Read Biete ISAIA 48 Bible Online

ISAIA 48 - Biete bible

ISAIA 48

¹Jakoba insungkuahei o, ringai rei, Nangmani, Israela riming nin riput a, Juda richi zuang rizomhei nin nit a, PUMAPA riming nin ching mai mai a, Israela Pathian chubai iûnin nin ribe ngai a, Khanniseh, tititakna boia nin itho pipai a nit.

²Khopui rithiang mi nin riti a, Tinrêngthothei PUMAPA, Israel Pathian chunga iamtuhein nin ribe a; Nin ṭongbâi suakah nin irpâk ngai a nit.

³PUMAPA khan Israelhei ziangah, “Atîr ata thil hong itlung rang ki lei inpuang a, Khanchu, ki îthlun zel ngai a nit.

⁴Nin tuklul a lian tak tak a, Nin ring kha thîr angkana khir thlep thei ino a nit a, Nin ichal lak chik angkana khir a nit.

⁵Khasikah khan tianlâi ata nin sûn maton rang ki lei ril a, A zuang tlung ma viaiin nangni ki lei înriat thlâm ngai a nit. Khanonchu, ‘Kin mirmilhei itho a nit, Kin înluan mirmilhei thu thu-a hong iom a nit,’ nin ti duai lôiin.

⁶Ki lei înpuang murdi a tlung tâk iti nin riat tâk a, A dik ti mak chei im a? Atûnah hin thil ithar hong iom rang nangni ril ki ti; Nin iriat ino thil rithuphei chu.

⁷Atûn zelah khan ki în-om a nit a, Zoro thlengah khan hingkana thil hih lei tlung ngai mak e; A lei itlung tâk ni sê chu, ‘Kin lei iriat tâk ngai im ki ta’ nin iti rang a nit.

⁸Milakbûr nin nit iti ki riat a, Nin suak ata rihel isong mi nin nit iti kî riat a nit. Khasikah khan kêng hihei hih nin imu tlak ngai ino, Tian ata nin ikuar khomin nin iriat ngai ino a nit.

⁹Ker ming sikin ki ningthik lân lang nuam hi mang a, Mihein an nen pâk theina rangin ki ningthik ki la ṭhuai a, Nangni ki la întuang ino rang a nit.

¹⁰Tangkarua chu meiah rithît infâi a nit ngai a, Dengtheina tuangin nangni khom nangni kî fia a nit. Khan mangmunboi nin nit iti ki mu suak tâk.

¹¹Keima sik ringot banga tho ki nit, Ker ming inpôia om rang phal mang a, Roinpuina chu keima ta a nit a, Tutên an ne tlângpui rang phal mang e.” a ti a.

¹²PUMAPAkhan hingka hin a ti: “O Israel ki mi koihei, O Jakobhei, ki thu ringai rei, Keimah hi a bul neh a mongna ki nit a, Pathian iomsun ki nit.

¹³Keima kutin rinêng ringatna kî siam a, Ki kut changtiang rivân khi kî kâiphar a nit. Rinêng neh rivân ki koi a, an hong iom zel ngai a nit.

¹⁴Ribûm unla, nin rêngkan nin ikuar sung rei; Ki mi rithlang khan Babilon chunga kut â ṭhum rang hih, Tu pathianhei khomin lei inpuang thlâm thei mak e; Ani khan itho ranga kî nuam murdi chu thông a ti.

¹⁵Keimah ngêi hi â titu neh â koitu chu ki nit; Zuang ṭhui ki ta, a tho rang tumah khan lotlukna pêng ki ti.

¹⁶Ne hong nâi unla, ki ṭongbâi suak ringai rei. Atîra rithokin ri-ong takkan thu ke sîr ngai a, Ki ṭongbâi suak murdi chu a tak ken chang ngêt ngai.” (Atûnah hin PUMAPA Pathian khan a ne tir a, ama Rithla khom a ne ipêk a nit.)

¹⁷Nang rithlangtu, Israel Pathian Rithiang, PUMAPA khan hingkan a ti: “Keimah hi PUMAPA nin Pathian chu ki nit, Ni ta ranga ṭha kha nang ken risei ngai a, Ni fena rang lampui khom nang ki înmu ngai a nit.

¹⁸Ki thupêkhei ngaisak nuam ngân inla chu o! Tuipui kang ngai ino angkan ṭhatvurnahei a zuang iluang a nit. Tuirifônin vakôl ai vur zut zut ngai angkan, Thluantlungna khom ni ta rangin zuang tlung a ti.

¹⁹Ner chihei chu iṭiai dôra tam nîng an ta, tep zoi loi nîng an ti. An rimang nona rangin kî sunghual khap rang a nit.”

²⁰Babilon ata suak unla, zalen takkan fe ta rei; Râifânin ikhêk unla, ki thu inpuang unla, Mun tinah thanginthei rei; “PUMAPA khan â som Israel chu artlan suak tâk,” ti rei.

²¹PUMAPA khan a mihei ramchâr ilum takah a ṭhui lâi khomin, Tui rihâla dengithein omak e. Lungpui ata tui a zuang suak a, Lungpui ikak ata tuinâr a zuang suak tâk.

²²“Mi sualhei rangin râlringamna zel omak e,” PUMAPA khan a ti.