Read Biete ISAIA 61 Bible Online

ISAIA 61 - Biete bible

ISAIA 61

¹Tinrêngthothei PUMAPA rithla chu ki chungah a om a, Riak a nen rithu a, PUMAPA khan a ne itir a nit. Rianginvâihei zianga thurchi ṭha ril a, Ringnun beidonghei bôl indam a, Bôia tânghei suakna thu hei, Izîng nuaia ṭhunghei zalenna thu inpuang rangin a ne irthlang a nit.

²PUMAPA lunghoi kum thu inpuang a, An Pathian phuba lâk zoro a tlung tâk iti inpuang a, Lusûnhei chu thlangam isak rangin a ne itir a nit.

³Ziona beidonghei thlangam isak rang neh, An ngaisiatna murdi lômna neh râifânna inchang pêk rangin, Ingûi taka om inpâkna lâ insak nôk rangin a ne itir a nit. PUMAPA ngêiin amah chôiinrisâng ranga ai phun, Thingkung ditiom tak nîng an ti. An rêngkan thil idik thông an ta, Pathian chu a sintho sikah khan, Chôiinrisângin om a ti, iti thu ril rang ki nit.

⁴Zoro sôt taka lei ichim tâk khopui iram chu siaminṭha nôk an ti.

⁵Ki mihei, nam danghei khan nin sin thông an ta, Nin ran lômhei enkol an ti. Ram dang mihei khan nin rinêng tuk an ta, Nin grep rikulhei khom ṭuan an ti.

⁶Nangmani chu “PUMAPA thiampuhei” itia iria nîng nin ta, “Pathian isomhei” nangni tîng an ti. Nam tin richongna chu mang nin ta, An roinpuinaheia khan rithluk nin ti.

⁷Nin izak tuangna neh nin mualinphoina a boi tâk a. Nangmani ram ngêiah om tâng nin ta; A bâk inikan nin richongna pung a ta; Kumkho lômna dong tâng nin ti.

⁸PUMAPA khan, “Dikna ker ngaiinnat a, Risirdena neh ritôk rihêm hih kî nel a nit. Idik takkan ki mihei chu an sintho loman pêng ki ta; Kumtluang thuthlung anmani neh siam ki ti.

⁹Nin richihei chu nam tin lâiah inthang an ta, Mi tukhom â mu murdi kan PUMAPA iditsak nam nin nit iti riang an ti,” a ti.

¹⁰PUMAPA-ah khan lôm tak tak ki ta, Ki Pathian chungah hin lôm tak tak ki ti. Moineitu, ân rineitu thiampu angkana rivo neh, Imoi rinei thlukthlaa rivodiam angkah hin, Jerusalem chu saninringna neh nêna puanin Pathianin a înritluk a nit.

¹¹Inkhêl loia chimu ruhei a ṭoi a, An ithuar ngêt ngai angkah hin, Tinrêngthothei PUMAPA khan a mihei zôkna ithlun pêk a ta, Nam tinrêngin amah chu inpâk an ti.