Read Biete ISAIA 50 Bible Online

ISAIA 50 - Biete bible

ISAIA 50

¹PUMAPA khan hingkan a ti: “Min a nupui ai mâk ngai angkah hin, Ki mihei hi kî tir pai angkan nin irngai mani? A nit inteh, mâkna lekha ki pêk im a? Min a naihei suaka ai zuar ngai angka hin; Suaka tâng rangin nangni kî zuar nin isôn mani? Nin sual sikin suaka tângin nin iom a nit a, Nin pualoina sikin itir paia nin iom a nit.

²Anmani inzôk ranga ki feah khan tutên ne ngaisak mak a, Ki koi lâiah khan tutên ne sâm mak e. Anmani inzôk rangin ke bân ai tôi rai mani? Ki thupêkin tuipui ken kang a, Tuipuihei khom ramchâr ken chang thei a, Tui om no sikin ingahei an thi a, an thûk zoi tâk a.

³Rivânhei khom khi ken zîng khap a, Lusûn puan duk rikhum angkah a hong nit a.”

⁴PUMAPA, ki Pathian khan Mi rizalhei kha thu-a ke thor inhar theina rangin, Thusîr thiamna a ne ipêk tâk a nit. A nen riseina ki riatthiam ual ual theina rangin, Zîng tin rizukna thar a ne înnei mai ngai a nit.

⁵PUMAPA khan riatthiamna a ne pêk tâk a, Ki chang a dong khomin rihel ngai mang a, Amah khom nung song ngai mang e.

⁶Ne totuhei rangin ke ruang ki do pêk a, An ne musit khomin ki dâirek a, Ker khamulhei an phâi khomin ki do ṭian a, Ki maiah an ichil khomin izakin ki mâi hup ngai mang a.

⁷Tinrêngthothei PUMAPA khan a ne ṭangpui ngai a, Khasik takah khan an ne musitnaah khan kî mualinphoi ino a nit. Khahei tuangdiar rangin lungkhir ker sak a, Mualinphoiin om tlak no ning iti ki riat.

⁸Pathian chu a nai e, ki thiamchangzia inlang a ti. Thiamno nen chang ngam tûm â om? Tho roirêlna munah lei fe rei, A ne sêlna chu hong chôi riseh.

⁹Tinrêngthothei PUMAPA ngêi kha ne thloptu chu a nit, Tûm thiamno nen chang thei rang? Ne notuhei murdi rimang riai an ta, Puan ṭetṭôm arnge ifâk zoi angkan rimang vang an ti.

¹⁰Nangmani lâia PUMAPA chôiinrisâng a, Â som, a thu zôm ngaituhei o, Nin lampui lônna khah zîng khom sela, PUMAPA khah iam ngit unla, Nin Pathian chungah ringat ngit rei.

¹¹Khanniseh, nangmani mi danghei inrimang rang a, lungrila phan ngaituhei, [28] Nin thilṭhano phan ngir khah nangmani chungah ṭum a ti. PUMAPA ngêiin amakhah ithlun a ta; Vânduaina inrît tak tong nin ti.