Read Biete ISAIA 47 Bible Online

ISAIA 47 - Biete bible

ISAIA 47

¹PUMAPA khan a ti, “Babilon, ni rêngṭhungmun ata zuang ṭum inla, Nuaia ipil kârah hin iṭhung roh. Voikah kha chu nungâk rithiang, inê thei ino khopui angkah ni nit ngai a, Khan atûn chu rimuam mat khâi mak chea, Suak kêng nî nit tâk.

²Fasukkhôl inngûm inla, fâng suk ta roh; Ni mâi rikhûna lîp pai inla, Ni zakorfual iṭha khek pai roh, Ni puanbom lîm inla, vadung kha rikan roh.

³Mihei khan korongboin nang mûng an ta; Mualinphoi neh izakin om tâng ni ti. Phuba kî lâk rang a nit a, tutên ne khap no nih.”[25]

⁴Israel Pathian Rithiangah chu ner tlantu a nit a, Arming chu Tinrêngthothei PUMAPA a nit.

⁵PUMAPA khan Babilon ziangah, “Dâirek inla, izîng nuaiah iṭhung ṭian roh; Nam tin rêngnu itin nang koi khâi no nih.

⁶Ki mihei chungah ki ning a thik a, Ki mi rithlanghei kuttum ki tho a, ni kutah ki hong sia a, An chungah lungkhamna zel inlang mak chea; Itarhei tena khom idîn loiin ringkol nen ribât a.

⁷Rêngnu nî nit kumkhua rang risônin thil hong itlung rang thlîr mak chea, A hong mong rang dân khom ngaitua mak cheh.

⁸Hoiinhâina ringaiinlut nu, lei ringai roh, Izôkriamka om mai rang ner sôn a. Pathian angkah dôra lianin ner be a, Nangma banah chu tute dang zel om ino ni sôn a, Numei khom chang ino rangin ner be a, Nainetehei khom ichân tlak loi rangin ner tûng a.

⁹Khanniseh, sûnka thlâkin hi thil inikahei hih nî tuang ngêt rang a nit. Dôi ithiam mang khom inla, Lu sûn ni ta, ni pasal neh ni naihei ichân ngêt ni ti.

¹⁰Lungithi riamkan sual ni sin ngai a; Tutên nang mu thei loi rangin ni iam a. Ni vârna neh ni riatna khan nang ai ṭhui invâi tâk a nit, Ni khâtin, ‘Pathian ki nit hi te, Keima banah chu tute dang omak,’ ni ti ngai a.

¹¹Vânduaina ni chungah hong tlung a ta, Ni dôi khomin idan thei ino siatripna ni chungah hong tlung zel a ti, Rimang khoma ni lai phan ngai ino siatripna hong tlung a ti.

¹²Ni dôi thiamhei, ni dôibûrhei, Ni naiinpang lâia ata nî mang ngai kha ima no roh, Ne râlhei iṭhina rangin imang nang a chang pêk rop lôi im.

¹³Lungvâr nang isaktu an tam tlia kaneh îte lak tho thei mak che a. Rivân a lam tetea ṭhen a, ârsi thurchi riseia, Thla tina thu inpuang ngaituhei kha, Hong sela, nang inzôk riseh.

¹⁴Meia kâng rivâm zel ngai bupôl angkah an nit, Mei ichok luai luai ata khah an khâtin rizôk thei mak a, Meichok khah an ta rangin a lum rai a, Iua rang mei ilum tlik angkah ai nit ino a nit.

¹⁵Ni ring kongkârka nî pun ngai neh nî songkolôihei lak kha, Khangkah ringot kha an lei nit a, An nuam tikah nang mâng an ta, an nuamna tiang tiang pan an ta, Tutên nang inzôk no nih,” a ti.