Read Biete ISAIA 6 Bible Online

ISAIA 6 - Biete bible

ISAIA 6

¹Rêng Uzia thi kumah khan PUMAPA chu ki mu a, a rêngṭhungmun, roinpui neh risâng takah khan â ṭhung a, a zakorfual môr khan Tempil chu a sip khap a.

²A kôl vêlah khan Serafhei an om a, anni khan rithla irukkah an nei chit a, inikah khan an mâi an rikhû a, inikah khan an ke an tuam a, a dang inikah khan an vuang a.

³“Tinrêngthothei PUMAPA chu arthiang e, Arthiang e, arthiang e, Rinêng pumpui a roinpuinan a sip,” itin, Ridon liangkan an risâm risak an risâm risak a.

⁴An rihu khan Tempil ringatna lungphûmhei kha ân nîng dur dur a, Tempil kha meikhûn a sip tâk a.

⁵Keiman, “Ki chung ân khôk e! Ki irmang a nit tâk hih! Mûr bâi porinche tak, mûr bâi porinche takhei lâia lêng hin, Rêngtak, Tinrêngthothei PUMAPA chu ki mit ngêiin kî mu tâk a nit na,” ki ti a.

⁶Khanungchu, Seraf khatkah ki ziangah a hong vuang a, châicheah hin mâichâma mei ri-al khah a hong ichep a,

⁷Ki mûr a hei intôn a, “Amahin ni mûr a tôn tâk a, ni sualna lâk inrimang a nit tâk, ni porinchena infâi a nit tâk e,” a ti a.

⁸Khanungchu, PUMAPA rôl ki riat a, “Tûm ki tir rang tâk? Tûm kin ranga fe rang?” a ti a. Keiman, “Hin ki om, keimah fêng ki ti. Ne tir roh,” ki ti a.

⁹Khanchu, ki ziangah khan, “Fen la, hi thu hih mihei va ril roh: Ringai mai khom unla, rethiam no tin u, en mai khom unla, mu thei ual no tin u,” a ti a.

¹⁰Khanungchu, ki ziangah, “Hi mihei lungril hih inzîng inla, an ikuar insêt inla, an mit incho pêk roh. Khanonchu, an mitin mûng an ta, an ikuarin riang an ta, an ilungin rethiam an ta, ki tiang hong ikîr nôkin indam an nit duai lôiin,” a ti a.

¹¹Keiman, “PUMAPA idôra tenâm khangkah khan an om rang?” ki ti a. Ani khan, “Khopuihei chu â luatu rang om loiin, inhei chu ân lumtu rang om loiin, ram pumpui chu a ram val riai mâkah.

¹²PUMAPA khan mihei chu ilah takah thon inrimang a ta, ram pumpui chu inram val riai bak a ti.

¹³Mi sômka khatkah khom la om sela, that inrimang nîng a ti; ani khah saso thing neh ithên thing iphûr zoia a kungmui la om ngai angkah hih nîng a ti,” a ti a. (Kha kungmui khah Pathian mihei ranga rithiangna bul ithar chu a nit.)