Read Biete ISAIA 59 Bible Online

ISAIA 59 - Biete bible

ISAIA 59

¹Nangni inzôk thei loi rangin PUMAPA bân khah tôi mak a, nin ṭapna rôl reh loi rang dôrkan â kuar sêt mak e.

²Nin sualnahei hi a nit, nin Pathian neh nangni ṭhen chu a nit. Nin sualhei khan nin Pathian mêl arli vang a, nin ṭapna rôl khom ai riat thei khâi ino a nit.

³Nin kutheiah thisen a kâi nuai a, nin kutṭimhei pualoinan a sip a, nin mûrhein milak nin ril a, nin ileihei khan siatna thu a ril ngai a.

⁴Roirêlna munah nin fe a, khan tutên dikna thlop ngai mak chei u. Nin thubuai kha nin inchang theina rangin milakah nin ringat ngai a. Mi danghei lungril iphopna rangin nin thil phan kha nin len ngai.

⁵Irûl ritui angkan nin thil ṭhano phanhei kha nin op ngai a. Irûl tûr irâttak ritui angkah a nit. A kekin chu sokngân a hong isuak zel rang a nit. Khanniseh, nin thil ṭhano phanhei khan îte thil iṭha nangni sua pêk no ni a, âiomza puan angkah taka mangmunboi nîng a ti.

⁷Sual isin rangin nin rimot tak tak a; mi dikhei thisen isua rang nin ngâkmo tak tak ngai a. Nin thil ngaitua murdi a kôi a, nin fena kipah ramna neh siatchitna nin îthlun ngai a nit.

⁸Ringeina lampui khah reh mak chei a, idik taka roirêl dân khom nin iriat ino a nit. Nin lampuihei a kôi a, kha lampuia lôn rêng rêng tute lungringamin om ngai mak e.

⁹Mipuihei khan, “Atûn chu ithôm ne sirdetuheia rithokin Pathianin a ne saninzôk no kin riat tâk. Lônna rang ivâr kin tûnga, khan zîng richel bang a lei nit.

¹⁰Miticho angkan kin rimai a, bang kin ituai kin ituai a. Sûnlâi takah khom zân inthim angkan kin ibâ a, mithi khua om angkah kin nit tâk.

¹¹Ivom angkan kin irung kin irung a, lungzîng takkan vaṭhu angkan kin irâm kin irâm a. Roirêlna dik kin zong a, khan lak mu mang ung a; sanisuana kin ngâkmo a, khan sanna lak a lat vit a.

¹²“PUMAPA, ni chunga kin thonsualna a tam vang na! Kin sualhei khan mualphoi a ne sak a, kin siatnahei kha kin riat mai a, kin pualoina khom kin irmâi tlak ino a nit.

¹³PUMAPA, ni chungah kin rihel tâk a, kin Pathian nang kin nôl a, nang izui nuam khâi mang ung a. Mi danghei kin sirde a, nung nang kin song tâk a. Kin ngaituanahei chu ṭhano korong a nit a, kin ṭongbâi suakhei khom lêmna thu bang a nit.

¹⁴Idik taka roirêlna om khâi mak a, idik taka thil itho rêng rêng om khâi mak. Thutak chu tolâiah â tâl ṭian a, iamomna khomin mun nei khâi mak.

¹⁵Iamomna rêng rêng om khâi mak a, sual nungisonghei khan a le tiang kuttum an ituang lem tâk a nit,” an ti a. PUMAPA khan khahei khah a mu a, roirêlna dik rêng rêng a om khâi no sikin â lungtluk mak a.

¹⁶Isirdea omhei isan rang tute omak a, PUMAPA ringai arkhêl tak tak a. Ama kut ngêiin ai sanisua rang a nit, dikna khah arngatna a nit.

¹⁷Dikna khah ṭângiphon â hâk tâk a, saninringna lukhum a khum a, phuba lâkna puan kha a sil a, kuttum thona puan kha arzêm a

¹⁸An sintho angkah taka thung rangin ama doituhei chu ningmurin thung a ti. Â râlhei chungah phuba lâng a ta, ram ilah taka omhei khom an sintho lam angkah takin thung a ti.

¹⁹Nisua tianga rithokin nithlâk idêna mihein PUMAPA riming roinpui chu ṭîng an ti. Ani chu tui zuang ilian angkah neh phâivosimpui angkan zuang tlung a ti.

²⁰PUMAPA khan a mihei ziangah, “Jakoba richi, sual nungisongtuhei murdi nangni ritlan rang neh nangni inzôk rangin Zionah zuang ki ti.

²¹Keiman nin zianga thu kî thlung chu amahih a nit: Ker Thla nin zianga om neh ki thu nin bâia kî sia khan atûna rithoka kumkhuakan nangni mah tlak ngai no nih; nin naihei neh nin tunetehei khom mah tlak no nih,” a ti a.