Read Biete ISAIA 51 Bible Online

ISAIA 51 - Biete bible

ISAIA 51

¹PUMAPA khan hingkan a ti; “Saninzôk inuama PUMAPA zongtuhei o, Ki thu hi ringai rei. Nin inzirna lungpui hi en unla, Nin hong suakna lungkhur hih en ta u.

²Abrahama, nin richibul kha ngaitua unla, Sari, nin zuang inzirna khom kha remai rei. Ki koi lâiah khan Abrahama khah nai iboi a nit a, Khan ṭhat ki vur a, nainetehei ki pêk a; Archihei chu itam takkan ken pung pêk a.

³Jerusalem chu lung inkham ki ta; A sunga omhei chu thlangam sak ki ti. A ram, ramchâr ichang tâkhei khom khah, Eden rikul angkan siam ki ta, A ram, iram tâkah khan râifân neh lômna om a ta, Amakhan lômthu sîrin inpâk lâ sak an ti.

⁴Ki mihei o, ki thu hi ringai unla, Ki namhei hin nin ikuar sung rei: Ken riseina chu nam tinhei ki pêk a; Ki dânhei hin ivâr ithlun pêk a ti.

⁵Ki mihei ki saninzôk rang nikhua a nâi teng tâk a; Ke nêna nikhua a zuang itlung rang tâk. Keimah ngêiin nam tin chungah roi rêl ki ta, Ram ilah takhein ki zuang rang thlîr ṭian an ta; Anmani inzôk rang itûngin ne ngâk mai an ti.

⁶Rivân tiang nin mithei hang inlêng unla, Nuai tiang rinêng hih thlîr vêl rei. Rivân khi meikhû angkan boi a ta; Rinêng khom hi puan angkan la lui a ti. A sunga mihei khom ithoihei angkan thi chêl chûl an ti. Ki saninzôkna chu kumkhuakan om mai a ta, Ke nêna khom mong nî nei no nih.

⁷Nangmani thu dik iretu, ki dân lungrila vongtuhei o, Ki thu hi nin ikuar sung rei. Mi nangni nuiso ṭi no unla, Nangni an musit khomin nin ilung insôl no rei.

⁸Anni chu ringe ifâk puan angkan rimang an ti. Ki saninzôkna chu kumkhuakan om mai a ta, Ke nêna chu suanpâr tin tin idênin om a ti.”

⁹PUMAPA, har inla, ne ṭangpui roh. Tianlâi mihei zianga ni sinthotheizia ni înlang angkah khan, Zuang inlang inla, nen zôk roh. Tuipui Dragon Rahab [29] richan nôitu khah nangmah ni nit a.

¹⁰Tuipui inkang riai a, a mi rithlanghei rikanna rang, Tuikhanglian iṭuanga lampui isiampêktu khom khah nangmah ni nit a.

¹¹PUMAPA tlansahei chu hong kîr an ta, Zion tlâng chu lâ sak pumin tlung an ta, Kumtluang lômna chu khum an ta, Râifân neh lômin om mai tâng an ti. Beidong thlavâi om tlak khâi no nih.

¹²PUMAPA khan hingkan a ti, “Keimah hih ki nit thlangamna zuang ithluntu chu ki nit. Â fam thei miriam, loisûl angkana inder ringmihei hih, Îtho rang im nin iṭi hi?

¹³Rivân ikâiphar a, rinêng ringatna phûmtu, PUMAPA nangni siamtu chu nin irngil tâk mani? Nangni sirphûm itumtuhei ningmur iṭin ithôm nin iom mai rang hi? An ning imur khom seh, nangni intuang thei khâi no nih.

¹⁴M tâng riangvâi ikhûn ṭianhei khah suak zel tâng an ta, Ringdam isôt mang an ta, fâknêk risamin om tlak no nih.

¹⁵Keimah hih PUMAPA, nin Pathian chu ki nit; Tuikhanglian ke sok inrifôn a, tuirifôn chu â rî vung vung ngai. Ker ming chu Tinrêngthothei PUMAPA a nit.

¹⁶Rivân khi ki kâiphar a, rinêng ringatna ki phûm a; Jerusalem ziangah, ‘Ki mihei nin nit, nin bâiah ki thu ki sia tâk a, Ki kutah nangni kî thup tâk a nit,’ ki ti a.”

¹⁷Har ta, har ta, Jerusalem har inla, thoi roh. PUMAPA ningthikna uain khah ni in tâk a; Hong pêm ipêm diai rakkan nî in tâk a nit.

¹⁸Nang iruai rang ni naihei tute om khâi mak a, Nang ituh rang ni mihei lâiah tute om khâi mak e.

¹⁹Vânduaina rithua nikah ni chungah a tlung tâk a; Tu ngân im nang iṭâ rang tâk na? Ni ramhei chu a siatchit tâk a, a ram zoi tâk Ni mihei khan ṭâmpui an sik a, khandai an tuang tâk a, Tute lung nang inkham rang lak om khâi mak.

²⁰Ni naihei chu kotsua tinah rizalin an ilîr a; Chânga sakhi a î-ôk ngai angkan PUMAPA ningthik an tuang tâk a, Pathian ningthik inrît an ituang tâk a nit.

²¹Nangni nuamlo tuang Jerusalem mihei, Zu in loi a, zûnrui angkana hong pêm ipêmhei o, Amahih lei ringai rei.

²²PUMAPA nin Pathian, nangni thloptu khan hingkan a ti: “Ki ningmurna uain kuri nangni kî pêk khah ki lâk nôk tâk a, Nangni inpêm ngai uain khah nangni in-in khâi no ning e.

²³Nangni sirdea, kotsuaheia nangni lei inzâl a, Nimnok angkana nangni lei isirpol ngaihei khah peh tâng ki ti.”