Read Biete ISAIA 57 Bible Online

ISAIA 57 - Biete bible

ISAIA 57

¹Mi dikhei an thin â rethiam reng omak a, â uksak ilua khom omak. Khanniseh, an thi tâka a nitin chu dengthei lungzîngnan tôn phâk khâi ngai mak.

²Ringnun iṭha mangtuhei murdi chu thinaah khan thlangamin an om tâk a, sôlchanna an imu tâk a nit.

³Nangmani mi sualhei o, irêla om rangin hong rei. Dôithiamhei, inrêhei, nochizuarhei nêka nin ṭhat ualna îte omak e.

⁴Milêmsiahei tu ngân im nin inuiso a, thuzer thona taka nin inei hi? Mi pualoi neh milak nai korong ni mak chei ûm a?

⁵Saso kung nuaiah hoisakfam nin mang a, thing iser dâilîmah riditna pathianhei chubai nin ûn ngai a. Nin naihei vadung kôla ipûkheiah ribôlnan nin lan ngai.

⁶Vadung rikama lungtum inâmhei kha nin rithlang a, khahei khah pathianhein nin biak ngai a. Uain ibuakin ribôlna nin lan a, thilpêkin buhei nin chôi pêk a. Hihei murdiah hin kî lôm rang nin isôn mani?

⁷Itlâng risângheiah ribôlna lan rangin nin fe a, amakhan taksa rizukna manginhoiin nin om ngai a.

⁸Nin mirmil porinche chu nin kotbul zelah nin sia ngai a. Nin ne iheng tâk a nit; nin silbomhei ilîp riaiin, izâlpui ranga sum nin ipêkhei neh khan zâlmunah nin luia, nin rizukna chu amakhan nin mang ngai.

⁹Riak namhoihei nin rinuai diam a, Moleka chubai iûn rangin nin pan vang vang ngai a. Chubai nin ûn rang pathian izongin ram tinah palâi nin tir a, mithi khua dên dapin nin infe ngai.

¹⁰Chubai iûn rang pathian danghei izongin nin sôl neng a, khan khom nin sabei indong nuam mak chei a. Nin mirmil porinche khan râtna nangni ai pêkin nin riat a, nin irzal tlak ngai ino a nit.

¹¹PUMAPA khan, “Tûm nin iṭi a, tu mitmâi im nin ien ving? Thuno ne ril a, ner ngil phara nangni in-omtu pathianhei hih tu ngân im an init hi? Zoro sôt takkah ki dâirek sika mani marit ne tho loia, nin ne ichôiinrisâng khâi ino?

¹²Ni tho murdi hih â dikin ner ngai a, khan ni omdân hi inrilang ki ta, ni mirmilhein nang ṭangpui thei no nih.

¹³Lungzîng takka ne khêk suak tikah ni mirmilhei khan nang la sâm riseh. Phâivua hong râng a ta, sêm inrimang a ti. Khanniseh, ki chunga ringattuhei chu hi ramah hin om an ta, ki Tempilah chubai ne ûn an ti.” a ti.

¹⁴PUMAPA khan, “Ki mihei chu ki tiang hong kîr nôk riseh. An lampui rithial infâi unla, â dan thei murdi rithial infâi liai rei. Lamilian siam unla, inrizoi thlâm rei.

¹⁵“Keimah hi kumtluanga om mai, Pathian rithiang neh inchung chu ki nit. Munrisâng neh rithianga om ngai ki nit a; nikhomseh, ki mi ringaiintlôm neh insîrhei ziangah khan an iamna indet rang neh inhar rangin kî om mai ngai a nit.

¹⁶Ki mihei ringna ki pêk a, dem mai khâi no ning a, an chungah ki ningthik mai khâi no nih. Ki maah khan an rizal rai duai lôiin, anni chu keima isiam ngêi an nit a.

¹⁷An sual sik neh an kuatinkam sikah khan an chungah ki ning a thik a, kuttum ithon ningmurin anni chu kî mâkrak tâk a nit. Khan khoma an tuklul inlianin an nuam lamin an lai om ngit mai a nit.

¹⁸“An omdân chu ki mu mai a, khan khom an natna chu indam ki ti. Iruai ki ta, ṭangpui ki ti. Khante, lusûnhei chu thlangam sak ki ti.

¹⁹Ram tin tina omhei rangin thlangamna kî pêk a nit. Ki mihei chu indam ngêt ki ti.

²⁰Khanniseh, mi sualhei chu tuipui risok, ringam ngai ino angkah hi an nit. Tuirisok khan nimnok neh idial bang a hong ichôi ngai a nit.

²¹Mi sualhei ta rangin ningbeina zel omak,” PUMAPA khan a ti.