Read Biete ISAIA 5 Bible Online

ISAIA 5 - Biete bible

ISAIA 5

¹Ki îdit tak rang lâ la hang sak hi rong. Ki rualṭha neh a grep rikul lâ chu: Ki rualṭha khan grep rikul a nei tâk a, Itlâng pang irî nikna mun takah khan.

²Rinêng a choih a, lung a rût infâi a, Grep iṭha chi tak a phun tâk a. A lâiah khan rungbûk a sin a, Grep sômna khur rang khom a choih a. Â râ rang zoro a ngâkmo tak tak a, A hang irâ lakin chu grep lemin[1] â râ pêk tâk a.

³Khanchu, ki rualṭha khan, “Jerusalem neh Judai ram mihei o, ki grep rikul neh kin kar thu hih ne ngaitua pêk ta rei ba.

⁴Ki sin ban hih ki grep rikulah hin a îtak im ki lai tho sa rang tâk? Grep iṭha rimal ngêt itumin ki thlîr mai a, a lem korongin teh â râ zit tak tlia hi?

⁵“Atûnah hin ki grep rikul hih ingkan im kî tho rang nangni ril ki ti, â dâihei ṭhet pai ki ta, a lung idâihei isim riai ki ta, inram ki ta, ramsahein chîlpol an ti.

⁶Môkin siang ki ta, â ṭang sâtinder no ning a, rithial infâi khâi no ning a, arnêng khom tukinrithol pêk khâi no ning e. Sûlrilingneihei neh ibuarin sip a ta, a chungah rua rêng rêng insûr khâi no ning,” a ti a.

⁷Tinrêngthothei PUMAPA rikul chu Israel insungkuahei hih an nit a; Judai ram mihei hih iduam takka ai phun grep kunghei chu an nit. Idik taka roi an rêl a tûng a, Khan mithat an song lem tâk a. Thil dik isin rangin a tûng a, Khan an întuanghei ata lungdong khêk irî ai riat tâk a nit.

⁸Mi dang ineng a, mun inrizat thiai a, rikul inlian isonghei o, nin chung ân khôk e! Tute ileng sa khâi no ni a, beindong takkan nin khât bangin la om nin ti.

⁹Tinrêngthothei PUMAPA khan ke kuar riatah, “Hi in ilian, ihoi tak tak murdi hi ram a ta, â lua rang om no nih.

¹⁰Grep rikul nôl sômka munah hin ṭin ringakah vêl bang uaina isôm rang irâ a ti. Puak sômkah nin irîtnaah khan puakkah bang inlût nîng a ti,” a ti.

¹¹Zu in lungbôk sika zîngah imat takka thoi a, zân rife rakka inrui khapka om ngaihei chu nin chung ân khôk e!

¹²Zu bualah seranda hei, perkhuanghei, khuangte hei, theile hei neh zu inin nin irî vung vung ngai a. Khanniseh, PUMAPA thiltho khah ngaisak nuam mak chei a, a kut sintho khom ngaitua ngai mak chei.

¹³Khasikin, riatthiamna nin nei nuam no sikin suakah nin îtâng ngêt rang a nit. Nin ruaituhei kha voniṭâmin thîng an ta, mipui vântlânghei khom tui rihâlin thîng an ti.

¹⁴Mithi khua khan lei ilem arzuk bâk bâk a, a bâi a lei i-âng ṭian a nit. Jerusalem milianhei neh mi vântlâng râiifân takka om ngaihei kha â lem zoi tâk.

¹⁵Mi tinrêng mâimôk isak nîng an ta, mi lârripâkhei murdi chu intlôm nîng an ti.

¹⁶Idik takka roi a rêl sikin Tinrêngthothei PUMAPA chu chôiinrisângin om a ta, idik takka a mihei roi irêl pêkin Pathian rithiang khan arthiangzia inlang a ti.

¹⁷Khanchu, an lêngna phûla bera an ilêng ngai angkan mun iramah khan lêng an ta, kho rama loisûlhei khah kêlhei khomin ipet sâng an ti.

¹⁸Sual ata rikiang thei ino, sual rilet thei inohei chu nin chung ân khôk e.

¹⁹“PUMAPA chu zuang irang seh, kin mu rangin, a lungdo chu zuang sin vak vak riseh. Israelhei Mi Rithianga khan a thil tum chu ei riat theina rangin zuang intlung viak seh,” nin ti a.

²⁰Nin chung ân khôk e! Thil isual kha thil iṭhan nin be a, thil iṭha kha thil isualin nin be a, ivâr kha izîngin nin ringai a, izîng kha ivârin nin ringai a, thil ithlum kha thil ikhân nin be a, thil ikhâ kha thil ithlumin nin ibe ngai a nit.

²¹Mahni ringaia ivâr riti a, ifel riti okhei, nin chung ân khôk e.

²²Zu ûma pasalṭhahei, zu inrinoka mihâi neh mi râthei, nin chung ân khôk e.

²³Fâkinrûk ilan mi siahei thiam inchang nin song a, mi ṭhahei kha thiamno nin inchang ngai a.

²⁴Hi sikah hin atûn chu meichokin bupôl ai kâng vang ngai angkan neh sûl ichâr ai kâng vang ngai angkah hin nin rizung rizâl mon vang a ta, nin pârlâi chu pilvut angkan sêm inrimang nîng a ti; Tinrêngthothei PUMAPA dân kha nin nôl a, Israelhei Mi Rithianga kha nin musit sikin khahei khah ai tlung rang a nit.

²⁵Khasikin kêng ai nit, PUMAPA ningthikna chu mihei chungah a zuang tlung a, a kut ilekin kuttum ai tho tâk a nit hih. Itlânghei chu â nîng a, mithi ruak chu nimnok angkan tolâi dungheiah â tâl rem rum tâk a. Khatenan khom a ningthik la ṭuai mak a, a kut a la ṭhum mai a.

²⁶PUMAPA khan ram ilah taka omhei rangin risinsiana a târ suak tâk a, kôlkila mihei kha silrisîtin a koi a. Anni chu rimot takkan an ihong a nit.

²⁷Tute sôl mak a, â ba khom omak e. Inrimubûk omak a, a in khom tute omak e. Kongkhit inrithol tute omak a, pheikok rui ichat khom omak e.

²⁸An thalhei chu arzum dap a, an phelhei chu ikam ṭianin an chôi a, an sakor ke tinhei chu lungfîm angkan a khir a, an tâli kehei chu thlisim angkan a ngûm rât a.

²⁹An sipaihei khêk irî chu sakeibaknei irâm angkah hi a nit, sakeibaknei vânglâi angkan an irâm ûng ûng a, an sa sê khah irung ûl ûl kan an riput a, tutên sut thei ngai mak e.

³⁰Kha nikhua khah a hong tlungin chu tuikhanglian irî angkana natinsatin, Israel ram chungah hong irî vung vung an ti. Ram kha hang thlîr ta u, izîng neh lungkângnan a sip a. Ivâr chu izîngin â lem zoi tâk.