Read Biete ISAIA 49 Bible Online

ISAIA 49 - Biete bible

ISAIA 49

¹Tuihual ramhei o, ki thu ringai unla, Nangni ilah taka omhei, ringai rei. Ki suak ma ata PUMAPA khan a ne koi a, Ki nu sunga ki om lâi ata â som inih rangin a ne lei înkung tâk a nit.

²Ki thuhei khandai ingaih ân chang a, Ama kut ngêiin a ne hoi a, Thal rizum tak angkan a ne siam a, A thal bômah a ne sia tâk a.

³Ani khan, “Ke som chu ni nit, O Israel; Nangma sikin mihein ne lan pâk an ti,” a ne ti a.

⁴Keiman, “Chanlamboia kî sôl a nit. Mangmunboi thilah ritha ki sêng a, Itho suak lak îte nei mang a,” ki ti a. Khan khom ki chungthu hi PUMAPA kutah ki bâng a; Ki sintho lam angkah takin loman ne pêng a ti.

⁵Ki suak ma zelin PUMAPA khan â som rangin a ne lei inkung tâk a; A mihei ṭhui ikhîr rang neh Israel mi rithekindarhei hong ṭhui ikhîr nôk rangin â somin a ne isiam a nit. PUMAPA khan chôiinrisângna a ne pêk a; Ki Pathian chu ki râtna nâr a nit.

⁶PUMAPA khan hingka hin a ti: “Ke som, sintum roinpui ual isin rang nî nei a nit. Israel a la dam isunhei ṭhui ikhîr nôka, siam inding nôk rang bang ni mak. Khanêka roinpui ual itho rang ni nei, Rammual pumpui hi inzôk a nit theina rangin Nam tin ta rang ivâr ni nit ngêt rang a nit.”

⁷Israelhei ritlantu, Israel Pathian Rithianga khan hingkan a ti: “Nangmah, mi imusit, nam tinhei inel, roirêltuhei suak, Rênghein bôi ata ni suak la mûng an ta; Nangma maritin la ding an ta; Milianhei khomin mûng an ta, ni makungah ikhûn an ti.” PUMAPA khan â som arthlang tâk a, Israel Pathian Rithiangah khan a ṭonginkung a len sikin khahei khah ai tlung rang a nit.

⁸PUMAPA khan a mihei ziangah hingkan a ti: “A zoro takah nin ṭapna rôl nangni sâm ki ta, A zoro takah nangni saninzôk ki ti, Nangni vênginzôk ki ta, nangmani sikin, Nam tinhei neh thuthlung siam ki ti. Nin dongtum ram â ramval tâk hih nangni inlua nôk ki ti.

⁹Mi tânghei ziangah, ‘Zalen takkan suak ta rei,’ ti pêk ki ta, Izînga omhei kha, ‘Ivârah hong suak ta rei,’ ti pêk ki ti. Anni chu bera lôm itlângheia lêng angkah nîng an ta; Mual ikolheiah khom sûliring mu mai an ti.

¹⁰Tiklâi khomin an von iṭâmin an tui khom rihâl tlak no ni a, Inî neh ramchâr ithli lumin denginthei no nih. Anmani lung ithlungtu khan iruai a ta, Tui tamnah munah khan ṭhui a ti.

¹¹Itlângheia khan lamilian siam ki ta, Ki mihei fena rang lampui siam ki ti.

¹²Ki mihei, ilah taka rithokin hong an ti, Mâr tiang neh thlang tiang ata neh sim tiang Sinima [26] rithokin hong an ti.”

¹³Rivânhei o, râifânin zâi unla, Rinêng râifânin ipâi roh. Mual tlânghei ilômin ikhêk suak sela, PUMAPA khan a mihei thlangam a sak a, A mi dengthei ituanghei lung ân kham tâk.

¹⁴Khan Jerusalem mihein chu, “PUMAPA khan a ne thla tâk a, A ne irngil tâk a nit,” an ti a.

¹⁵Khaangkan PUMAPA khan a sâm a, “Nu khan a nai rinunêklâi a irngil thei rang mani? Â rila râ lung ai thlung ino thei rang mani? Nuhein an naihei kha an ringil khom a nit thei, Keiman chu nangni ringil tlak no ning e.

¹⁶Jerusalem nang ringil thei tlak no ning e. Ringai ta, ki kut iza-ah ner ming ki irziak tâk a nit.

¹⁷Nang siaminding nôk ranghei an ihong rang tâk a nit, Nang isehtuhei chu ro zel tâng an ti.

¹⁸Thlîr vêl inla, im thil â tlung hih en ta, Ni mihei chu an ribûm khôm thiai a, In tianga hong rangin an hong irthok thiai tâk a nit. Pathian iring ki nit ai fel angkan, Imoiin â moi thlukfam a irsongpui ngai angkah hin, Ni mihei chu song tak tak ni ti.

¹⁹Ni ramhei chu a siat chit tâk a, â ramval tâk a nit a, Khan â lua ranghei an hong tlungin chu, Ai chîn rai rang tâk a nit. Ni ram inramtuhei chu ilah takah ikhâi ni tâng an ti.

²⁰Ni tunetehei, bôia tâng hong ikîrhei khan, Ne kuar riatah, ‘Ram hi archêp rai tâk, Omna rang mun rizat ei inang tâk kêng,’ nang la tîng an ti.

²¹Khanchu ni khât khâtin, ‘Hi naihei hih tu ne inei pêk mani? Keima inei ki naihei lak chu ke chân zoi tâk a, Nai lak nei thei khâi mang a. Bôia tângin ke vâi a, hi naihei hih tu ne idon inlian pêk mani? Keima khât banga imarak khah ki nit a, Hi naihei hih taka rithoka hong im an init tâk,’ la tîng ni ti.”

²²PUMAPA Pathian khan a mihei ziangah hingkan a ti: “Nam tin mitmuah ke bân phar ki ta, Ki kuthei zâp pêk ki ta, Ni naihei chu ni in tiang hong ipom an ta, Ni nai nupanghei khom hong puang an ti.

²³Rênghei chu ni pahei angkan nîng an ta, Rêngnuhei khan nang don an ti. Rinênga bokin chubai nang ûn an ta; Ringaiintlôm takkan marit nang an thozia inlang an ti.[27] Khanchu, PUMAPA ki nit iti reh tâng an ti; Ki ṭangpuina ngâktuhei chu tute mualinphoi no nih.”

²⁴Mihâi râllâk sum nî sut thei rang mani? Rêng nunterin a întânghei khah nî sanisua thei rang mani?

²⁵PUMAPA khan hingkan a ti: “Kha chia khah â tlung rang chu a nit. Mihâi râllâk khah sutpai ki ta, Rêng nunter întâng khom sanisuang ki ti. Nang risualpui chu risualpui ki ta, Ni naihei chu keiman sanisuang ki ti.

²⁶Nang isirphûmtuhei inrithat risak ki ta; Uain inrui angkan ningthikna neh rithatna thisen inrui an ti. Khanchu, mi tinrêngin keimah hi PUMAPA, Nang Saninzôktu neh nang Ritlantu ki nit iti riang an ta, Jakoba Pathian Irât ki nit iti riang an ti.”