Read Biete ISAIA 62 Bible Online

ISAIA 62 - Biete bible

ISAIA 62

¹Zion ithor rangin ṭong suak ki ta, Jerusalem inzôka a om mâkah chu dâirek no ning e. Â dikna chu â lang fia a, A zoina kha zan inthima meiser ivâr angkan, A vâr fel riai mâkah chu om ṭian no ning e.

²Jerusalem, nam tinrêngin ne dikzia mûng an ta, An rênghei murdîn ni roinpuina mu sâng an ti. PUMAPA ngêi isak riming ithar ripu tâng ni ti.

³PUMAPA ta rangin chôiinrisângna rênglukhum enihoi tak nîng ni ti.

⁴“Maraki” itia koi ni khâi no tin a, Ni ram khom, “Thâimâki” itia koi ni khâi no nih. Ner ming ithar kha, “Pathian Ditlâii” ni tâng a ta, Ni ram khom kha, “Pomlâii” itia koi ni tâng a ti. PUMAPA chu ni chungah â lung a hoi a, Ni ram ta ranga khan pasal angkah nîng a ti.

⁵Tlangvâlin nungâk rithiang nupuia ai nei angkah hin, Nang isiamtu khan nupuiin nang nei a ti. Moineitun â moi ai lôm ngai angkah hin, Ni Pathian khan nang lôm a ti.

⁶Jerusalem, ni kul bangheiah râlvêngtu ki sia tâk a; A sûn a zânin an dâirek rang ni tlak mak e. A ṭonginkung kha iremai rangin PUMAPA an iril mai ngai rang a nit.

⁷Jerusalem a zuang inding nôk a, Ram tin inpâk inrupa a zuang siam nôk mâkah chu, PUMAPA chu a om ṭian an phal rang ni tlak mak e.

⁸PUMAPA khan a kut changtiang ipharin ṭong ân kung a, A bânzâl ritha rât khan ai sin zoi ngêt rang a nit: “Nin buhei chu irâlhein fah khâi no ni a, Nam danghei khan nin uainhei khom in khâi no nih.

⁹Nangmani, chi chôituhei neh â tikbûmtuhei ngêi khan fah tâng nin ta, PUMAPA chu chôiinrisâng nin ti. Nangmani, grep kung ienkol a, Â râ rimaltuhei ngêi khan a uain chu, Ki Biak In tuala khan in nin ti.”

¹⁰Jerusalema mihei o, khopuia rithokin fe suak unla, Nin mi hong ikîrhei rang lampui siam rei, Lamilian siam unla, lunghei rithial unla, Mi tin mu rangin risinsiana ritlek târ suak rei.

¹¹PUMAPA khan nam tin riat rangin a inpuang a nit: “Zion nainuhei chu iril rei, PUMAPA chu nang inzôk rangin a zuang tâk, A tlansahei chu a hong ṭhui e,” itin.

¹²PUMAPA tlansahei chu “Nam Rithianghei” itia koi nîng an ta, Jerusalem chu “Pathian izong suak, a îthla no Khopui” itia koi nîng a ti.