Read Biete ISAIA 56 Bible Online

ISAIA 56 - Biete bible

ISAIA 56

¹PUMAPA khan hingkan a ti: Idik takkan roirêl unla, idik takkan thiltho rei. Nangni kî sanisua zel rang tâk a nit.

²Sabatnî innim ngai inoa, serinrithiang ngai, thil ṭhano rêng rêng tho ngai inohei chu ṭhatvur ki ti.

³PUMAPA mihei hong ribêltu nam danghei khan, “PUMAPA khan a mihei neh amah chubai iûn rangin a ne en inran,” ti tlak no riseh. Thâinuzel khomin nai a nei thei no sik ringotin, PUMAPA mihei lâia tep inrup ino angkan ribe no riseh.

⁴Khangkana mi ziangah khan PUMAPA khan, “Sabatnî serinrithianga, ne chôiinrisânga, ki lungdo sina, ki thuthlung ivong ngittu chu,

⁵ki Tempil, ki insung ngêiah hin ama riatmaina rang siam pêk ki ta, nainu naipa neihei nêkan riming iṭha pêng ki ta, Arming chu dâi tlak ngai no nih,” ai ti a nit.

⁶PUMAPA khan nam dang, a mi hong ichang tâk, amah lungithlung a, a sin itho a, sabatnî ser a, a thuthlung ivong ngaihei ziangah,

⁷“Ke tlâng rithiang Zionah nangni ṭhui ki ta, ṭongṭaina mun, ki inah khan râifân lômna nangni pêng ki ta, ki mâichâma hâlrivâm thillan ribôlna nin ilan khah iham ki ti. Ki Tempil chu mi tinrêng ta ranga ṭongṭaina In iti nîng a ti,” ai ti a nit.

⁸Tinrêngthothei PUMAPA, a mi Israelhei, an itângna ata hong iṭhuisuatu khan mi danghei khom la hong iṭhui sa mai rangin ṭong a înkung a nit.

⁹PUMAPA khan ram dang mihei kha ramsa angkana hong a, a mihei hong isê that rangin a koi a.

¹⁰Ani khan, “Ruaituhei murdi, ki mihei irung ranghei mit chu a del a, îte an iriat omak e. In irungtu ui ingik nuam ino angkah hi an nit a, rimang iphan rakka zâl bang an nuam a. Ingkana izâl an înhoi rai tâk im na!

¹¹Ui rôlruak khop tik nei ngai ino angkah hi an nit. Berapu chu an nit a, khan â sia â ṭha riatthiamna zel nei ino ruaitu an nit a; mahni nuamlam angkah takin an om a, marangṭhat bang an izong ngai a nit.

¹²‘Tho, uain zong ei ta, ei thei dôrah lei in rei u. Naktûkah vâng chu vuaninta nêkan thlum ual ok a ti,’ an ti ngai,” a ti.