ngaihei o, Ki thu hi ringai rei.

¹³Zoinî sûn ki hong innâi tâk a, lah khâi mak e. Ki zoinî sûn chu a nâi teng tâk. Jerusalem chu inzôk ki ta, Israel roinpuina ithlun ki ti.”