Read Biete ISAIA 53 Bible Online

ISAIA 53 - Biete bible

ISAIA 53

¹Kin thu sîr hi tûm takisôn a, PUMAPA kut zuang ilang hi tu ngân im â rethiam rang a?

²Ani kha thil ṭiak ithar, Rinêng ichâra rizung itla hong ithuar suak angkan â som kha a hong thuar a. Amah kin inlutna rangin roinpuina neh enhoina zel nei mak a; Amah kin ringaiinnatna rangin ditomna khom îte nei mak e.

³Ani chu miriamhei musit neh inôlin a om a, Peiitem thei mi neh natna tuang thei mi a nit a; Mihei iheng neh musitin a om a, Eini lakin chu îte ringaiin ringai mang me a.

⁴Ani khan ei natnahei a ne tuang pêk a, Ei ngaisiatnahei a ne ipêl pêk a nit. Eini lakin Pathian kuttum ituang a, Dengthei neh tôkridul ituangin ei ringai a.

⁵Khanniseh, ani khan ei sualnahei sikin popliam a tuang a, Ei sual sika tuang a nit. Thlangamna ei nei theina rangin dengtheina a tuang a, Tôkridula a omna kha ei damna rang a lei nit.

⁶Ei rêngkan bera angkan ei ivâi rimang tâk a, Mahni nuamna tiang tiang ei pêt chit tâk a, Nikhomseh, PUMAPA khan ei rêngka siatna chu, A chungah khan a irngat tâk a nit.

⁷Ani chu natinsat takka intuang a nit a, Khan ringaiitlôm takkan a tuang ngêi ngêi a, Ṭongbâikah khomin sâm mak a. Bera that rang an kâi lâia ai dâirek angkan neh, Bera a mul mêt lâia ai dâirek ngai angkah hin, Ani khan ṭongbâikah khom isua mak e.

⁸Ani chu imanin a om a, a chungthu an rêl a, Thiamno inchangin, ithi rangin iṭhuiin a om a. Tutên a tuang rang khah ngaituapui mak e; Einihei sual sika ithata om a nit.

⁹Thil ṭhano îte tho ngai loiin, Milak rêng rêng tho tlak ngai no khom sela, Mi sualhei thlâna phûm ranga inkung a nit a, Nikhomseh, a thi tenan chu mi richong thlânah an iphûm tâk a nit.

¹⁰PUMAPA khan intuang khah ṭha a ti a, Ai tuang tâk a nit. A ringna khah sual ribôlna ranga lan a nit a, Archihei chu mu tâng a ta, a damsung chu sôt a ta; A kutah khan PUMAPA lungdo chu lôntlukin om a ti.

¹¹A tuangna râ a mu tenan chu lôm a ta, Â tlongin tuang mak iti riang a ti. Ke som ifel tak, a chunga kî lôm tak takah khan, Mi tam takkah inzôk a ta, An sualnahei pêl pêk a ti.

¹²Mi lian lâiah a dongtum rang ki siam tâk a, Mi rât lâiah râllâk sum chu sem a ti. Thina ten idênin arpêk thlep a, Mi sualhei lâiah itepsa a nit tâk a. Ani khan chu mi itam takka sualna pêlin, Mi sualhei rang ai ngên pêk ngai a nit.