Read Biete ISAIA 55 Bible Online

ISAIA 55 - Biete bible

ISAIA 55

¹Tho hong rei, tuirihâlhei kangân chu, Hin tui a om e! Tangka sum nei inohei khom hong unla, Manboiin fâknêk hong richoh unla, fah rei. Hong rei, uain neh dût hi hong richoh rei, Aman ipe nang no nih.

²Khopna neh thlâina nî no-ah, Îtho rang im nin sum nin ipai rang? Nin dîp sipna rang nî no-ah â tlongin, Ithôm nin ritha nin isêng rang? Ki thu hi ringai unla, Thil itui tinrêng, nin ringna irzuk murdi khah fâng nin ti.

³“Ki mihei, nin ikuar sung unla, ki ziangah hong rei; Ki ziangah hong unla, ring nin ti. Kumkhuaka rangin nangmani neh thu thlung ki ta, Davida zianga ṭhatvurna ki înkung khah nangni pêng ki ti.

⁴Mihein ki roinpuizia an riat theina rangin, Ani khah nam lupui neh ruaitu rangin kî phun a nit.

⁵Ni lai riat ngai ino namhei kha ni nuam nuamin koi ni ta; Nang la reh ngai inohei khan nang ribêl rangin hong rimot an ti. Keimah PUMAPA ni Pathian, Israel Pathian rithianga khan hihei murdi ithlun ki ta, Chôiinrisângna neh roinpuina nang pêng ki ti.”

⁶Mu olah a om lâiin PUMAPA chu zong unla, A nâi lâiin PUMAPA chu koi rei.

⁷Mi sualhei khan an omdân chu mah sela, An ngaituana insualhei khom mah vang riseh. PUMAPA, ei Pathian tiang hong kîr riseh. Ani chu lungkhamliannaa sip a nit a, Anni chu lei ngaidam a ti.

⁸“Ki lungril neh nin lungril ri-ang mak a, Ki omdân neh ni omdân khom rimil mak e,” PUMAPA thusuak khan a ti.

⁹Rivân khi rinêng nêka risâng ai nit angkah khin, Ki omdân hi nin omdân nêkan arsâng ual ok a, Ki lungril khom nin lungril nêkan a înthûk a nit.

¹⁰“Ki thu chu ivur neh rua rivân ata zuang isûr, Kîr nôk loia rinêng inrizil ngai angkah a nit. Chimu kha ân ṭoi a, Arthetu rang â râ ritik bûm rang khom a în-om pêk ngai a nit.

¹¹Ki bâia thu suak khom kha angkah takin nîng a ti; Ki thiltum chu lôsam no ni a; Itho ranga ki tirna murdiah thluantlung ngêt a ti.

¹²Râifân takkan Babilon marak nin ta; Lungringam riamkan khopui ata iṭhuisuan om nin ti. Nin matonah khan mualhei neh tlânghei ilômin ikhêk suak an ta, Thinghei chu râifânin ikhêk dur dur an ti.

¹³Rilingbilheiah khan ram ifârhei ṭoi a ta; Ibuar bilheiah khan rimuihei ṭoi a ti. Hihei hih keimah PUMAPA sintho riatmaina ranga, Kumkhuaka om mai rang risinsiana nîng a ti.”