Read Biete ISAIA 60 Bible Online

ISAIA 60 - Biete bible

ISAIA 60

¹Thoi inla, Jerusalem vâr suak roh; Ni vâr a zuang tlung tâk, PUMAPA roinpuina chu ni chungah a zuang vâr tâk.

²Nam danghei chu izîngin rikhû khap a ta, Nangma rangin chu PUMAPA vâr kha zuang vâr a ta; A ompuina vâr ri-el kha ni chungah om a ti.

³Ni vârah khan nam tin la lêng an ta, Rênghei khomin ni kôlrisam vârna kha la hong ribêl an ti.

⁴Ni mit hang inlêng inla, thlîr vêl ta, Ni mihei chu ihong rangin an ribûm khôm e. Ram ilah taka rithokin ni naihei chu hong an ta; Ni nai nupanghei chu naipang angkan hong ipua nîng an ti.

⁵Ni mu tikin chu râifânin sip ni ta, Ni lôm rai luatin om rang dân khom reh no tin e. Nam tinhei richon chu ni ziangah hong chôi an ta, Tuipui râl ata sum neh puanhei hong chôi an ti.

⁶Saringsei lôm an hong dûl dûl a, Midian neh Efa ata saringsei lômhei chu hong an ti. Seba ata hong an ta, rângkachak neh bero hong pêl an ti. Mipuihein PUMAPA sintho roinpui inpâk lâ hong sak dur dur an ti.

⁷Kedar neh Nebaiot berahei hong hôl dûl dûl an ta, Mâichâm chungah PUMAPA inlôm rangin hong lan an ti. PUMAPA khan a Tempil chu zoro danga nêka roinpui ualin siam a ti.

⁸Sûm rivâk zun zun, Vaṭhu an riakmun hong ipun dûl dûl angkana, Rikuang ihong zun zunhei soh taktiang ata mani?

⁹Ram ilah tak ata hong an nit a; Pathian mihei chu an inah an hong iṭhui tâk a nit, Anni khan tangkarua neh rângkachak an hong chôi a, PUMAPA riming chôiinrisâng rang neh Israel Pathian Rithiang chôiinrisâng rangin, A mihei chu nam tin mitmuah PUMAPA khan a chôiinrisâng tâk a.

¹⁰PUMAPA khan Jerusalem ziangah hingkan a ti: “Nam danghei khan ni kulbanghei hong siam inṭhâng an ta, An rênghei khomin ni sin thông an ti. Ki ningthik sikin kuttum nang ki tho a, Atûn chu ki ditsakna neh ki lungkhamna inlang tâng ki ti.

¹¹Ni kul kotbâihei chu sûn neh zân ri-ong mai a ta, Khanchu, nam dang rênghei khan an richon iluhei, Nang an hong ichôi pêk thei rang a nit.

¹²Ni sin tho nuam ino nam neh ramhei chu rimang an ti.

¹³Lebanon rampuia thing iṭha tak tak, Ifâr thinghei, junipar thinghei neh ram ifâr thinghei kha, Ki Mun Rithiang enihoi tak inrivona rangin neh, Jerusalem siaminṭhatna rangin zuang chôi an ti. Ki ke ringatna mun chu kî chôiinrisâng rang a nit.

¹⁴Nang isirde ngai naihei chu hong an ta, ni makungah ikhûn an ti. Nang lei imusit ngaihei chu ni ke bulah ibok an ta, ‘PUMAPA Khopui, Israel Pathian Rithianga Khopui, Zion,’ nang tîng an ti.

¹⁵Imarak neh inelin om khâi no tin a, Tute îthlo nuam khâi ino khopui iram nih khâi no tin e. Keimah ngêi hin khopui enihoi takin nang inding ki ta, Kumkhuaka lômna khopuiin nang siam ki ti.

¹⁶Nam danghei neh an rênghei khan nang enkol an ta; Nûn a naite a îduam ngai angkah takin nang iduam an ti. Keimah, PUMAPA hi nang inzôktu ki nit iti riang ni ta, Israel Pathian, nang ritlantu chu ki nit iti riang ni ti.

¹⁷Sumsen rithûlin rângkachak nang hong chôi pêk ki ta, Thîr rithûlin tangkarua, thing rithûlin sumsen, Lung rithûlin thîr nang hong chôi pêk ki ti. Ni chunga thuneitu rangin ‘Ringeina’ siang ki ta, Sin irêltu rangin ‘Dikna’ kî sia rang a nit.

¹⁸Ni ramah khan nuniter taka sinitho rihu om khâi no ni a; Ni ram chu vânduaina tonga isehchit nih khâi no nih. Ni banghei chu ‘Saninzôkna’ bêng ni ta; Ni kotbâihei chu ‘Inpâkna’ bêng ni ti.

¹⁹Sûnah khan inî vâr nang khâi no tin a, Zânah khom ithla kha ni meiser ivâr ni khâi no nih. Keimah, PUMAPA ngêi hih ni kumtluang vâr ni tâng ki ta; Ki roinpuina vâr khah ni chungah zuang vâr mai a ti.

²⁰Ni chungah khan inî thla khâi no ni a, Ithla khom boi tlak khâi no nih. Keimah, PUMAPA ngêi hih ni kumtluang vâr nîng ki ta, Ni beidong nikhuahei chu boi tâng a ti.

²¹Ni mihei khan thil idik korong tho tâng an ta, Ram chu kumkhuakan lua tâng an ti. Kî phun an nit a, ki kutsuak an nit, Ki roinpuizia mi tin muah ki înlang a nit.

²²Nin nam lâia â chîn tak neh â tlôm tak khom, Nam ilian roinpui tak la nîng an ti. A zoro a tlung tikah hihei hih ki îthlun zel rang a nit. Keimah hih PUMAPA chu ki nit.”